مەملەكەت باسشىسى قاسىم-جومارت كەمەلۇلى الماتى تۇرعىندارىمەن كەزدەسۋ بارىسىندا دەنساۋلىق ساقتاۋ سالاسىنا توقتالدى، دەپ حابارلايدى «ادىرنا» ءتىلشىسى.
«قالاداعى دەنساۋلىق ساقتاۋ سالاسى تۋرالى ايتساق، مۇنداعى نەگىزگى مىندەت – ينفراقۇرىلىمدى دامىتۋ جانە قىزمەت كورسەتۋ ساپاسىن ارتتىرۋ. الماتىدا ەمحانالار مەن اۋرۋحانالار ابدەن ەسكىرگەن. تۇرعىن ۇيلەر سالعان كەزدە الەۋمەتتىك نىساندار دۇرىس جوسپارلانبايدى. ال، بۇل الدىمەن تۇرعىنداردىڭ ومىرىنە تەرىس اسەر ەتەدى. ياعني، تۇرعىندارعا كورسەتىلەتىن قىزمەتتىڭ قولجەتىمدى بولۋىنا، جەدەل جاردەمنىڭ دەر كەزىندە كومەككە كەلۋىنە كەدەرگى كەلتىرەدى،-دەپ كەم-كەتىگىن جىپكە ءتىزدى توقاەۆ.
ەندىگىدە اكىمدىك جاڭا مەديتسينالىق نىساندار سالىپ، جاڭعىرتۋ ءۇشىن ارنايى جوسپار ازىرلەۋى كەرەك. بۇل شارالار انا مەن بالا ءولىمىن ازايتىپ، ازاماتتاردىڭ اۋىر دەرتتەن ساقتانۋىنا مۇمكىندىك بەرەدى. سونىمەن قاتار، العاشقى دارىگەرلىك-سانيتارلىق كومەك جۇيەسىن دامىتۋ اسا ماڭىزدى.
پرەزيدەنت كەلەسى جىلى حالىقارالىق دەڭگەيدەگى كوپبەيىندى اۋرۋحانا قۇرىلىسىن باستاۋ كەرەكتىگىن ايتىپ، جوبانى مەملەكەت پەن بيزنەستىڭ سەرىكتەستىگى ارقىلى جۇزەگە اسىرعان ءجون ەكەنىن جەتكىزدى.
قالانىڭ قارقىندى ءوسىپ كەلە جاتقان اۋداندارىندا پەرزەنتحاناسى بار اۋرۋحانالار سالۋ قاجەت. حالىقتىڭ دەنساۋلىعىن ساقتاۋ ءۇشىن ناۋقاستاردى ەمدەۋمەن قاتار، اۋرۋدىڭ الدىن الۋ وتە ماڭىزدى. وسى ورايدا، قالا تۇرعىندارىنىڭ سالاماتتى ءومىر سالتىن ۇستانۋىنا جاعداي جاساۋلۋى ءتيىس.
«قازىرگى تاڭدا الماتىلىقتاردىڭ ۇشتەن ءبىرى عانا دەنە شىنىقتىرۋمەن اينالىسادى. جالپى، دامىعان قالالاردا سالاماتتى ءومىر سالتىنىڭ ينفراقۇرىلىمى دەگەن ۇعىم بار. الماتىنىڭ بارلىق اۋداندارىندا وسىنداي ينفراقۇرىلىم سالىنۋى كەرەك. قازىر قالاداعى سپورت نىساندارى نەگىزىنەن ورتالىقتا ورنالاسقان. شەتتەگى اۋدانداردا مۇلدەم جەتىسپەيدى. سوندىقتان، اكىمدىككە جىل سايىن كەمىندە 3 دەنەشىنىقتىرۋ-ساۋىقتىرۋ كەشەنىن سالۋدى تاپسىرامىن»،-دەدى مەملەكەت باسشىسى بايانداماسىندا.
