پرەزيدەنت قاسىم-جومارت توقاەۆ الماتى قالاسىنىڭ اكىمى ەربولات دوساەۆقا قالانىڭ ورتالىعى مەن شەتىندەگى تەڭسىزدىكتى جويۋدى تاپسىردى، دەپ حابارلايدى “ادىرنا” ۇلتتىق پورتالى.
"قالا – بارىنە ورتاق. سوندىقتان قالانىڭ يگىلىكتەرى دە بارلىق تۇرعىنعا بىردەي قولجەتىمدى بولۋعا ءتيىس", - دەدى توقاەۆ.
ايتۋىنشا، شەتكەرى اۋدانداردىڭ دامۋى تىم كەنجە قالىپ وتىر.
"الەۋمەتتىك نىساندار جەتىسپەيدى. جۇرت سەرۋەنگە باراتىن ساياباقتار تاپشى. نەگىزىنەن جەر ۇيلەر كوپ سالىنعان. ءتىپتى، قىس ايلارىندا قارا ءتۇتىن قاپتايدى. ازاماتتاردىڭ دەمالىسىن پايدالى وتكىزەتىن قوعامدىق ورىندار از. كولىك جانە ينجەنەرلىك ينفراقۇرىلىم دا جەتكىلىكسىز", - دەدى پرەزيدەنت.
ايتا كەتەيىك، بۇگىن توقاەۆ الماتى قالاسىمەن كەزدەسۋ وتكىزۋدە.
