الەۋمەتتىك جەلىدە قازاقستاندىقتار، قازاقى تۇسىنىكتەگى ازاماتتار، رەسەيدىڭ تانىمال ءانشىسى پولينا گاگارينانىڭ الماتىدا كونتسەرتىن وتكىزۋگە قارسىلىق تانىتقان ەدى. بەلگىلەنگەن مەرزىمدە ءانشىنىڭ كونتسەرتى بولماي قالدى. بۇل جايلى "ادىرنا" ۇلتتىق پورتالى "NewTimes.kz"-كە سىلتەمە كورسەتە وتىرىپ حابارلايدى.
رەسەيدىڭ باسقىنىشىلىق ارەكەتىن اشىق قولداپ، دارىنى مەن قابىلەتىن ساياسيلاندىرعان ءانشىنىڭ كەشى 14 قاراشا كۇنى "Almaty Arena"-دا ءوتۋى ءتيىس ەدى. بيلەت قۇنى دا cەگىز مىڭ تەڭگەدەن باستالعان.
كەيىننەن الەۋمەتتىك جەلى بەلسەندىلەرى رەسەيلىك انشىلەردىڭ كونتسەرتىن ەلىمىزدە وتكىزۋدى دوعارۋدى تالاپ ەتە باستادى.
اسىل تۇرعاەۆ اتتى فەيسبۋك قولدانۋشىسى پولينا گاگارينا كومانداسىنىڭ وكىلىمەن بايلانىسىپ، حات الماسقان جازباسىن جەلىدە ءبولىستى. وندا پولينا گاگارينانىڭ الماتى جۇرتشىلىعىنا بەرەتىن كونتسەرتىنىڭ وتپەيتىنى حابارلانادى.
قازاقستانداعى تانىمال سەرۆيستەردە ءالى كۇنگە دەيىن كونتسەرت حابارلاندىرۋى مەنمۇندالاپ تۇر. بىراق وعان بيلەت ساتىپ الۋعا قاتىستى ەش دەرەكتەر جوق. بيلەت جايلى اقپارات پولينا گاگارينانىڭ رەسمي سايتىندا دا كورسەتىلمەگەن.
"ادىرنا" ۇلتتىق پورتالى
