بۇگىن پرەزيدەنتتىككە ۇمىتكەرلەر اراسىندا تىكەلەي ەفيردە تەلەدەبات بولادى

2304
Adyrna.kz Telegram

2022 جىلعى 11 قاراشادا ساعات 20:00-دە «حابار» تەلەارناسىنىڭ تىكەلەي ەفيرىندە قازاقستان رەسپۋبليكاسى ورتالىق سايلاۋ كوميسسياسىنىڭ ۇيىمداستىرۋىمەن قازاقستان رەسپۋبليكاسى پرەزيدەنتتىگىنە كانديداتتاردىڭ جانە ولاردىڭ سەنىمدى وكىلدەرىنىڭ قاتىسۋىمەن تەلەۆيزيالىق دەبات وتەدى.

رەگلامەنتكە سايكەس، تەلەدەبات ءتورت راۋندتان تۇرادى.

ءبىرىنشى راۋند – «سايلاۋالدى باعدارلامانىڭ تانىستىرىلىمى». وندا قاتىسۋشىلار سايلاۋالدى باعدارلاماسىنىڭ نەگىزگى باعىت-باعدارىن تانىستىرادى.

ەكىنشى راۋندتا «پىكىرسايىس سەسسياسى» وتەدى. وندا ءار قاتىسۋشى ءوزى تاڭداعان ەكى وپپونەنتىنە ءبىر-ءبىر سۇراقتان قويادى.

ءۇشىنشى راۋند - «سايلاۋشىلاردىڭ سۇراقتارى». 2022 جىلدىڭ 10 قاراشاسىنا دەيىن «حابار» اگەنتتىگىندە «ۇمىتكەرگە سۇراق قوي!» ايدارىمەن سايلاۋشىلاردان ۆيدەوسۇراقتار قابىلداندى.

ياعني، ازاماتتارعا كەز كەلگەن كانديداتقا ءوز سۇراقتارىن قويۋعا مۇمكىندىك بەرىلدى. ولار ۇزاقتىعى 1 مينۋتتان اسپايتىن سۇراق جازىپ، ونى debaty-2022@khabar.kz ەلەكتروندىق پوشتاسىنا جىبەردى. سايلاۋشىلاردان كەلگەن سۇراقتار ىشىنەن ءاربىر كانديداتقا كەزدەيسوق ءبىر سۇراقتان قويىلادى. ەفيردە قويىلماعان ۆيدەوسۇراقتار كانديداتتاردىڭ شتابتارىنا جاۋاپ بەرۋ ءۇشىن جىبەرىلەدى.

ءتورتىنشى راۋند «سايلاۋشىلارعا ۇندەۋ» دەپ اتالادى. وندا قاتىسۋشىلار سايلاۋشىلارعا ارنالعان ءوز ۇندەۋلەرىن جاسايدى.

پىكىرلەر