ء“تۇسىم سياقتى”: ءلايلا سۇلتانقىزى مارقۇم كۇيەۋى تۋرالى اسەرلى جازبا جاريالادى

1677
Adyrna.kz Telegram
فوتو: Instagram
فوتو: Instagram

بەلگىلى تەلەجۇرگىزۋشى ءلايلا سۇلتانقىزى ءوزىنىڭ instagram پاراقشاسىندا مارقۇم كۇيەۋى قايرات بەركىنباەۆ تۋرالى اسەرلى جازبا جاريالادى، دەپ حابارلايدى “ادىرنا” ۇلتتىق پورتالى.

«مەنىڭ قايرەكەم… سوڭعى ءۇش كۇن ءتۇسىم سياقتى. سەنگىم دە، مويىنداعىم دا كەلمەيدى. وتاسقانىمىزعا 16 جىلدان استى. ەركەلەتتى، يكەمدەدى، ۇيرەتتى. ەندى عانا، مىنە، ۇلدار ءوستى دەگەندە…

ىشتەگى سەزىمىمدى ايتارعا ءسوزىم، جازارعا ارىپتەرىم دە جەتپەيدى. قالدىرعان ءىزى، اتقارعان ءىسى كوپ، ءالى دە قانشا  جوسپارى بار ەدى… ولار تۋرالى ايتۋعا دا قارسى بولاتىن. «اللادان قايتادى»، - دەپ اۋىز اشقىزبايتىن. سىزدەرگە دە ءجيى ايتپايتىن سەبەبىم وسى ەدى.

قازىر دە ءيىسى مۇرنىما كەلىپ، ءسوزى قۇلاعىمدا ويناپ، كوز جاسىم توقتاماي، قورقىنىشتى ءتۇس كورىپ جاتقاندايمىن. اعامنىڭ كەتكەنىنە كوپ بولماپ ەدى، ال ەندى بايتەرەگىم قۇلادى»، - دەپ جازدى ول.

سونداي-اق، ءلايلا قازاعا بايلانىستى كوڭىل ايتىپ جاتقان جاندارعا العىسىن ايتتى.

«كوڭىل ايتىپ، جازىپ جاتقان بارشاڭىزعا راقمەت. قازىر وتباسىمىز ءۇشىن وتە قيىن ۋاقىت، بالالار ءۇشىن ەكى ەسە قيىن. ەشتەڭەگە شامام دا، مۇمكىندىگىم دە جوق. ءتانىم مەن جانىمدى، ميىم مەن كۇيىمدى جۇيەلەپ العانشا تۇسىنىستىكپەن قاراۋلارىڭىزدى شىن جۇرەكتەن ءوتىنىپ سۇرايمىن»، - دەدى ول.

ايتا كەتەيىك، 6 قاراشادا قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعى «وقجەتپەس» ەمدەۋ-ساۋىقتىرۋ كەشەنى اق پرەزيدەنتى قايرات بەركىنباەۆ ومىردەن وتكەن ەدى.

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket