قازاقستاننىڭ شالعاي ەلدىمەكەندەرىنىڭ 80 000 استام تۇرعىنىنا تەگىن مەديتسينالىق كومەك كورسەتىلدى

3347
Adyrna.kz Telegram

بۇگىن 6 اي بويى شالعاي ەلدىمەكەندەردى ارالاپ، حالىققا تەگىن مەديتسينالىق كومەك كورسەتكەن «مەديتسينالىق پويىزدار» قايىرىمدىلىق جوباسىنىڭ اياقتالۋىنا بايلانىستى ءباسپاسوز ءماسليحاتى ءوتتى.

جوبانى «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورى قر دەنساۋلىق ساقتاۋ مينيسترلىگىنىڭ قاتىسۋىمەن، «قازاقستان تەمىر جولى» ۇك اق» جانىنداعى «الەۋمەتتىك جوبالار قورى» كورپوراتيۆتىك قورىمەن بىرلەسىپ ىسكە اسىردى.

ەستەرىڭىزگە سالا كەتەيىك، «مەديتسينالىق پويىزدار» جوباسىنىڭ باستى ماقساتى – ەلىمىزدەگى ساپالى مەديتسينالىق قىزمەتكە قول جەتكىزە الماي وتىرعان، شالعايدا جاتقان ستانتسيالار مەن ولارعا جاقىن ورنالاسقان ەلدىمەكەندەردىڭ تۇرعىندارىن تەگىن مەديتسينالىق تەكسەرۋدەن وتكىزۋ.

بيىل قازاقستاننىڭ شالعاي بەكەتتەرىندە زاماناۋي دياگنوستيكالىق جابدىقتار ورناتىلعان «سالاماتتى قازاقستان» جانە «جاردەم» مەديتسينالىق پويىزدارىنىڭ ماماندارى كومەك كورسەتتى. مەديتسينالىق پويىزدار بۇكىل قازاقستاندى ارالادى: «جاردەم» – قىزىلوردا، باتىس قازاقستان، اقتوبە، اتىراۋ، ماڭعىستاۋ، تۇركىستان، جامبىل وبلىستارىنا; «سالاماتتى قازاقستان» الماتى، جەتىسۋ، اباي، شىعىس قازاقستان، پاۆلودار، سولتۇستىك قازاقستان، اقمولا، قوستاناي جانە قاراعاندى مەن ۇلىتاۋ وبلىستارىنا باردى. 6 ايدا پويىز ماماندارى 147 بەكەتتىن تۇرعىندارىن دەمالىسسىز قابىلدادى.  جۇمىس بارىسىندا بارلىعى قازاقستاننىڭ 80 649 تۇرعىنىنا ەمدەۋ-كونسۋلتاتسيالىق قىزمەت كورسەتىلىپ، ونىڭ ىشىندە 21 867 بالا قارالدى. 5 097  شاعىن حيرۋرگيالىق وپەراتسيا جاسالىپ، 26 587 ادامعا ستوماتولوگيالىق كومەك كورسەتىلدى. «جاردەم» مەديتسينالىق پويىز ماماندارى 59 بالا سۇندەتتەلدى. مەديتسينالىق پويىزداردا بارلىعى 389 388 دارىگەرلىك قابىلداۋ بولدى. جولدىڭ جالپى ۇزىندىعى – 22 009 شاقىرىم.

سالىستىرا كەتسەك، پاندەمياعا دەيىنگى 2019 جىلى جوباعا قاتىسقان ماماندار 273 ەلدىمەكەندى ارالاپ، 63 000-نان اسا تۇرعىنعا  مەديتسينالىق كومەك كورسەتتى. ال دارىگەرلەرگە قارالۋدىڭ جالپى سانى 209 249-دى قۇرادى.

            «جالپى «Samruk-Kazyna Trust» قورىنىڭ 2022 جىلعا ارنالعان قايىرىمدىلىق بيۋدجەتى 10 ملرد تەڭگەنى قۇرايدى. ونىڭ ىشىندە 9 ايدا 7,1 ملرد تەڭگە يگەرىلدى. بۇل رەتتە ەل بويىنشا 44 جوبا ىسكە اسىرىلۋدا، ونىڭ 30-ى بيىل قامقورشىلىق كەڭەستىڭ ماقۇلداۋىنا يە بولدى. سول جوبالاردىڭ ءبىرى – «مەديتسينالىق پويىزدار». ءبىزدىڭ قور 760 ميلليون تەڭگەگە جۋىق قارجىعا قىزمەتىن تولىق قامتاماسىز ەتكەن جوبانىڭ ارقاسىندا شالعايدا ورنالاسقان ەلدىمەكەن تۇرعىندارىنا تەگىن مەديتسينالىق كومەك كورسەتىلدى. ءبىز ءۇشىن بۇل جوبانىڭ ماڭىزى زور. ويتكەنى وسىنىڭ ارقاسىندا حالىق دەنساۋلىعىن جاقسارتۋعا، الىس اۋداندار مەن اۋىل تۇرعىندارىنا قاجەت قىزمەت تۇرلەرىن قولجەتىمدى ەتۋگە مۇمكىندىك تۋدى. مەن پويىز ۇجىمدارىنا، ونداعى دارىگەرلەرگە العىسىمدى بىلدىرگىم كەلىپ وتىر. اقجولتاي قۇرامنىڭ ارقاسىندا كوپتەگەن ەل تۇرعىندارى تەگىن ءارى ساپالى مەديتسينالىق كومەك الىپ، ءومىر ءسۇرۋ ساپاسى جوعارىلاۋدا»، – دەپ اتاپ ءوتتى «Samruk-Kazyna Trust» الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا.

دارىگەرلەردىڭ ايتۋىنشا، تۇرعىنداردى تەكسەرۋ كەزىندە قانت ديابەتى، گلاۋكوما، ليپوما، ارتروز، سوزىلمالى حولەتسيستيت، سوزىلمالى پانكرەاتيت، اللەرگيالىق دەرماتيت اۋرۋلارى كەڭىنەن تارالعانى بايقالعان. ونكولوگيالىق اۋرۋلاردان بولەك، تاعى ءجيى كەزدەسەتىن دەرتتىڭ ءبىرى – ينسۋلت. تۇرعىنداردىڭ اراسىندا نەۆروپاتولوگ، حيرۋرگ، كوز، قۇلاق جانە مۇرىن  دارىگەرلەرىنە سۇرانىس كوپ بولدى.

«ەلدى ارالاپ جۇرگەن كەزدە ءارتۇرلى جاعدايعا تاپ بولامىز. كوبىنە الىس جاتقان ەلدىمەكەندەردە دەرتتى دەر كەزىندە انىقتايتىن ارنايى مەديتسينالىق قۇرىلعىلار بولماي جاتادى، سونداي-اق مامان تاپشىلىعى دا بار. مىسالى، باتىس قازاقستاندا بولعانىمىزدا 76 ادامنان تۋبەركۋلەز دەرتى انىقتالدى. سونداي-اق №10 رازەزدە قيىن جاعدايعا تۇسكەن سابيگە كومەك كورسەتىلدى. اۋىر دارەجەدەگى كۇيىك دياگنوزىمەن (تەرى ترانسپلانتاتسياسى) تۇسكەن ءبىر جارىم جاستاعى بالاعا كورسەتىلگەن ستاتسيونارلىق ەمدەۋدەن كەيىن پويىز دارىگەرلەرى كۇردەلى تاڭۋ جۇرگىزدى. ودان بولەك بەگىمبەت ستانتسياسىنىڭ 90 جاسار تۇرعىنى شايكەن باقىتجانوۆانىڭ ۇيىنە بارىپ، ەكىنشى رەت تەكسەرۋ جۇرگىزدىك. 2019 جىلعى ساپار كەزىندە ەم-دوم جۇرگىزگەنبىز. بيىل كەلگەنىمىزدى ەستىپ، قىزى حابارلاسىپ، اناسىنىڭ دەنساۋلىعىن تەكسەرىپ بەرۋدى سۇرادى.  ءبىز ءوز كەزەگىمىزدە اناليز الىپ، ناۋقاستىڭ جۇرەگىن تەكسەردىك. ريزا بولعان كەيۋانانىڭ اق باتاسىن دا الدىق»، - دەپ ەرەكشە وقيعالارمەن ءبولىستى «جاردەم» پويىزىنىڭ باس دارىگەرى اينۇر ەگىنباەۆا.

ەلىمىزدىڭ سولتۇستىك، شىعىس، ورتالىق وڭىرلەرىن ارالاعان «سالاماتتى قازاقستان» دارىگەرلەرى دە جۇمىس بارىسىندا ءارتۇرلى وقيعالارعا تاپ بولعان. ماسەلەن، پاۆلودار وبلىسى مارالدى ستانتسياسىنىڭ تۇرعىنىندا وتە سيرەك كەزدەسەتىن دياگنوز – دەكستروكارديا بار ەكەنىن پويىز ماماندارى انىقتاعان. بۇل دەگەنىمىز، ناۋقاستىڭ جۇرەگى وڭ جاعىندا ورنالاسقان. ارينە، مۇنداي جاعدايدا ەم تاعايىندالمايدى، بىراق بۇل اقپاراتتى 47 جاسار تۇرعىن مەديتسينالىق پويىزدا تەكسەرۋ كەزىندە العاش رەت بىلگەن. سونداي-اق سولتۇستىك قازاقستاندا 22 جاسار قىزدا «ەحينوكوككوز» دەرتى انىقتالىپ، ماماندار ناۋقاستى وتا جاساتۋعا جىبەرگەن.

مەديتسينالىق پويىزدار ماماندارىنىڭ كومەگىن العان تاعى ءبىر قازاقستاندىق -  گۇزال مۇحامەد. ءوزى شىمكەنت قالاسىنىڭ تۋماسى بولعانىمەن، دارىگەرلەر قابىلداۋىنا اتىراۋدا كەلگەن.

«مەن جازدا قىدىرىپ، اتىراۋداعى مۇقىر ستانتسياسىنا باردىم. سول جاقتاعى تانىستارىمنان «جاردەم» پويىزىنىڭ كەلگەنىن ەستىدىم. كەنەتتەن ءىشىم اۋىرىپ، قاتتى مازامدى الدى. سودان بىردەن پويىز ماماندارىنا باردىم. پويىزدا ۋدز-عا ءتۇسىرىپ، اناليز تاپسىردىم. جەدەل تۇردە حيرۋرگ «سوقىرىشەك» دياگنوزىن قويىپ، وبلىستىق ەمحاناعا پويىز ماماندارى الىپ باردى. ول جەردە دە مەنىڭ دياگنوزىمدى راستاپ، بىردەن وتا جاسادى. دارىگەرلەرگە، ۇيىمداستىرۋشىلارعا العىسىم شەكسىز»، - دەپ ءوز ريزاشىلىعىن ءبىلدىردى ول.

جوبا العاش رەت 2010 جىلى ىسكە قوسىلىپ، 2019 جىلعا دەيىن جىل سايىن ىسكە اسىرىلىپ كەلدى دە، كوروناۆيرۋس ىندەتى كەزىندە ءۇزىلىس الدى. وسى كەزەڭ ىشىندە «دەنساۋلىق»، «جاردەم» جانە «سالاماتتى قازاقستان» اتتى ءۇش كونسۋلتاتسيالىق-دياگنوستيكالىق پويىز قازاقستاننىڭ شالعايدا ورنالاسقان 1870 ەلدىمەكەنىن ارالاپ، 569 530  تۇرعىن تەكسەرۋدەن ءوتتى. 17 078 شاعىن حيرۋرگيالىق وپەراتسيا جاسالىپ، 148 546 ادامعا ستوماتولوگيالىق كومەك كورسەتىلدى.

پىكىرلەر