كولىك پوليتسياسى 1 ملن تەڭگەگە جۋىق بولاتىن التىن بۇيىمداردى ۇرلاعان اقتاۋ اۋەجايىنىڭ جۇك تيەۋشىسىن ۇستادى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
اۋەجايدىڭ جۇك تيەۋشىسىنىڭ زاڭسىز ارەكەتتەرىنەن “اقتاۋ – انتاليا” جانە “اقتاۋ – الماتى” رەيستەرىنىڭ ەكى جولاۋشىسى زارداپ شەككەن. ماڭعىستاۋ ستانتسياسىنداعى جەلىلىك پوليتسيا بولىمىنە “اقتاۋ – انتاليا” باعىتىنداعى اۋە رەيسىنىڭ 41 جاستاعى جولاۋشىسى ءوزىنىڭ جۇگىندە بولعان التىن بۇيىمداردىڭ (ەك نەكە ساقينسى، ەكى سىرعا، بىلەزىك، القا) ۇرلانعانى تۋرالى شاعىمداندى. ونىڭ ايتۋىنشا، وسىعان ۇقساس ءوتىنىش كولىك پوليتسياسىنا الماتى قالاسىنىڭ 42 جاستاعى تۇرعىنىنان دا كەلىپ تۇسكەن. ول “اقتاۋ – الماتى” باعىتىنداعى اۋە رەيسىمەن ۇيىنە ۇشىپ كەلگەننەن كەيىن جۇگىنە سالىنعان التىن بۇيىمداردىڭ (گاۋھار تاستارى بار سارى جانە اق التىننان جاسالعان سىرعا-ساقينالار) جوعالعانىن انىقتاعان.
جابىرلەنۋشىلەرگە كەلتىرىلگەن زالال سوماسى 930 مىڭ تەڭگەنى قۇرادى.
– جەدەل-ىزدەستىرۋ ءىس-شارالارىن جۇرگىزۋ بارىسىندا كولىك ساقشىلارى اۋەجايدىڭ 30 جاستاعى جۇك تيەۋشىسىن انىقتاپ، ۇستادى. كۇدىكتىنىڭ ماڭعىستاۋ وبلىسىنىڭ تۇرعىنى ەكەنى بەلگىلى بولدى. ول ءوز كىناسىن مويىندادى. زاتتاي دالەلدەمەلەر تاركىلەنىپ، يەلەرىنە قايتارىلدى. تەرگەۋ جۇرگىزىلۋدە، – دەدى كولىكتەگى پوليتسيا دەپارتامەنتىنىڭ باستىعى وڭال بەكەەۆ.
