“ۇيدە قاماپ ۇستايدى”: ناشاقور كۇيەۋىنەن زارداپ شەككەن ايەل ادىلدىك ىزدەيدى

1643
Adyrna.kz Telegram

كۇيەۋىنەن زارداپ شەككەن ايەل ادىلدىك ىزدەيدى. الماتىلىق ارايلىم جەكسەمبەكوۆا بۇعان دەيىن الەۋمەتتىك جەلىدە ناشاقور كۇيەۋىنىڭ ۇرىپ-سوعاتىنىن، «ولتىرەمىن» دەپ قوقان-لوقى كورسەتەتىنىن ايتىپ، اراشا سۇراعان، دەپ حابارلادى “ادىرنا” ۇلتتىق پورتالى «استانا» تەلەارناسىنا سىلتەمە جاساپ. 

ەكى بالالى انانىڭ ماسەلەسىنە ەشكىم نازار اۋدارماي وتىرعان كورىنەدى.

«ءوزىمنىڭ جانە بالالارىمنىڭ ءومىرى ءۇشىن قورقامىن»،-  دەيدى جاس انا.

ارايلىم جەكسەمبەكوۆا جولداسىمەن نەبارى 1 جىلعا جۋىق وتاسقان. مامىر ايىندا كۇيەۋى العاش رەت وعان قول كوتەرىپ، ەسىنەن تانعانشا ۇرىپتى. سودان كەيىن ول ادەتكە اينالدى دەيدى. كوپ ۇزاماي جولداسىنىڭ ەسىرتكى پايدالاناتىنىن بىلگەن ارايلىم پوليتسياعا ارىز جازعان. الايدا، ءزابىر كورسەتۋشى تەك 5-10 كۇنگە قاماۋعا الىنادى دەيدى ول.

«جۇكتى بولعانىما قاراماستان ول مەنىڭ ىشىمنەن تەۋىپ، سۋعا باتىرۋعا تىرىستى. ۇيدە بايلاپ ۇستادى. ىستەمەگەنى جوق. جۇبايىم قارسى بولعانىمەن، سوت ارقىلى اجىراستىق. بىراق ول مەنى اڭدىپ، قوقان-لوقى كورسەتۋىن توقتاتقان جوق. جاقىندا عانا بوساندىم. قازىر، ءتىپتى، ۇيدەن شىعۋعا قورقامىن»، -دەيدى جابىرلەنۋشى ارايلىم جەكسەمبەكوۆا.

ءزابىر كورسەتۋشىگە قاتىستى «قيناۋ» بابى بويىنشا قىلمىستىق ءىس قوزعالعان. ونىڭ اقىل- ەسىنىڭ دۇرىستىعىن انىقتاۋ ءۇشىن ساراپتاما تاعايىندالدى. بىراق بۇل ءىستىڭ تىم ۇزاپ كەتكەنى ارايلىمدى الاڭداتىپ وتىر.

«بۇرىنعى جۇبايىمنىڭ پوليتسيا قىزمەتكەرلەرى مەن مەديتسينا سالاسىنداعى قىزمەتكەرلەر اراسىندا تانىستارى بار. ونىڭ اقىل-ەسىنىڭ دۇرىس ەمەستىگى انىقتالسا، تۇرمەگە وتىرمايدى. ول كەز-كەلگەن مەديتسينالىق قورىتىندىنى جاساتىپ الۋعا قاۋقارلى. ءىس قاشان اياقتالاتىنىن دا ەشكىم ايتپايدى. پوليتسيا قىزمەتكەرلەرى بەيعام، ءتىپتى، بۇرىنعى جۇبايىمنىڭ تارابىن قولداپ وتىر»،- دەيدى كەلىنشەك.

ال پوليتسيانىڭ جاۋابى قىسقا. ولار بارلىعى زاڭعا سايكەس ەكەنىن ايتادى.

«سوتالدى بىرىڭعاي تىزىلىمىندە قك 110 بابى بويىنشا قىلمىستىق ءىس قوزعالىپ، قازىرگى تاڭدا پروتسەسسۋالدى كودەكسپەن كوزدەلگەن بارلىق تەرگەۋ امالدارى جۇزەگە اسىرىلۋدا. كىنالى ازامات مىندەتتى تۇردە قىلمىستىق جاۋاپكەرشىلىككە تارتىلاتىن بولادى»، -دەيدى الماتى قالاسى پد رەسمي وكىلى سالتانات ازىربەك.

زاڭگەرلەر وتباسىلىق زورلىق-زومبىلىقتىڭ جازاسىن قاتاڭداتۋ قاجەتتىگىن ايتادى. ماسەلەن، ايىپپۇلدىڭ ورنىنا تارتىپتىك جۇمىسقا تارتۋدى قولدايدى.

«قازىرگى تاڭدا وتباسىلىق زورلىق-زومبىلىق كۇننەن كۇنگە ءورشىپ جاتىر. ونىڭ باستى سەبەبى – ەرلى-زايىپتىلاردىڭ اراسىنداعى قۇقىقبۇزۋشىلىق وتە تومەن دارەجەلەنگەن. ياعني، ول ءۇشىن تەك اكىمشىلىك جازا قولدانىلادى. ونداي ازاماتتاردى كەشىرۋدىڭ كەرەگى جوق. ءبىر رەت قول كوتەرگەن ادام جازاسىز قالسا، ەكىنشى رەت تە قول كوتەرۋى مۇمكىن»، -دەيدى زاڭگەر عابيت ومىربەكوۆ.

زاڭگەرلەردىڭ ايتۋىنشا، ەگەر جابىرلەنۋشىلەردىڭ پوليتسيا ماماندارىنىڭ جۇمىسىنا كوڭىلى تولماسا، ولار پروكۋراتۋراعا شاعىمدانۋعا قۇقىلى.

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket