عالامدىق كليماتتىڭ وزگەرۋى جانە پارنيكتىك گازدار بولىندىلەرىن ازايتۋ جونىندەگى حالىقارالىق مىندەتتەمەلەر اياسىندا كومىرتەكتى ەگىنشىلىك اگرارلىق سەكتوردى دامىتۋدىڭ ستراتەگيالىق باعىتىنا اينالۋدا. قازاقستاننىڭ كليماتتىق ساياساتىندا 2030 جىلعا قاراي بولىندىلەردى 325 ملن توننا سو₂-عا دەيىن قىسقارتۋ كوزدەلگەن، بۇل مىندەتتى ورىنداۋدا اگروسەكتوردىڭ بەلسەندى ات سالىسۋى قاتىسۋى قاجەت.
اۋىل شارۋاشىلىعى قازاقستانداعى پارنيكتىك گازداردىڭ ەكىنشى ءىرى كوزى بولىپ تابىلادى — شامامەن 33 ملن توننا سو₂-ەكۆيۆالەنتى (جالپىۇلتتىق بولىندىلەردىڭ 9,3%-نان). نەگىزگى ەميسسيالار – مال شارۋاشىلىعىنان بولىنەتىن مەتان جانە تىڭايتقىشتاردان شىعاتىن ازوت توتىعى. دەگەنمەن، دۇرىس باسقارۋ جاعدايىندا توپىراق كومىرتەكتى بولمەي، كەرىسىنشە جيناقتاي الادى. بۇرىن جەر پايدالانۋ جانە ورمان سەكتورى كومىرتەك ءسىڭىرۋشى بولسا، بۇگىندە جىلىنا 4,1 ملن توننادان استام سو₂ شىعاراتىن كوزگە اينالعان. الايدا سول جىلى بولىندىلەردىڭ 11,9%-عا تومەندەۋى دۇرىس باسقارۋدىڭ الەۋەتىن كورسەتىپ وتىر.
كومىرتەكتى ەگىنشىلىكتى تابىستى دامىتۋ ءۇشىن قازاقستاندا اگروەكوجۇيەلەردەگى كومىرتەكتى باسقارۋدىڭ جۇيەلى مودەلى قاجەت. مەملەكەت باسشىسىنىڭ كليماتتىق تۇراقتىلىقتى قامتاماسىز ەتۋ جانە 2060 جىلعا قاراي قازاقستان رەسپۋبليكاسىنىڭ كومىرتەكتىك بەيتاراپتىققا قول جەتكىزۋ جونىندەگى تاپسىرمالارىنا سايكەس، قر پرەزيدەنتىنىڭ جانىنداعى ۇلتتىق عىلىم اكادەمياسى قازاقستاندا العاش رەت «Kaz Agro Carbon» اتتى كومىرتەكتى اگروكليماتتىق پوليگون قۇرۋدا. جوبا بويىنشا سەرىكتەستەر – رەسەي عىلىم اكادەمياسىنىڭ اگرارلىق ەكولوگيا فەدەرالدىق عىلىمي ورتالىعى. العاشقى پوليگون قازاقستاننىڭ دالالى ايماعىندا، اقمولا وبلىسىندا ورنالاسقان ا.ي. باراەۆ اتىنداعى استىق شارۋاشىلىعى عىلىمي-وندىرىستىك ورتالىعى بازاسىندا ورنالاساتىن بولادى.
اگروكليماتتىق پوليگون «Kaz Agro Carbon» كومىرتەكتىك بالانس پەن پارنيكتىك گازداردى ولشەۋ، مودەلدەۋ، بولجاۋ جانە باسقارۋ ءۇشىن ءتيىمدى الاڭعا اينالادى. ەكى ەلدىڭ عالىمدارى سولتۇستىك قازاقستاننىڭ ءارتۇرلى ەكوجۇيەلەرىندە بولىندىلەردى ازايتۋ جانە كومىرقىشقىل گازىن ءسىڭىرۋدى ارتتىرۋعا باعىتتالعان تەحنولوگيالاردى ازىرلەپ، سىناقتان وتكىزەتىن بولادى.
