پرەزيدەنتتىككە كانديدات قاسىم-جومارت توقاەۆتىڭ رەسپۋبليكالىق قوعامدىق شتابىنىڭ سايلاۋشىلارمەن كەزدەسۋى ۇلىتاۋ وبلىسىندا جالعاستى.
جەزقازعان قالالىق حالىقتار دوستىعى مەن مادەنيەتى ۇيىندە ءوڭىر جۇرتشىلىعىمەن كەزدەسۋ ءوتىپ، وعان 500-گە جۋىق ادام قاتىستى.
ۇلىتاۋلىقتارمەن اڭگىمەلەسۋ كەزىندە رقش مۇشەلەرى كانديداتتىڭ «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» سايلاۋالدى باعدارلاماسىندا كورسەتىلگەن وڭىرلەردى دامىتۋ ماسەلەلەرىنە ەرەكشە نازار اۋداردى.
رەسپۋبليكالىق قوعامدىق شتابتىڭ باسشىسى ەرلان قوشانوۆ ۇلىتاۋ توپىراعى ۇلت بىرلىگىن بەينەلەيتىن قاسيەتتى مەكەن ەكەنىن اتاپ ءوتتى.
«ۇلتىمىزدى ۇيىستىرعان ۇلىتاۋ جەرى – ەلدىكتىڭ، بىرلىكتىڭ باستاۋى. ءبىز الدىمىزداعى سايلاۋدا سونى تاعى ءبىر مارتە دالەلدەۋگە ءتيىسپىز. ءبىزدىڭ ءبىر تۋدىڭ استىنا جينالىپ، كواليتسيا قۇرۋىمىز دا وسىنىڭ ايعاعى. بىرلىگىمىز كەز-كەلگەن سىناقتى ەڭسەرەدى. الداعى سايلاۋدا دا ءوز بىرلىگىمىزدى كورسەتۋىمىز كەرەك»، – دەدى ەرلان قوشانوۆ.
بۇدان كەيىن، رەسپۋبليكالىق قوعامدىق شتابتىڭ مۇشەلەرى «ULYTAU NAN» جشس نان زاۋىتىندا بولىپ، كاسىپورىن قىزمەتكەرلەرىنە كانديداتتىڭ بيزنەستى دامىتۋ جانە كاسىپوداقتاردى قولداۋ جونىندەگى سايلاۋالدى باستامالارىن ءتۇسىندىردى.
وڭىردەگى جەتەكشى كاسىپورىنداردىڭ ءبىرى «Kazakhmys Smelting» جشس مىس بالقىتۋ زاۋىتى سانالادى. رقش مۇشەلەرى مەتاللۋرگتەرمەن قاسىم-جومارت توقاەۆتىڭ سايلاۋالدى باعدارلاماسىندا كورسەتىلگەن وندىرىستەگى ەڭبەك قۇقىقتارىن قورعاۋ جانە وڭدەۋشى ونەركاسىپ كاسىپورىندارىن جاڭعىرتۋ ماسەلەلەرىن تالقىلادى.
