«وقىتۋ، تاربيەلەۋ، جاقسى كورۋ: قازاقستانداعى بالالار جىلى»

3692
Adyrna.kz Telegram

ەلوردادا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ «وقىتۋ، تاربيەلەۋ، جاقسى كورۋ: قازاقستانداعى بالالار جىلى» اتتى XIII حالىقارالىق عىلىمي-تاجىريبەلىك كونفەرەنتسياسى ءوز مارەسىنە جەتتى.

«وقىتۋ، تاربيەلەۋ، جاقسى كورۋ» سيمۆوليكالىق اتاۋىن العان استانالىق پەداگوگيكالىق فورۋمنىڭ ەلىمىزدەگى بالالار جىلىنا ورايلاستىرىلعان باستى شارالاردىڭ بىرىنە اينالعانى قيسىنعا ساي.

كونفەرەنتسيادا 1500-دەن استام قازاقستاندىق مۇعالىمدەر مەن عالىمدار، سونداي-اق فينليانديا، ۇلىبريتانيا، كورەيا، ەستونيا، رەسەي، سينگاپۋر، نيدەرلاندى، جاپونيا، اقش، اۆستراليا، پورتۋگاليا، يسپانيا، مالتا جانە بولگاريا ەلدەرىنىڭ بەلگىلى پەداگوگتەرى باس قوستى.

استاناعا الەمدىك ءبىلىم بەرۋ سالاسىنىڭ ەڭ تانىمال وكىلدەرى كەلدى: فينلياندياداعى يۋۆياسكيۋل ۋنيۆەرسيتەتى توبىنىڭ Educluster Finland يننوۆاتسيالار جانە سىرتقى بايلانىستار جونىندەگى ديرەكتورى دەۆيد مارش، كورەي ءبىلىم بەرۋدى دامىتۋ ينستيتۋتىنىڭ عىلىمي قىزمەتكەرى سۋنگ دجي پارك، وكسفورد ۋنيۆەرسيتەتىنىڭ بالالاردى دامىتۋ جانە وقىتۋ پروفەسسورى يرام سيراج (ۇلىبريتانيا), كەمبريدج ۋنيۆەرسيتەتىنىڭ ەمتيحاندىق كەڭەسى وكىلى تيم وۋتس (ۇلىبريتانيا), جاپونياداعى ۇلتتىق ءبىلىم بەرۋ ساياساتىن زەرتتەۋ ينستيتۋتىنىڭ اعا عىلىمي قىزمەتكەرى توشيا چيچيبۋ، كوپتىلدى وقىتۋ ساراپشىسى پيتەر مەحيستو (ەستونيا).

كونفەرەنتسيا دەلەگاتتارىن استانا اكىمى التاي كولگىنوۆ پەن وقۋ-اعارتۋ ۆيتسە-ءمينيسترى عاني بەيسەمباەۆ قارسى الدى.

كونفەرەنتسيانىڭ اۋقىمدى كۇن ءتارتىبى «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆانىڭ «وزگەرمەلى الەمدە بالالاردى جان-جاقتى دامىتۋ» اتتى بايانداماسىندا ايقىندالدى.

«بولاشاق جولى: زاماناۋي ۇردىستەردى قابىلداۋ» اتتى ەڭ كۇردەلى تاقىرىپتى فينلياندياداعى يۋۆياسكيۋل ۋنيۆەرسيتەتى توبىنىڭ Educluster Finland يننوۆاتسيالار جانە سىرتقى بايلانىستار جونىندەگى ديرەكتورى، فيلوسوفيا عىلىمدارىنىڭ دوكتورى دەۆيد مارش تالدادى. ول حالىقارالىق ساراپشىلار توبىنىڭ قۇرامىندا قازاقستان مۇعالىمىنىڭ كاسىبي ستاندارتىن جاساۋدا NIS-پەن سەرىكتەستىكتە جۇمىس ىستەدى.

ستاندارت بالالاردىڭ ساپالى بىلىمگە قول جەتكىزۋدەگى تولىق تەڭدىگىن قامتاماسىز ەتەدى جانە مۇعالىمنىڭ مانساپتىق جولىنداعى ۇزدىكسىز كاسىبي وcۋىنە سايكەس كەلەدى، – دەپ دەۆيد مارش «نازارباەۆ زياتكەرلىك مەكتەپتەرى» دببۇ ازىرلەگەن تۇجىرىمدامالىق قۇجاتتىڭ جوعارى ساپاسىن اتاپ ءوتتى.

استانالىق فورۋمنىڭ كۇن تارتىبىندە اقپاراتتىق قوعام كونتەكستىندەگى فۋنكتسيونالدىق ساۋاتتىلىق، جاس مۇعالىمنىڭ كاسىبي دامۋى، قالىپتاستىرۋشى باعالاۋ سالاسىنداعى يننوۆاتسيالار، مەكتەپتە جايلى ورتا قۇرۋ، ينكليۋزيۆتى جانە دەربەستەندىرىلگەن وقىتۋ، تسيفرلىق مۇعالىمنىڭ ميسسياسى جانە ءبىلىم بەرۋ پروتسەسىنە جاساندى ينتەللەكتتى ەنگىزۋ، سونداي-اق باسقا دا جاھاندىق پەداگوگيكادا سۇرانىسقا يە باسىمدىقتار بار.

كونفەرەنتسيانىڭ جارقىن ساتتەرىنىڭ ءبىرى – نيدەرلاندىداعى ساراپتاما جانە سەرتيفيكاتتاۋ زەرتتەۋ ورتالىعىنىڭ «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنا كونكۋرستىق ىرىكتەۋدى اككرەديتتەۋ تۋرالى RCEC سەرتيفيكاتىن تابىستاۋ ءراسىمى بولدى.

بۇل NIS-ءتىڭ الەمدىك ءبىلىم بەرۋدەگى جاڭاشا مويىندالۋى، ول ادىلدىكتىڭ، سەنىمدىلىكتىڭ، وبەكتيۆتىلىكتىڭ جوعارى ستاندارتتارىن، سونداي-اق كونكۋرستىق ىرىكتەۋ جۇيەسىنىڭ حالىقارالىق تالاپتارعا سايكەستىگىن راستايدى، – دەپ اتاپ ءوتتى قازاقستان استاناسىنداعى كونفەرەنتسياعا سەرتيفيكاتتى ءوزى تابىستاۋ ءۇشىن ارنايى كەلگەن RCEC ديرەكتورى ارنولد دج. براۋەر.

سونىمەن قاتار ءداستۇرلى كونفەرەنتسيا الاڭىندا NIS-ءتىڭ «قازاقستان حالقىنا» قورى جانە «Aitas KZ» حولدينگىمەن بىرىگىپ ىسكە اسىرىپ جاتقان «اۋىلدىق جەردەگى تىرەك مەكتەپتەردىڭ الەۋەتىن دامىتۋ» اۋقىمدى جوباسىنىڭ قاتىسۋشىلارىنا پاسپورت تابىستالدى.

2022 جىلعى حالىقارالىق كونفەرەنتسيانىڭ باستى مازمۇندىق سيپاتتاماسى – قازىرگى ءبىلىم بەرۋدەگى نەگىزگى ترەندتەرگە تاجىريبەلىك تۇرعىدان نازار اۋدارۋ.

العاش رەت مەكتەپكە دەيىنگى ءبىلىم بەرۋ ماسەلەلەرى، سونىڭ ىشىندە، ەڭ الدىمەن زەرتتەۋلەردىڭ ساپاسى جانە ۇزاقمەرزىمدى اسەرگە ارنالعان سەكتسيالىق وتىرىستاردىڭ تۇتاس سەرياسى ءوتتى. باس سپيكەرلەردىڭ قاتارىندا الەمگە تانىمال وكسفورد ۋنيۆەرسيتەتىنىڭ بالالاردى دامىتۋ جانە وقىتۋ پروفەسسورى يرام سيراج بولدى.

سۇرانىسقا يە سەكتسيالار قاتارىن بالالارعا قاۋىپسىز جانە جايلى ورتا – قالا، اۋىل، مەكتەپ قۇرۋعا باعىتتالعان ارنايى وتىرىستار تولىقتىردى. ەىدۇ ستراتەگيالىق تالداۋ ساراپشىسى فرانچەسكا گوتتشالك (فرانتسيا) حالىقارالىق كونفەرەنتسياعا «ءححى عاسىر بالالارى: تسيفرلىق داۋىردەگى ەموتسيونالدى ءال-اۋقات پەن ءبىلىم بەرۋ» اتتى وزەكتى زەرتتەۋىمەن كەلدى.

سونداي-اق كونفەرەنتسيا اياسىندا العاش رەت «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆانىڭ جاس اتا-انالارمەن كەزدەستى.

ەڭبەك جولىن جاڭادان باستاپ جاتقان پەداگوگتەردىڭ بىلىكتىلىگىن ارتتىرۋعا باعىتتالعان ارنايى سەكتسيا NIS-ءتىڭ تامىز ايىندا ۇيىمداستىرعان جاس مۇعالىمدەردىڭ رەسپۋبليكالىق فورۋمىنىڭ زاڭدى جالعاسىنا ۇلاستى.

پانەلدىك پىكىرتالاستار مەن سەكتسيالىق وتىرىستاردىڭ اۋقىمدى توپتاماسى مۇعالىمنىڭ كاسىبي كاپيتالىنا، ەڭ الدىمەن، تىكەلەي ونىڭ تاجىريبەسىن كورسەتەتىن «Action Research» جانە «Lesson Study» زەرتتەۋىنە ارنالدى. جاپونياداعى ۇلتتىق ءبىلىم بەرۋ ساياساتىن زەرتتەۋ ينستيتۋتىنىڭ جەتەكشى عىلىمي قىزمەتكەرى توشيا چيچيبۋ NIS پەداگوگيكالىق شەبەرلىك ورتالىعىمەن ۇزاق ۋاقىت بويى تابىستى جۇمىس ىستەپ كەلەدى، ول كونفەرەنتسيا الدىندا حالىقارالىق ساراپشى رەتىندە قازاقستاندىق ارىپتەستەردىڭ جوعارى ستاندارتتارىن اتاپ ءوتتى.

«سوزدەن – ىسكە» شەبەرلىك ساعاتتارىندا قازاقتىڭ ۇلى ۇستازدارىنىڭ شىعارماشىلىق مۇراسى باستى تاقىرىپقا اينالدى. ولاردىڭ تانىمال تۋىندىلارىنىڭ قازىرگى ءبىلىم وشاقتارىنداعى سۇرانىسى جايىندا «احمەت بايتۇرسىنۇلى ەڭبەكتەرىن باستاۋىش سىنىپتاردى وقىتۋدا قولدانۋ» اتتى شەبەرلىك ساعاتىن دايىنداعان ءبىلىم بەرۋ باعدارلامالارى ورتالىعىنىڭ وكىلدەرى قالامقاس بايتەنوۆا، پەريزات بيعازينا، جانات قاجىعاليەۆا باياندادى.

«SHARE» حالىقارالىق جوباسىن كەمبريدج ۋنيۆەرسيتەتىنىڭ پروفەسسورى كولين ماكلافلين تانىستىردى. ول – NIS-ءتىڭ بارلىق دەرلىك كونفەرەنتسياسىنا قاتىسىپ كەلە جاتقان باستى تۇلعالاردىڭ ءبىرى.

«ءبىز ءارتۇرلىمىز، بىراق مۇددەمىز ءبىر» پانەلدىك پىكىرتالاسىندا تاللينن ورتا مەكتەبىنىڭ وكىلدەرى، «Tamos Space School»، «ءبىلىم-يننوۆاتسيا»، «دارا» بيزنەس اكادەمياسىنىڭ جانە وتاندىق مەكتەپتەر مەن بالاباقشالاردىڭ باسشىلارى ءسوز سويلەدى.

ەلورداداعى زياتكەرلىك مەكتەپ وقۋشىسى، «Nomadteens» نەگىزىن قالاۋشىسى ءجانيا كەڭەس كونفەرەنتسيا مىنبەرىنەن قازىرگى ءجاسوسپىرىمدى نە تولعاندىراتىنى تۋرالى الدىڭعى بۋىن وكىلدەرىنە ايتىپ بەردى. «وقۋشىلاردىڭ قارەكەتشەلدىگى» اتتى ەڭ قىزىقتى سەكتسيادا «ءبىز الەمدى جاقسى جاققا وزگەرتەمىز!» دەپ نەگىزگى يدەيانى وزدەرى انىقتاعان مەكتەپ وقۋشىلارىنىڭ شىنايى داۋىستارى ەستىلدى. موتيۆاتسيالىق پوزيتيۆ تاقىرىبىن زياتكەرلىك مەكتەپتەر تۇلەكتەرى قاۋىمداستىعى «Alumni NIS» جالعاستىردى. ولار وليمپيادالىق قوزعالىستىڭ ۇزدىك كەيستەرىن، الەۋمەتتىك جەلىلەر ارقىلى ءبىلىم بەرۋ ۇدەرىستەرىنە قاتىسۋ جانە باسقا دا جوبالاردى تانىستىردى.

اۆتوگراف-سەسسيادا كونفەرەنتسيا قاتىسۋشىلارى قازىرگى قازاق بالالار ادەبيەتىنىڭ ۇزدىك شىعارمالارىن تۋدىرعان بەلگىلى وتاندىق جازۋشىلار مەن سۋرەتشىلەر – ساۋران قاستەەۆ، اسەل يمايو، التاي اسقار، مەيىرحان جىلقىباي، سەرىكبول حاسان، سايات قامشىگەر، رۇستەم ساۋىتباي، ولگا گۋميروۆا، زاۋرە تورەحانمەن كەزدەستى.

سونداي-اق قولتاڭبا سەسسياسىندا نازارباەۆ ۋنيۆەرسيتەتىنىڭ جوعارى ءبىلىم بەرۋ مەكتەبى دەكانى ايدا ساعىنتاەۆا باستاعان اۆتورلار توبىنىڭ «تەوريا، ادىستەر جانە تاجىريبەلەر» جانە نازارباەۆ ۋنيۆەرسيتەتىنىڭ دوتسەنتى دۋيشون شاماتوۆتىڭ «بىلىمگە قۇشتارلىق» كىتاپتارى ۇسىنىلدى.

ەكىنشى كۇنى كۇلاش ءشامشيدينوۆا كونگرەسس-ورتالىققا تىكەلەي اقوردادان كەلدى. ونى ايتۋلى جاڭا ناگرادامەن ءبىرىنشى بولىپ كونفەرەنتسيا دەلەگاتتارى قۇتتىقتادى. رەسپۋبليكا كۇنى قارساڭىندا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش شامشيدينوۆاعا «قازاقستاننىڭ ەڭبەك سىڭىرگەن ۇستازى» قۇرمەتتى اتاعى بەرىلىپ، مەدالدى كۇلاش نوعاتايقىزىنا ەل پرەزيدەنتى قاسىم-جومارت توقاەۆ تابىستادى.

وسى كۇنى ءبىلىم بەرۋ باعدارلامالارى ورتالىعىنىڭ ديرەكتورى جانار ءابدىلدينا «ەرەن ەڭبەگى ءۇشىن» مەدالىمەن، ەلورداداعى فيزيكا-ماتەماتيكا باعىتىنداعى NIS-ءتىڭ قوسىمشا ءبىلىم بەرۋ پەداگوگى ايتجان توقتاعان «قۇرمەت» وردەنىمەن ماراپاتتالدى.

ون جىل ىشىندە ءداستۇرلى NIS كونفەرەنتسياسى الەمدىك ءبىلىم بەرۋدەگى جاھاندىق ترەندتەر بويىنشا ستراتەگيالىق شەشىمدەردىڭ تالداناتىن جانە قابىلداناتىن ەڭ بەدەلدى حالىقارالىق الاڭداردىڭ ءبىرى رەتىندە تانىلدى.

«نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ «وقىتۋ، تاربيەلەۋ، جاقسى كورۋ: قازاقستانداعى بالالار جىلى» اتتى حالىقارالىق عىلىمي-تاجىريبەلىك كونفەرەنتسياسى استانا قالاسى اكىمدىگى، Bilim Media Group, «Aitas KZ» حولدينگى، «Fizmat Endowment Fund» قوعامدىق قورى جانە «بازيسنىي ماگازين» جشس-مەن سەرىكتەستىكتە دايىندالدى.

 

پىكىرلەر