قازاقتىڭ جازۋشى-دراماتۋرگى، قر مەملەكەتتىك سىيلىعىنىڭ لاۋرەاتى دۋلات يسابەكوۆتىڭ شىڭعىسحاننىڭ جارى بورتەگە ارنالعان پەساسىنىڭ الەمدىك تۇساۋكەسەرى لوندوندا ءوتتى. بۇل تۋرالى قازاقستاننىڭ ۇلىبريتانياداعى ەلشىلىگى حابارلادى، دەپ جازادى "ادىرنا" ۇلتتىق پورتالى.
"قازاقستاننىڭ ۇلىبريتانياداعى ەلشىلىگىنىڭ ۇيىمداستىرۋىمەن، ەۋرازيالىق شىعارماشىلىق گيلدياسىنىڭ (لوندون) قولداۋىمەن «بورتە، الەم پاتشايىمى» قويىلىمىنىڭ حالىقارالىق تۇساۋكەسەرى ءوتتى. سپەكتاكل اعىمداعى جىلدىڭ جەلتوقسان ايىندا مەلبۋرن قالاسىندا (اۆستراليا) كورسەتىلەدى، ال كەلەسى جىلى ۇيىمداستىرۋشىلار ترۋپپانىڭ بۇل سپەكتاكلىمەن ۇلىبريتانيا مەن اقش-قا گاسترولدىك ساپارىن جوسپارلاپ وتىر.
دۋلات يسابەكوۆ قازاق ادەبيەتىنىڭ اقيىق كلاسسيگى سانالادى، ونىڭ پەسالارى ەۋروپا مەن ازيادا الەمنىڭ كوپتەگەن تىلدەرىندە قويىلىپ، ال كىتاپتارى جارتى عاسىردان استام ۋاقىت بويى سىنشىلار مەن وقىرمانداردىڭ مويىنداۋىنا يە بولۋدا. عالامدى دۇرلىكتىرگەن شىڭعىس حاننىڭ ومىرىندە ۇلكەن ءرول اتقارعان دانا ايەل بورتە تۋرالى وسى قويىلىمدا ونىڭ قيىن ءومىرى مەن ۇلى جاۋلاۋشىنىڭ تاعدىرىنداعى شەشۋشى ءرولى باياندالادى»، - دەپ جازىلعان حابارلامادا.
سپەكتاكلدى كلاسسيكالىق پەسانى مۋزىكالىق فراگمەنتتەرى بار سپەكتاكلگە اينالدىرعان ايگىلى اۆستراليالىق رەجيسسەر ءارى كومپوزيتور ۋوررەن ۋيللس قويۋدا.
مەلبۋرنداعى قويىلىمعا كورنەكتى اۆستراليالىق مادەنيەت جانە ونەر قايراتكەرلەرى، سونداي-اق الەۋمەتتىك ينكليۋزيۆتى جاس الەم حورى قاتىسادى.
جوبا ەۋرازيا كەڭىستىگىندەگى حالىقتاردىڭ ۇلتتىق مادەنيەتىن ىلگەرىلەتۋ ماقساتىن كوزدەيتىن بريتاندىق قوعامدىق ۇيىم بولىپ تابىلاتىن ەۋرازيالىق شىعارماشىلىق گيلديانىڭ باستاماسىمەن قولعا الىنۋدا. اتالاعان ۇيىم 2015 جىلدان بەرى الەمنىڭ كوپتەگەن ەلدەرىندە حالىقارالىق جوبالاردى ءساتتى جۇزەگە اسىرىپ كەلەدى.
"ادىرنا" ۇلتتىق پورتالى
