16 جاستاعى يراندىق وقۋشى اسرا پاناحي ۇكىمەتتى ماقتاپ، ءان ايتۋدان باس تارتقانى ءۇشىن ءوز مەكتەبىندە قاۋىپسىزدىك كۇشتەرىنىڭ سوققىسىنان قازا تاپتى. بۇل تۋرالى "مەديازونا" باسىلىمى حابارلادى، دەپ جازادى "ادىرنا" ۇلتتىق پورتالى.
قايعىلى جاعداي قازاننىڭ 13-ءى كۇنى بولعان.
«Iran International» باسىلىمىنىڭ حابارلاۋىنشا، سول كۇنى پوليتسيا جاساقتارى نارازىلىق تانىتقان يراننىڭ اردەبيل قالاسىنداعى قىزدار مەكتەپتەرىنىڭ بىرىنە كەلىپ، وقۋشىلاردىڭ ۇكىمەتتى جاقتايتىن شەرۋىنە قاتىسۋىن تالاپ ەتكەن. ميتينگكە قاتىسۋشىلار يراننىڭ ەڭ جوعارى كوسەمى اياتوللا ءالي حامەنەيدى ماداقتايتىن ۇگىت-ناسيحات ءانىن ايتۋى كەرەك ەدى.
وقۋشىلار باعىنۋدان باس تارتقاننان كەيىن پوليتسەيلەر قىزداردى اياۋسىز ۇرا باستاعان. سوققى سالدارىنان 10 وقۋشى قىز اۋرۋحاناعا تۇسكەن. كەيىن ولاردىڭ ءبىرى اسرا پاناحي قايتىس بولدى. سونىمەن قاتار سوققىدان كەيىن پوليتسەيلەر بىرنەشە قىزدى تۇتقىنداپ، بەلگىسىز باعىتقا الىپ كەتكەن.
مەكتەپ وقۋشىسى ولتىرىلگەننەن كەيىن اردەبيلدە نارازىلىقتار قايتادان كۇشەيە باستادى.
16 قازاندا Twitter-دە جاريالانعان بەينەجازبادا نارازىلىق بىلدىرۋشىلەردىڭ پوليتسيا قىزمەتكەرلەرىنە تاس لاقتىرىپ، كولىك دوڭگەلەكتەرىن ورتەپ جاتقاندارىن كورۋگە بولادى. ولار: «پولكوۆنيك! بۇگىن مەنىڭ قىزىم، ال ەرتەڭ سەنىكى!»، - دەپ ءوز نارازىلىقتارىن بىلدىرۋدە.
"ادىرنا" ۇلتتىق پورتالى
