ماسكەۋدە ءىشىنارا موبيليزاتسيا اياقتالدى. بۇل تۋرالى رەسەي استاناسىنىڭ مەرى سەرگەي سوبيانين حابارلادى، دەپ جازادى "ادىرنا" ۇلتتىق پورتالى.
"ماسكەۋ قالاسىنىڭ اسكەري كوميسسارىنىڭ اقپاراتى بويىنشا، پرەزيدەنتتىڭ جارلىعى مەن قورعانىس مينيسترلىگىنىڭ تاپسىرماسى نەگىزىندە بەلگىلەنگەن ءىشىنارا موبيليزاتسيا جونىندەگى مىندەتتەر تولىق كولەمدە ورىندالدى", — دەپ جازدى سوبيانين ءوز بلوگىندا.
ونىڭ ايتۋىنشا، قالادا جۇمىلدىرىلعانداردى جيناۋ پۋنكتتەرى 2022 جىلعى 17 قازاندا ساعات 14:00-دە جابىلدى. بۇل رەتتە جۇمىلدىرۋ پروتسەسىندە تۇرعىلىقتى جەرى مەن كاسىپورىندارىنا جىبەرىلگەن شاقىرتۋلار ءوز كۇشىن جويدى.
اكىم اتاپ وتكەندەي، جۇمىلدىرۋ مىڭداعان ماسكەۋ وتباسىلارى ءۇشىن سىناق بولدى.
"دەگەنمەن، ءىشىنارا موبيليزاتسيا مىندەتتەرىن ورىنداۋ، ەڭ الدىمەن، ماسكەۋلىكتەردىڭ جاۋاپكەرشىلىگى مەن ءپاتريوتيزمىنىڭ ارقاسىندا مۇمكىن بولدى", - دەيدى سوبيانين.
"ادىرنا" ۇلتتىق پورتالى
