Ata-analardyń óz balasyn kúndelikti erkeletýin endi muǵalimder qadaǵalaıdy

2749
Adyrna.kz Telegram
Jambyl oblysy ákimdiginiń bilim basqarmasy muǵalimderge kúndelikti "Erkeletý saǵatyn" ótkizýdi buıyrdy. "Erkeletý saǵatynda" muǵalimder áleýmettik jeli arqyly ata-analardyń óz balasyn kúndelikti erkeletýin qadaǵalap, oblys ákimdigine málimet berýi tıis, dep habarlaıdy "Adyrna" ulttyq portaly. 
Erekshe "Erkeletý saǵaty" jaıly qoǵam belsendisi Arnat Baıseıitov jazdy.
- Mynaý ne masqara endi, Jambyl oblysy ákimdigi? “Erkeletý saǵaty” nesi taǵy? Muǵalimderdiń jalaqysyn sál kóterip, jumysty úıip tógip berýdi doǵarý qajet dep esepteımin. Muǵalim de adam! Onyń jeke ómiri joq pa? Eger bala meıirim kórmeı júrse, oǵan basqa organ aralassyn. Muǵalim - bilim beretin maman, - dep jazdy avtor.
Arnat Baıseıitovtiń suraǵyna jaýap bergen Jambyl oblysynyń bilim basqarmasy atalmysh bastamanyń otbasylyq qundylyqtardy nyǵaıtýmen, bilim salasy men tárbıe jumysyn ushtastyrýmen baılanysty ekenin jetkizdi.
- Qazirgi tańda bilim salasyndaǵy tárbıe jumysy tárbıeniń tujyrymdamalyq negizderine sáıkes qurylǵan baǵyttar boıynsha júzege asyrylýda. Joǵaryda kórsetilgen hat kámeletke tolmaǵandar arasynda túrli keleńsiz oqıǵalardyń aldyn alý úshin ata-analarmen baılanys ornatyp, otbasylyq tárbıeniń mańyzdy ekendigin eskerý maqsatynda joldanǵan. Degenmen, joldanǵan hattyń maǵynalyq turǵyda durys qurylmaýyna baılanysty jaýapty mamanǵa qyzmettik tergep-tekserý júrgizilip, tártiptik shara qoldanylady. Sonymen qatar, bilim basqarmasy tarapynan pedagogtardy jumystan tys ýaqytta jumysqa tartý týraly tapsyrma berilmegendigin jáne artyq jumys mindettelmeıtinin habarlaımyz, - dep habarlady bilim basqarmasy ókilderi.
Qoǵamdyq pikirtalas týdyrǵan málimdemege qatysty syn aıtyp jatqandar kóp.
"Qaıtadan qaǵazbastylyq... Ótirik ıfrlar... kórsetetin bolady. Artyq jumystan muǵalimdi bosatty emes pe? Muǵalim oqýshyǵa bilim berýi kerek, al kúndelikti kóńil-kúıi úshin aldymen ata-ana jaýapty. Ne bolsa sony muǵalimderdiń arqasyna arta berý durys emes dep oılaımyn" dep jazdy jeli qoldanýshylary.

"Adyrna" ulttyq portaly

Pikirler
Uqsas jańalyqtar