بولمىسى مەن تىلەگى، ارمانى مەن ماقساتى ورتاق ارنادا توعىسا الاتىن جاندار – الەمدى مەيىرىمگە، وتباسىن باقىتقا، ادامزاتتى يگىلىككە باستايتىن انالار قاۋىمى. بەيبىتشىلىك بەسىگىن تەربەتىپ، جاس وسكىنگە ومىرشەڭدىگى مول ۇلاعاتتى تاربيە ءسىڭىرىپ، ەرەن ەڭبەك ۇلگىسىن كورسەتىپ جۇرگەن انالار الاشتىڭ اناسى اتانعان سىردىڭ تورىندەگى «ەتنواۋىل» كەشەنىندە باس قوستى. شىنايى ىلتيپاتقا يە، ادالدىق پەن ەڭبەكقورلىقتى جانىنا سەرىك ەتكەن جانى ءازيز، جۇرەگى ىقىلاسقا تولى اسىل انالاردىڭ قاتارىندا ەڭبەكشى اۋىل ايەلدەرى بار. اتاپ ايتقاندا، ايماققا قاراستى بارلىق اۋداننان كۇرىششى، تازالىقشى، حات تاسۋشى، كۇزەتشى، كومباينشى انالار ماراپات تورىنەن كورىنىپ، ۇلتتىعىمىزدى ۇلىقتايتىن ءان ايتتى.
15 قازان – حالىقارالىق اۋىل ايەلدەرى كۇنى مەن 25 قازان – رەسپۋبليكا كۇنى قارساڭىندا ۇيىمداستىرىلعان شارا بارىسىندا ەرەكشە ەڭبەك ايەلدەرىنە قۇرمەت كورسەتىلىپ، فوتوسەسسيا ۇيىمداستىرىلدى. وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى وبلىستىق كوميسسيانىڭ ۇيىمداستىرۋىمەن وتكەن قاراپايىم ەڭبەكشى اۋىل ايەلدەرىنىڭ كەزدەسۋى اياسىندا «سىر انالارى» قوعامدىق بىرلەستىگىنىڭ ءتورايىمى نۇرساۋلە مۇساەۆا «تۇلعالىق دامۋ ترەنينگىن» وتكىزدى.
- جالپى وبلىس تۇرعىندارىنىڭ 49,8 پايىزى ايەلدەر بولسا، ونىڭ 54,5 پايىزى اۋىلدىق جەرلەردە تۇرادى. وبلىسىمىزدا 141 مىڭنان اسا وتباسى بار. ونىڭ ىشىندە 48 مىڭنان استامى – كوپبالالى انالار. التىن قۇرساقتى انالارىمىزدىڭ 17 مىڭعا جۋىعى – «التىن القا» مەن «كۇمىس القا» يەگەرى، - دەدى وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى وبلىستىق كوميسسيانىڭ حاتشىسى قالامقاس كاريموۆا.
قالانىڭ قاۋىرت جۇمىسى مەن دالانىڭ دامىلسىز تىرلىگىنەن قۋات الاتىن ارداقتى انالار قاۋىمىنا وبلىس اكىمىنىڭ ورىنباسارى ن.ساقتاعانوۆتىڭ العىس حاتى تابىستالدى. سونداي-اق، باعالى سىيلىقتار جانە سەرتيفيكاتتار بەرىلدى.
