Bolmysy men tilegi, armany men maqsaty ortaq arnada toǵysa alatyn jandar – álemdi meıirimge, otbasyn baqytqa, adamzatty ıgilikke bastaıtyn analar qaýymy. Beıbitshilik besigin terbetip, jas óskinge ómirsheńdigi mol ulaǵatty tárbıe sińirip, eren eńbek úlgisin kórsetip júrgen analar Alashtyń anasy atanǵan Syrdyń tórindegi «Etnoaýyl» kesheninde bas qosty. Shynaıy iltıpatqa ıe, adaldyq pen eńbekqorlyqty janyna serik etken jany ázız, júregi yqylasqa toly asyl analardyń qatarynda eńbekshi aýyl áıelderi bar. Atap aıtqanda, aımaqqa qarasty barlyq aýdannan kúrishshi, tazalyqshy, hat tasýshy, kúzetshi, kombaınshy analar marapat tórinen kórinip, ulttyǵymyzdy ulyqtaıtyn án aıtty.
15 qazan – Halyqaralyq aýyl áıelderi kúni men 25 qazan – Respýblıka kúni qarsańynda uıymdastyrylǵan shara barysynda erekshe eńbek áıelderine qurmet kórsetilip, fotosessııa uıymdastyryldy. Oblys ákimi janyndaǵy áıelder isteri jáne otbasylyq-demografııalyq saıasat jónindegi oblystyq komıssııanyń uıymdastyrýymen ótken qarapaıym eńbekshi aýyl áıelderiniń kezdesýi aıasynda «Syr analary» qoǵamdyq birlestiginiń tóraıymy Nursáýle Musaeva «Tulǵalyq damý trenıngin» ótkizdi.
- Jalpy oblys turǵyndarynyń 49,8 paıyzy áıelder bolsa, onyń 54,5 paıyzy aýyldyq jerlerde turady. Oblysymyzda 141 myńnan asa otbasy bar. Onyń ishinde 48 myńnan astamy – kópbalaly analar. Altyn qursaqty analarymyzdyń 17 myńǵa jýyǵy – «Altyn alqa» men «Kúmis alqa» ıegeri, - dedi Oblys ákimi janyndaǵy áıelder isteri jáne otbasylyq-demografııalyq saıasat jónindegi oblystyq komıssııanyń hatshysy Qalamqas Karımova.
Qalanyń qaýyrt jumysy men dalanyń damylsyz tirliginen qýat alatyn ardaqty analar qaýymyna oblys ákiminiń orynbasary N.Saqtaǵanovtyń Alǵys haty tabystaldy. Sondaı-aq, baǵaly syılyqtar jáne sertıfıkattar berildi.
