نازارباەۆ زياتكەرلىك مەكتەپتەرىندە ۇلتتىق «توعىزقۇمالاق» سپورتتىق جارىس ءوتتى. 94 سپورتشى باقتارىن سىنادى. تالدىقورعان قالاسىنداعى نازارباەۆ زياتكەرلىك مەكتەبىنىڭ باستاۋىش سىنىپ وقۋشىلارى كوماندالىق ەسەپپەن جەڭىمپاز اتاندى.
زياتكەرلىك مەكتەبىنىڭ نامىسىن 4-12 سىنىپ وقۋشىلارى قورعادى. ەڭ جاس قاتىسۋشى 4-سىنىپ وقۋشىسى اينەل قايرات.
وتكەن جىلى جەلىلىك ءتۋرنيردىڭ قورىتىندىسى بويىنشا اينەل 2 ورىندى جەڭىپ الدى، بيىل دا 2 ورىندى يەلەندى.
6-سىنىپ وقۋشىسى ابىلايحان تىنىشتىقباي ءۇشىن توعىزقۇمالاق – سالماقتى سپورت ءتۇرى. ويتكەنى، ول زياتكەرلىك ويىنمەن مەكتەپتە عانا ەمەس، ۇيىرمەگە دە قاتىسادى. ابىلايحان 2019 جىلى جەلىلىك تۋرنيردەگى العاشقى جەڭىسىنە قول جەتكىزدى. وسى جولىدا ابىلايحان 1 ورىن الىپ، جەڭىمپاز اتانىپ وتىر.
مەكتەپتەگى توعىزقۇمالاقتان باپكەرىمنىڭ ارقاسىندا سپورتتا عانا ەمەس، ماتەماتيكادان دا جاقسى جەتىستىكتەرگە جەتىپ ءجۇرمىن. ءۇش جىل بويى ءتىپتى قالالىق، وبلىستىق بايقاۋلارعا دا قاتىسا الدىم. جەڭىسكە جەتكەن سايىن ءوزىمدى سەنىمدىرەك، كۇشتى سەزىنەمىن، - دەيدى 6-سىنىپ وقۋشىسى ابىلايحانا تىنىشتىقباي ءوز سۇحباتىندا.
7-سىنىپ وقۋشىسى ىڭكار مۇراتبەكقىزى العاش رەت باعىن سىناپ وتىر.
ىڭكار قازاقتىڭ ۇلتتىق ويىنى «توعىزقۇمالاقپەن» 7 جاسىنان باستاپ اينالىسا باستاعان. جەتىستىكتەر قازىناسىندا وبلىستىق، قالالىق بايقاۋلاردا جۇلدەلى ورىندار بار.
توعىزقۇمالاق – جاي عانا حوببي ەمەس، ول – ماتەماتيكا، تەز ساناۋ، شەشىم قابىلداۋ داعدىسى. وسىنىڭ ءبارى ساباقتا عانا ەمەس، كۇندەلىكتى ومىردە دە كومەگىن تيگىزەدى، – دەيدى 7-سىنىپ وقۋشىسى ىڭكار مۇراتبەكقىزى.
ويىن شۆەيتساريالىق جۇيە بويىنشا جەتى تۋردان تۇردى، قاتىسۋشىلار جەكەلەي دە، كوماندالىق جارىستا دا باق سىناستى.
بۇگىن ءۇش كۇنگە سوزىلعان توعىزقۇمالاق سپارتاكياداسى ءوز مارەسىنە جەتتى.
تورەشىلەر كوميسسياسىندا قازىلار القاسىنىڭ ءبىرى تالدىقورعان سپورت مەكتەبىنىڭ توعىزقۇمالاق ءبولىمىنىڭ جاتتىقتىرۋشىسى باۋىرجان شۋرين وتىردى.
ۇلتتىق ويىندار – ءبىزدىڭ قاسيەتتى بايلىعىمىز. قازاقتىڭ ۇلتتىق سپورتىنىڭ قاي ءتۇرى بولماسىن جاستاردى توزىمدىلىك پەن شەبەرلىككە، باتىلدىققا، ەڭ باستىسى ۇلتتىق مادەنيەتكە دەگەن سۇيىسپەنشىلىككە، پاتريوتتىق سەزىمگە تاربيەلەۋگە باعىتتالعانىن اڭعارۋ قيىن ەمەس. دەگەنمەن، بۇگىندە ءبىز ۇلتتىق ويىنداردىڭ ونسىز دا تانىمال تەحنولوگيالىق كومپيۋتەرلىك ويىنداردى ىعىستىرا باستاعانىن بايقاۋعا ءماجبۇرمىز. جىل سايىن جۇزدەگەن جاس زيالى قاۋىم قاتىساتىن نزم-دە توعىزقۇمالاق سپارتاكياداسى ءداستۇرلى ءىس-شاراعا اينالعانى مەنى قاتتى قۋانتادى»، - دەيدى قازىلار القاسىنىڭ مۇشەسى باۋىرجان شۋرين.
