جەر بار ما سارىارقادا ۇلىتاۋداي،
ءشوبى ماي، ىشسەڭ سۋسىن، سۋى بالداي.
الابى كۇندىك جەردەن كوز تارتادى،
باسىنا بۇلت اينالىپ، شوككەن نارداي.
شىعىستا – باياناۋىل، قارقارالى،
ۇلىتاۋ – التىن بەسىك ارقاداعى.
اتايدى ۇلىتاۋدى ەسكى تاريح،
ءۇش ءجۇزدىڭ ەنشى الىپ تارقاعانى.
ۇلىتاۋ – ەل قونىسى، جەردىڭ قۇتى،
ومىردە بولعان ەمەس قىستىڭ جۇتى.
بۇل تاۋدىڭ ماڭايىندا بولعان ەلدى
دەيتۇعىن «ەدىگەنىڭ مايلى جۇرتى».
سول تاۋدىڭ شىققانداي بوپ شاراسىنان،
سۋ ءىشىپ ءمولدىر بۇلاق جاعاسىنان،
جايلاۋدا قاپتاپ جاتقان قالىڭ مالدىڭ
جول تاۋىپ جۇرە المايسىڭ اراسىنان.
ءوڭىرىن جىلانشىقتىڭ باسا-كوكتەي،
ەركەلەپ قورعانتاس تۇر جاس بوبەكتەي.
بۇلدىراپ ەدىگەنىڭ ەتەگىمەن،
ىرعايلى اعىپ جاتىر ويعا بەتتەي.
سىڭعىرلاپ اسەم تاۋدىڭ كۇمىس سۋى،
جەر بەتىن گۇلدەندىرگەن بايشەشەكتەي.
ءبىر كەلىپ وسى تاۋعا تىنىعۋعا،
اقىنىم، جۇرگەن جوق پا قولىڭ جەتپەي؟
كىشىتاۋ كىر جۋىتپاي دەنەسىنە،
قول سوزىپ باقىتتى ءومىر كەلەسىگە.
ەڭكەيىپ ۇلىتاۋعا باس يەدى،
قۇمارتقان قۇلىنداي بوپ ەنەسىنە.
ابىلاي وردا تىككەن سارىقوپا
بويىندا شىعىرلىنىڭ، بىلەسىڭ بە؟
ايىرتاۋ، قىزىلساي مەن سارىبۇلاق،
ەجەلدەن كونە جەرلەر، ەلگە تۇراق.
اقشيدىڭ جاۋقازىندى جىلعاسىنان
مىڭ-مىڭداپ جامىراعان قويىم شۋلاپ.
قاق جارىپ يتەن شىڭىن تاس بەكىتىپ،
ءتورت كولحوز توعان سالدى باسىن قۇراپ.
سول تاۋدىڭ الپىس ەكى سالاسىنان
توعانعا قۇيىپ جاتىر سۋ زىرقىراپ.
سىيادى مەن ماقتانسام جاراسىمعا،
مال سىيماي ۇلىتاۋدىڭ شاراسىنا،
وتارلاپ وتىز مىڭ باس مالىم كەتتى
تورعايدىڭ ەسىلمەنەن جاعاسىنا!
نياز وجانۇلى 1882
بابا تاۋىم – باق تاۋىم. ولەڭدەر.
قۇراست.: ت. بۇكىروۆ، ق. قۇرمانسەيىت.
