Jer bar ma Saryarqada Ulytaýdaı,
Shóbi maı, ishseń sýsyn, sýy baldaı.
Alaby kúndik jerden kóz tartady,
Basyna bult aınalyp, shókken nardaı.
Shyǵysta – Baıanaýyl, Qarqaraly,
Ulytaý – altyn besik Arqadaǵy.
Ataıdy Ulytaýdy eski tarıh,
Úsh júzdiń enshi alyp tarqaǵany.
Ulytaý – el qonysy, jerdiń quty,
Ómirde bolǵan emes qystyń juty.
Bul taýdyń mańaıynda bolǵan eldi
Deıtuǵyn «Edigeniń maıly jurty».
Sol taýdyń shyqqandaı bop sharasynan,
Sý iship móldir bulaq jaǵasynan,
Jaılaýda qaptap jatqan qalyń maldyń
Jol taýyp júre almaısyń arasynan.
Óńirin Jylanshyqtyń basa-kókteı,
Erkelep Qorǵantas tur jas bóbekteı.
Buldyrap Edigeniń etegimen,
Yrǵaıly aǵyp jatyr oıǵa betteı.
Syńǵyrlap ásem taýdyń kúmis sýy,
Jer betin gúldendirgen báısheshekteı.
Bir kelip osy taýǵa tynyǵýǵa,
Aqynym, júrgen joq pa qolyń jetpeı?
Kishitaý kir jýytpaı denesine,
Qol sozyp baqytty ómir kelesige.
Eńkeıip Ulytaýǵa bas ıedi,
Qumartqan qulyndaı bop enesine.
Abylaı orda tikken Saryqopa
Boıynda Shyǵyrlynyń, bilesiń be?
Aıyrtaý, Qyzylsaı men Sarybulaq,
Ejelden kóne jerler, elge turaq.
Aqshıdiń jaýqazyndy jylǵasynan
Myń-myńdap jamyraǵan qoıym shýlap.
Qaq jaryp Iten shyńyn tas bekitip,
Tórt kolhoz toǵan saldy basyn qurap.
Sol taýdyń alpys eki salasynan
Toǵanǵa quıyp jatyr sý zyrqyrap.
Syıady men maqtansam jarasymǵa,
Mal syımaı Ulytaýdyń sharasyna,
Otarlap otyz myń bas malym ketti
Torǵaıdyń Esilmenen jaǵasyna!
Nııaz OJANULY 1882
Baba taýym – Baq taýym. Óleńder.
Qurast.: T. Búkirov, Q. Qurmanseıit.