استانا قالاسىندا جاڭا مەشىت بوي كوتەردى. بۇل تۋرالى قازاقستان ءمۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى ايتتى، دەپ حابارلايدى «ادىرنا» ءتىلشىسى.
«قاسيەتتى جۇما كۇنىندە، ارداقتى پايعامبارىمىز مۇحاممەدتىڭ (وعان اللانىڭ سالاۋاتى مەن سالەمى بولسىن) دۇنيەگە كەلگەن قاسيەتتى ءماۋلىت ايىندا استانا قالاسى بويىنشا 14-مەشىت ەسىگىن ايقارا اشىپ، جاماعاتتىڭ يگىلىگىنە بەرىلىپ وتىر. بۇل – كوپتەن كۇتكەن قۋانىش. ويتكەنى، وسى مەشىتتىڭ اشىلۋى بىرنەشە جىلدارعا سوزىلدى. الايدا اللا تاعالانىڭ قالاۋىمەن ساۋلەتى مەن ءسانى جاراسقان مەشىت بۇگىن حالىق يگىلىگىنە بەرىلدى. جاڭا قۇلشىلىق ءۇيى قۇتتى بولسىن.
مەشىتتى سالعان ازاماتتارعا ايرىقشا العىسىمدى بىلدىرەمىن.
قالانىڭ كوكتال شاعىن اۋدانىندا اشىلعان جاڭا مەشىتتە ءبىر مەزەتتە 500 ادام قۇلشىلىعىن وتەي الادى»،—دەدى ول.
