قازاق تىلىندە اقپارات تاراتۋدى سىرتقا ىسىرىپ، انا تىلىندە سويلەۋگە قورسىنعان سپورتشىلاردىڭ قىلىعى كوپشىلىكتى قاپالاندىردى. بۇل تۋرالى جۋرناليست اسلان قاجەنوۆ جازدى، دەپ حابارلايدى "ادىرنا" ۇلتتىق پورتالى.
"نيزكي پوستۋپوك جاساپ كەلدىم... بۇگىن وتاندىق سپورتتىڭ ىعاي مەن سىعايلارى ەلوردادا باس قوسىپ، بىرلەسكەن بريفينگ وتكىزدى. قاسىم-جومارت توقاەۆتىڭ پرەزيدەنت سايلاۋىنا ءتۇسۋىن قولداۋ ماقساتىندا. مەنىڭ اشىندىرعانى - بىلاي قاراساڭ جينالعانداردىڭ 98 پروتسەنتى قازاق. بىراق، جيىن 98 پروتسەنت ورىسشا ءوتتى. ەڭ سوڭىندا دانيار ەلەۋسىنوۆ قانا قازاقشا قىسقاشا العىسىن ايتتى. ال، نەگىزگى بايانداما باسقا تىلدە. اسىرەسە، ۇلگى تۇتىپ جۇرگەن اعالارىمىز قينالىپ تۇرىپ ورىسشا سايراعاندا، كىرەرگە تەسىك تاپپاي قالدىم. جارايدى، جيىن وسىلاي ءوتتى، ءبىتتى، كەتتى", - دەپ حابارلادى جۋرناليست.
كەيىننەن اسلان قاجەنوۆ وقيعانىڭ جەلىسىن وقىرماندارىنا ءتۇسىندىردى.
"ارتىنان «نەگە قازاقشا اقپارات بەرمەيسىزدەر؟» دەپ، ۇيىمداستىرۋشىلاردىڭ مازاسىن الىپ جۇرسەم، بۇرىشتا وتىرعان يليا يلين «سەنىڭ جاساپ جۇرگەنىڭ نيزكي پوستۋپوك» دەيدى. انا جەردە قان باسقا شاپتى. مەن ءوز ەلىمدە ءوز تىلىمدە اقپارات الا الماي اۋزىم ۇرىلىپ تۇرعاندا ماقتاۋلى اۋىر اتلەتىمىز وسىلاي سوزبەن پەرىپ قالدى. نە دەگەن سورلىمىز؟ جالپى، وتاندىق سپورتتا بۇنداي جاعداي ءجيى كەزدەسەدى. شىدام شەگىنە جەتكەسىن شىرىلداپ جاتىرمىن. ءپرينتسيپتى تۇردە قازاقشا سويلەمەي، «ال، نە ىستەي الاسىڭ؟» دەگەن كەزدەر بولدى. اناۋ-مىناۋ سپورتشىلار ەمەس. ەل بيۋدجەتىنەن جىل سايىن جۇزدەگەن ميلليون تەڭگە بولىنەتىن، سولار ۋايىمداماسىن، سولار قينالماسىن دەپ، بارلىق جاعدايى جاسالاتىن سپورتشىلار. ولاردى بۇكىل حالىق قولداپ-قولپاشتايدى. جەتىستىكتەرىنە قۋانادى. بىراق، مىنا جاقتا نە بىقسىتىپ جۇرەندەرىن بىلمەيدى عوي. بىلسە، «ايىرىپ» جىبەرەتىن ەدى. تىلگە تۇكىرگەنى ءبىر مىسال. ودان بولەك ءانۇراندى جاتقا بىلمەيدى. جارىستارعا كوك بايراعىمىزدى اپارمايدى. كەيىن سولاردى تالاپ ەتسەڭ، نيزكي پوستۋپوك جاساعان بولىپ شىعاسىڭ..." - دەدى اشىنعان اۆتور.
