قازىرگى تاڭدا ەڭ ماڭىزدى ماسەلە – رەسەيمەن شەكاراداعى قازاقستان ازاماتتارىن قايتارۋ. بۇل ماسەلە بقو اكىمدىگىندە شەكارا ماسەلەلەرى جونىندەگى ۇيلەستىرۋ كەڭەسىندە تالقىلاندى.
وڭىر باسشىسى عالي ەسقاليەۆ رەسەي شەكارا ۆەدومستۆوسىمەن بىرگە شەكارا قىزمەتى دەپارتامەنتىنە اتالمىش ماسەلەنى شەشۋدى تاپسىردى. سونداي-اق، وبلىس اكىمى وسى پروبلەمانى شەشۋ بويىنشا قازاقستان ۇكىمەتىنە ۇسىنىستار جىبەردى، ولار قازىردىڭ وزىندە جەدەل تۇردە قارالۋدا.
تاعى ءبىر ماڭىزدى مىندەت بقو اۋماعىندا قالعان رف ازاماتتارىن ەسەپكە الۋدى قامتاماسىز ەتۋ بولىپ تابىلادى. وبلىس اكىمى شەتەلدىكتەردى قابىلدايتىن ازاماتتار ءۇش تاۋلىك ىشىندە پوليتسيا ورگاندارىنا ولاردىڭ كەلگەنى تۋرالى حابارلاۋى ءتيىس ەكەنىن اتاپ ءوتتى. باتىسقازاقستاندىقتار مەن ميگرانتتاردىڭ قۇقىقتارى مەن جاۋاپكەرشىلىگىنە بايلانىستى ءتۇسىندىرۋ جۇمىستارىن كۇشەيتۋ، حابارلاندىرۋ سانىن ۇلعايتۋ جانە قاجەتتى اقپاراتى بار سمس تاراتۋدى ۇيىمداستىرۋ بقو اكىمىنىڭ ورىنباسارى باقىتجان نارىمبەتوۆكە تاپسىرىلدى.
زاڭسىز جالعا بەرىلەتىن تۇرعىن ۇيلەردىڭ كوپتىگىن ەسكەرە وتىرىپ، پوليتسيا دەپارتامەنتىنە مەملەكەتتىك كىرىستەر دەپارتامەنتىمەن بىرلەسىپ، وسىنداي جالعا بەرۋشىلەردى انىقتاۋ جانە زاڭناماعا سايكەس شارالار قابىلداۋ جۇكتەلدى. وبلىس اكىمى مۇنداي ازاماتتارعا جالعا بەرۋ قۇقىعىن رەسىمدەۋ كۇردەلى ەمەس ەكەنىن جانە مەملەكەتتىك كىرىستەر دەپارتامەنتى ورگاندارى ايىپپۇل سانكتسيالارىن قولدانۋدان باسقا، وسىنداي جالعا بەرۋشىلەردى تىركەۋگە كونسۋلتاتسيالىق كومەك كورسەتۋى ءتيىس ەكەنىن ەسكە سالدى. تسيفرلىق تەحنولوگيالار باسقارماسىنا قىزمەت بازاسىندا كوشى-قون زاڭناماسى ماسەلەسى بويىنشا ميگرانتتار مەن جالعا بەرۋشىلەرگە 109 ءنومىرى بويىنشا كەڭەس بەرۋدى ۇيىمداستىرۋ مىندەتتەلدى.
ال قازاقستان ازاماتتارىنىڭ دا، كوشىپ-قونۋشىلاردىڭ دا قاۋىپسىزدىگىن قامتاماسىز تۋراسىندا ءوڭىر باسشىسى پوليتسيا دەپارتامەنتىنە جەكە قۇرامدى كۇشەيتىلگەن رەجيمگە كوشىرۋدى تاپسىردى.
