ورالدا وتكەن «WestKazinvest-2022» حالىقارالىق ينۆەستيتسيالىق فورۋمىندا باتىس قازاقستان وبلىسىنىڭ ينۆەستيتسيالىق الەۋەتى مەن جاڭا وندىرىستەردى وقشاۋلاۋ ارقىلى جۇزەگە اسىرىلاتىن ينۆەستيتسيالىق جوبالاردىڭ تۇساۋكەسەرى ءوتتى. نەگىزگى تاقىرىپ – ينۆەستيتسيا تارتۋ جانە كورشىلەس ەلدەردىڭ كاسىپورىندارىن وقشاۋلاۋعا جاعداي جاساۋ. فورۋم اياسىندا ءىرى شەتەلدىك كومپانيالارمەن ساۋدا-ەكونوميكالىق بايلانىس ورناتۋ ماقساتىندا مەموراندۋم جاسالدى.
– سوڭعى ءۇش جىلدا وبلىستا نەگىزگى كاپيتالعا قۇيىلعان ينۆەستيتسيا كولەمى شامامەن 1,5 ترلن. تەڭگەنى قۇرادى. نەگىزگى كاپيتالعا سالىنعان ينۆەستيتسيانىڭ جالپى كولەمىندەگى شەتەلدىك ينۆەستيتسيانىڭ ۇلەسى بويىنشا باتىس قازاقستان وبلىسى رەسپۋبليكادا 1-ءشى ورىندا. ءبىزدىڭ وبلىس ينۆەستيتسيالىق جوبالاردى كوشىرۋگە دايىن. بقو-نىڭ بىرەگەي گەوگرافيالىق ورنالاسۋى جانە شىعىس جانە باتىس ەۋروپانىڭ ءىرى ەكونوميكالىق جانە مادەني ورتالىقتارىنا جاقىن ورنالاسۋى ايماقتى قازاقستاننىڭ باتىس ءشليۋزى دەپ اتاۋعا مۇمكىندىك بەرەدى.بىزدە قولايلى گەوگرافيالىق جاعداي، دامىعان كولىك ينفراقۇرىلىمى، باي تابيعي رەسۋرستار، ەڭ از بيۋدجەتتىك جۇكتەمە بار. جانە ينۆەستورلاردى قولداۋعا ارنالعان «ءبىر تەرەزە» جۇيەسى. وبلىستىڭ لوگيستيكا جانە ورنالاسۋ جاعىنان ارتىقشىلىعىن ەسكەرە وتىرىپ، ءبىز ينۆەستورلاردى ىنتىماقتاستىققا شاقىرامىز، ءوز تاراپىمىزدان بيزنەستى دامىتۋعا بارىنشا قولداۋ كورسەتۋگە دايىنبىز. ەسكە سالايىق، وبلىس ەكونوميكاسىنىڭ نەگىزگى سالالارى – مۇناي-گاز ونەركاسىبى، اگروونەركاسىپتىك كەشەن جانە ماشينا جاساۋ، – دەدى وبلىس اكىمى عالي ەسقاليەۆ.
«WestKazinvest-2022» فورۋمىنا تۇركيا، يزرايل، پورتۋگاليا، ۇلىبريتانيا، اقش، جاپونيا سياقتى ەلدەردىڭ جانە رەسەي فەدەراتسياسىنىڭ شەكارالاس ايماقتارىنىڭ وكىلدەرى، سونداي-اق قازاقستان رەسپۋبليكاسىنىڭ مەملەكەتتىك ورگاندارى، دامۋ ينستيتۋتتارى، بيزنەس-قوعامداستىقتارى قاتىستى. فورۋم اياسىندا وبلىسىمىز بەن رەسەيدىڭ شەكارالاس وبلىستارىنىڭ تاۋار وندىرۋشىلەرىنىڭ كورمەسى ۇيىمداستىرىلدى.
– ءۇش جىلدان بەرى ءبىز قازاقستاندا تۇرعىن ۇيلەر مەن باسقا دا وندىرىستىك ءۇي-جايلاردى سالىپ جاتقان ورالدىڭ «بولاشاق» قۇرىلىس كومپانياسىمەن تۇراقتى نەگىزدە جۇمىس ىستەپ كەلەمىز. ءبىز تسەمەنتتە بەتون بەرىكتىگى ءۇشىن سۋدى، تسەمەنتتى تۇتىنۋدى ازايتۋعا، قورشاعان ورتاعا تۇسەتىن سالماقتى ازايتۋعا مۇمكىندىك بەرەتىن ارنايى حيميالىق قوسپالار شىعارامىز. حيميالىق قوسپالاردىڭ قورشاعان ورتاعا قاۋىپسىز بولۋى ءۇشىن ولاردىڭ قۇرامىن جاقسارتۋ ءۇشىن وندىرىستە سوڭعى يننوۆاتسيالىق شەشىمدەردى قولدانۋعا تىرىسامىز. فورۋمعا قاتىسۋ باسقا كومپانيالارمەن ىنتىماقتاستىق ورناتۋعا، ەل نارىعىنا شىعۋعا مۇمكىندىك بەرەدى، – دەيدى «ورىنبور پوليكاربوكسيلات زاۋىتى» جاۋاپكەرشىلىگى شەكتەۋلى سەرىكتەستىگىنىڭ بيزنەستى دامىتۋ جونىندەگى ديرەكتورى نايل ساليموۆ.
كورمەگە باتىسقازاقستاندىق ونداعان كومپانيالار مەن جەكە ونەركاسىپ ورىندارى ءوز ونىمدەرىن قويدى. ولاردىڭ قاتارىندا تەك ونەركاسىپتىك ءوندىرىس پەن اۋىل شارۋاشىلىعى كاسىپورىندارى عانا ەمەس، جەكە كاسىپكەرلەر دە بار.
- ءبىزدىڭ ونىمدەردىڭ اتاۋى - «پانير»، ول ارميان تىلىنەن اۋدارعاندا «ىرىمشىك» دەگەندى بىلدىرەدى. اقساي بازارىنا شىقتىق، ساۋدا ۇيلەرىنە سىر جەتكىزىپ جاتىرمىز. ورالعا جانە رەسەي فەدەراتسياسىنىڭ جاقىن قالالارىنا جەكە جەتكىزىلىمدەردى دە جۇزەگە اسىرامىز. ايىنا 2 توننادان استام ءسۇت وڭدەيمىز، ىرىمشىكتىڭ 7 تۇرىنەن استام وندىرەمىز. 1993 جىلى باستاعان وتباسىلىق كاسىبىمىز بار، جەكە شارۋا قوجالىعىمىز بار، سوندىقتان ءبارى بالعىن، تابيعي، حيميكاتسىز. ونىمدەردى ۇلكەن كولەمدە جەتكىزۋدى وسىدان 3-4 جىل بۇرىن باستادىق. ءدامىن جاقسارتۋ ءۇشىن ءتۇرلى كومپونەنتتەردى قوسىپ، ىرىمشىك جاساۋدىڭ ءوز رەتسەپتەرىن قولدانامىز، – دەيدى كورمەگە قاتىسۋشى ۆارۆارا مانۋكيان.
كورمەدەن كەيىن جالپى وتىرىس ءوتىپ، وبلىس اكىمى فورۋمعا قاتىسۋشىلاردى ءوڭىردىڭ ينۆەستيتسيالىق الەۋەتىمەن جانە ونىڭ مۇمكىندىكتەرىمەن تانىستىردى.
