الماتى مارافونىنىڭ قاتىسۋشىسى، 47 جاستاعى رۇستەم سادىقوۆ مارە سىزىعىن كەسىپ وتكەنەن كەيىن قايتىس بولدى. بۇل تۋرالى مارافوندى ۇيىمداستىرۋ كوميتەتى مالىمدەدى، دەپ حابارلادى “ادىرنا” ۇلتتىق پورتالى.
«وقىس جاعداي ساعات 09.35-تە ورىن الدى. رۇستەم 10 شاقىرىم قاشىقتىقتى جۇگىرىپ ءوتتى، تىركەلۋ كەزىندە وعان 8743 ءنومىرى بۇيىرعان» – دەدى «الماتى مارافونىنىڭ» ديرەكتورى سالتانات قازىباەۆا.
جارىستىڭ باس دارىگەرى ورازبەك ساحوۆتىڭ ايتۋىنشا، مارقۇم رەسپۋبليكا الاڭىنداعى مارە سىزىعىن كەسىپ ءوتىپ، بىرنەشە مەتر قادام باسقاننان كەيىن بىردەن قۇلاپ تۇسكەن.
«ءبىز وعان بىردەن كومەك كورسەتە باستادىق. العاشقى كومەكتى «قازاقستاننىڭ قىزىل جارتى اي» ەرىكتىلەرى كورسەتتى، ارى قاراي جۇرەك-وكپە رەانيماتسياسى (تىكەلەي ەمەس جۇرەك ماسساجى، اۋا وتكىزگىشتى پايدالانىپ امبۋ قاپشىعىمەن تىنىستاتۋ، بىرنەشە رەت دەفيبريللياتسيا جاساۋ، ادرەنالين ينەكتسيالارى) قالالىق جەدەل جاردەم ستانتسياسىنىڭ قىزمەتكەرلەرىمەن بىرلەسىپ جۇرگىزىلدى. باستاپقىدا جۇرەك ىسكە قوسىلىپ، سينۋس ىرعاعى پايدا بولدى، بىراق 2 مينۋتتان كەيىن جۇرەك ۇستاماسى قايتا ۇستادى. رەانيماتسيالىق شارالار 30 مينۋتقا سوزىلدى، ونىڭ سوڭعى 10 مينۋتى جەدەل جاردەم كولىگىندە جاسالدى. ساعات 10:15-تە كىسى ءولىمى تىركەلدى. رەسمي سەبەبىن سوت-مەديتسينالىق ساراپتاما جۇرگىزىلگەننەن كەيىن عانا اتاۋعا بولادى» – ورازبەك ساحوۆ.
مارقۇمنىڭ جاقىندارىنىڭ ايتۋىنشا، ول جۇگىرۋ جارىسىنا ءبىرىنشى رەت قاتىسىپ وتىرعان جوق. ءساۋىر ايىندا الماتى جارتىلاي مارافونىنا، 2021 جىلعى الماتى مارافونىنا دا قاتىسىپ، 10 شاقىرىم قاشىقتىققا جۇگىرگەن.
