“ولىگى كەلدى”: شىمكەنتتە جاتاقحانادا قايتىس بولعان ستۋدەنتتىڭ تۋىستارى كوللەدج اكىمشىلىگىن كىنالادى

2176
Adyrna.kz Telegram

23 قىركۇيەك كۇنى شىمكەنتتەگى م.وتەباەۆ اتىنداعى جوعارعى جاڭا تەحنولوگيالار كوللەدجى جاتاقحاناسىندا قايتىس بولعان 16 جاستاعى ستۋدەنت دۇيسەن نۇرحاتتىڭ اتا-اناسى كوللەدج اكىمشىلىگىنە كەلىپ، مارقۇم بالاسىنان اقشا تالاپ ەتكەندەردى تاۋىپ بەرۋدى، وعان جول بەرگەن قىزمەتكەرلەردى كورسەتۋدى تالاپ ەتتى، دەپ حابارلايدى “ادىرنا” ۇلتتىق پورتالى.

جاتاقحانادا قايتىس بولعان ستۋدەنتتىڭ تۋىستارى كوللەدج اكىمشىلىگىن كىنالادى.

مارقۇمنىڭ اناسى ايجان قاشاعانوۆانىڭ ايتۋىنشا، سوڭعى كەزدە ۇلى تۋعان-تۋىستارىنان، دوس-جاراندارىنان اقشا سۇراعان. ولار قينالىپ جاتىر ەكەن دەپ اقشا بەرگەن. بىراق ول اقشانى كىمگە بەرگەنىن، قايدا جۇمساعانىن ەشكىم بىلمەگەن.

”بالامنان الدەكىمدەر اقشا تالاپ ەتكەن. قورقىتقان. قايتىس بولعاننان بۇرىن حابارلاستى. «ماما، قينالىپ كەتتىم» دەدى. ارتىنان «1 ايدان سوڭ پاتەرگە شىعامىن» دەدى. نە بولدى دەپ ەدىم، «ۇيرەنەمىن، شىدايمىن، وقۋدى قالاي دا بىتىرەمىن» دەدى. بار ايتقانى – وسى. ۇيگە كەلگەندە سويلەسەمىن دەگەم. بىراق ولىگى كەلدى”، – دەيدى ەتەگى جاسقا تولعان مارقۇمنىڭ اناسى.

قاشاعانوۆانىڭ ايتۋىنشا، دۇيسەننىڭ مىنەزى مومىن، مەيىرىمدى بولعان. بالا كەزىنەن سپورتپەن اينالىسقان. قول كۇرەستەن جارىستارعا قاتىسقان.

دۇيسەن نۇرحات كوللەدج جاتاقحاناسىندا كەۋدەسى مەن يىعىنا تيگەن سوققىدان قايتىس بولعان. ونى تۋىستارى تۋعان جەرى تۇركىستان وبلىسى تۇلكىباس اۋدانى پىستەلى اۋىلىنا جەرلەدى.

مارقۇم وتباسىنداعى بەس بالانىڭ ەكىنشىسى، ءتورت قىزدىڭ ىشىندەگى جالعىز ۇل بولعان. «ساندىق تەحنيكا» ماماندىعى بويىنشا ءبىلىم العان. تۇركىستان وبلىسى تۇلكىباس اۋدانى پىستەلى اۋىلىنداعى ى.التىنسارين اتىنداعى مەكتەپتىڭ 9-سىنىبىن بىتىرگەن.

مارقۇمنىڭ تۋىستارى وعان الدەكىمدەر كۇش كورسەتىپ، اقشا الىپ وتىرعان دەپ سانايدى. كوللەدج عيماراتىنا كەلىپ بۇعان جول بەرگەن قىزمەتكەرلەردى كورسەتۋدى، ولاردىڭ جاۋاپ بەرۋىن تالاپ ەتكەنىمەن ەشكىم شىقپادى. ولارعا جاۋاپ بەرۋ ءۇشىن قالالىق ءبىلىم ءبولىمىنىڭ باسشىسى جانات تاجيەۆا كەلدى.

“وقيعاعا بايلانىستى قۇزىرلى ورگاندار تەرگەۋ جۇرگىزۋدە. بۇدان بولەك ءبىلىم باسقارماسىنان ارنايى كوميسسيا قۇرىلدى. ماسەلە تارتىپتىك كەڭەستە قارالادى”، – دەدى تاجيەۆا.

بۇدان بۇرىن ءبىلىم باسقارماسى 1-كۋرس ستۋدەنتىنىڭ اۋىر سوققىدان ەسىن جوعالتقانىن مالىمدەگەن. جەدەل جاردەم شاقىرىلىپ، العاشقى مەديتسينالىق كومەك كورسەتىلگەنىمەن ونىڭ ءومىرىن دارىگەرلەر ساقتاپ قالا الماعان.

پوليتسيا ستۋدەنتتىڭ كەۋدەسى مەن يىعىنا ەكى جىگىتتىڭ ۇرعانى جونىندە اقپارات تاراتتى. بىراق ولاردىڭ ۇستالعانى نە ۇستالماعانى ازىرگە بەلگىسىز.

قالالىق تەرگەۋ سوتى Orda.kz تىلشىسىنە بۇل وقيعاعا بايلانىستى پوليتسيادان كۇدىكتىنىڭ باس شاراسىن بەلگىلەيتىن قانداي دا ءبىر ءىس تۇسپەگەنىن حابارلادى.

پوليتسيا وقيعاعا بايلانىستى قىلمىستىق كودەكستىڭ «دەنساۋلىققا قاساقانا اۋىر زيان كەلتىرۋ» بابىمەن (106-باپ) قىلمىستىق ءىس قوزعاعان. ارنايى ساراپتاما تاعايىندالعان، تەرگەۋ ءجۇرىپ جاتىر.

”ادىرنا” ۇلتتىق پورتالى 

 

پىكىرلەر