دراماتۋرگ، جازۋشى سايا قاسىمبەكتىڭ ءماھىر ماسەلەسىنە قاتىستى جازباسى وقىرمان قاۋىمدى ءدۇر سىلكىندىردى، دەپ جازادى "ادىرنا" ۇلتتىق پورتالى. جازۋشى ءماھىر ءۇشىن كولىكتىڭ ەڭ قىمباتىن سۇراعان قىز بەن ودان باس تارتقان جىگىتتىڭ باسىنان وتكەن جايتتاردى ءسوز ەتىپ، ءوز زامانىنداعى تانىم-تۇسىنىكتىڭ مۇلدەم باسقاشا بولعانىن جەتكىزەدى. جاس جۇپتىڭ اراسىندا سىنا قاققان ءماھىر ماسەلەسىنە قاتىستى:
- وقيعانى ىزدەمەيمىن، وقيعا مەنى ىزدەپ تابادى. بۇگىن تويعا دايىندالىپ وتىرعام. قىز جاعىنان بارۋىم كەرەكتىن. قىزدىڭ شەشەسى قىرىق جىلعى سىيلاسىم ەدى. قىزدارىم كەلەدى دەپ بالىشكە قامىر اشىتىپ جاتسام، زۆوندايدى. ەڭىرەپ تۇر. زارەم قالمادى. سويتسەم، كەشە قىز بەن كۇيەۋ مەشىتكە نەكەگە تۇرۋعا بارادى. الىگى ماحيردە قىز قاراپ وتىرماي ەڭ قىمبات (ماركاسىن ايتىپ ەدى، ۇمىتىپ قالدىم) ماشينانى سۇراپتى. وتكەندە بولاشاق كۇيەۋبالاسىمەن بىرگە توي قامىمەن جۇرگەندە كەزدەيسوق ۇشىراسىپ قاپ، بىربەتكەيلەۋ جىگىت ەكەنىن بايقاپ قالعام. بولاشاق جارى ەڭ قىمبات ماشينا سۇراعانىنا شارت ەتكەن كۇيەۋ بالا ءۇنسىز ورنىنان تۇرىپ، “توي بولمايدى!” دەپتى دە، ەشكىمگە قاراماي كەتىپ قالىپتى؟! ءبىر دوسى ماشيناعا ءمىنىپ ۇلگەرىپتى. قاسىنداعى دوسى ارقىلى قىزدىڭ “ويناپ ايتتىم” دەگەنىن ەستىپ، “قۇدايدىڭ ۇيىندە وينايتىن قاتىن كەرەك ەمەس!” دەپ، شورت كەسىپتى… نەكەدە وتىرىپ، مىناداي كۇيگە ۇشىراۋ دەگەن جاقسى ەمەس ارينە.
ءبىزدىڭ كەزىمىزدە ەش ماحەر-ساحەرسىز-اق نەكە قيىپ، پاتەر جاعالاپ ءجۇرىپ-اق بالا تۋىپ، ءۇيلى بوپ ەك.. ارابتىڭ سالتىن سونشا اسپەتتەگەننەن نە شىقتى ەندى؟ - دەيدى اۆتور.
جەلىدەگى جۇرتتىڭ نازارىن اۋدارعان شەتىن وقيعاعا قاتىستى:
"كەزىندە نە اپەرسە دە ءوزى بىلەدى دەگەنىمىزدە نەكە قيۋشى مولدا كۇيەۋىمە "كەمىندە پالەن گرامدى التىن اپەرەسىڭ. موينىڭا قارىز قىلما"-دەپ ەسكەرتسە دە ءالى كۇنگە ەشتەڭە اپەرگەن جوق. ول تۋرالى ۇمىتىپ تا كەتكەنبىز 25 جىل بولدى. وسى كۇنگى جاستاردىڭ وسىنداي تالاپتارىن ەستىگەندە عانا ەسىمىزگە ءتۇسىپ، ءبىر كۇلىپ الامىز", "ازامات ەكەن، دەر كەزىندە شەشىم قابىلداپتى!", "ويبۋ... بولماعان ەكەن..." دەگەن سىندى پىكىرلەر جازدى وقىرماندار.
ەستەرىڭىزگە سالا كەتەيىك، ءماھىر – نەكەلەسۋ بارىسىندا نەمەسە كەيىن وتەۋ شارتىمەن كەلىسىلگەن قالىڭدىققا بەرىلەتىن دۇنيە-مۇلىك نەمەسە اقشا. مۇسىلمانشىلىقتا ماھىرگە قاجەتتى زاتتاردى الۋ ەر-ازاماتتىڭ مىندەتى سانالادى.
