جۋرناليست، وپپوزيتسيونەر جاسارال قۋانىشالين پرەزيدەنت سايلاۋىنا قاتىساتىنىن مالىمدەدى. بۇل تۋرالى ول كانديداتۋراسىن ۇسىنا الاتىن رەسپۋبليكالىق قوعامدىق بىرلەستىكتى ىزدەيتىنى تۋرالى حابارلاما جازدى، دەپ حابارلايدى “ادىرنا” ۇلتتىق پورتالى.
“كەزەكتەن تىس پرەزيدەنتتىك سايلاۋ وتەتىن كۇن كەلەسى اپتادا بەلگىلى بولۋىنا بايلانىستى، مەن پرەزيدەنتتىك سايلاۋعا قاتىسۋ نيەتىمدى مالىمدەيمىن. وزدەرىڭىز بىلەتىندەي، پرەزيدەنتتىككە كانديداتتى رەسپۋبليكا بويىنشا كەمىندە 9 فيليالى بار رەسپۋبليكالىق قوعامدىق بىرلەستىكتەر عانا ۇسىنا الادى. مەن، وسىنداي ۇيىمداردىڭ باسشىلىعىنا مەنىڭ كانديداتۋرامدى ۇسىنۋ ماسەلەسىن تالقىلاۋ ءۇشىن حابارلاسۋدى وتىنەمىن”، – دەپ جازدى ول.
ايتا كەتەيىك، جاسارال قۋانىشالين – جۋرناليست، وپپوزيتسيونەر، 2006 جىلى قازاقستان پرەزيدەنتىنىڭ ابىرويى مەن قادىر-قاسيەتىنە نۇقسان كەلتىردى دەگەن ايىپپەن ەكى جىلعا باس بوستاندىعىنان ايىرىلدى. كەيىن راقىمشىلىق بويىنشا بوساتىلدى.
”ادىرنا” ۇلتتىق پورتالى
