شىمكەنتتە پوليتسيا كامەلەتكە تولماعانداردى جەزوكشەلىكپەن اينالىسۋعا، جەڭگەتايلىققا، سونداي-اق ۇيىمداسقان قىلمىستىق توپ قۇرامىندا جىنىستىق قاناۋ ماقساتىندا ادام ساۋداسىنا تارتۋ فاكتىسى بويىنشا قىلمىستىق ءىستى تەرگەپ جاتىر. بۇل تۋرالى Polisia.kz حابارلادى، دەپ جازادى "ادىرنا" ۇلتتىق پورتالى.
"تەرگەۋ بارىسىندا ولاردىڭ قىلمىستىق ارەكەتتەرى شىمكەنت، تۇركىستان جانە تاراز قالالارىندا جۇزەگە اسىرىلعانى انىقتالدى. توپتاعى رولدەر ناقتى بولىنگەن. ونىڭ ۇيىمداستىرۋشىلارى ءۇش اپالى-ءسىڭلىلى بولىپ شىقتى. ولار سەنىمدى ادامدارىمەن بىرگە قىلمىستىق ارەكەتتەردى ۇيلەستىرگەن. قورقىتۋ مەن بوپسالاۋ، “ايىپپۇلدار” ارقىلى قىزداردى سينتەتيكالىق ەسىرتكى قولدانۋعا جانە اقىلى (كەيدە ءارتۇرلى تاۋار ءۇشىن دە) جىنىستىق قىزمەت كورسەتۋگە ماجبۇرلەگەن. توپتىڭ كەيبىر مۇشەلەرى جاس ايەلدەر مەن قىزداردى ىزدەۋمەن اينالىسقان. ولارمەن تانىسىپ، سەنىمىنە كىرە وتىرىپ، وسى “ىسكە” تارتقان", - دەلىنگەن حابارلامادا.
بەلگىلى بولعانداي، قىزداردى الەۋمەتتىك جەلى ارقىلى قاراعاندى، سەمەي، اتىراۋ، شىمكەنت، تاراز، قىزىلوردا قالالارى مەن تۇركىستان وبلىسىنان تاپقان.
"بيلەت ساتىپ الۋ مەن تۇرۋعا كەتكەن شىعىندى قىلمىستىق توپتىڭ ۇيىمداستىرۋشىلارى تولەگەن. توپتىڭ باسقا مۇشەلەرى “اكىمشى” جانە “كاسسير” ءرولىن اتقاردى. ولار قىزداردىڭ ءتارتىبىن قاداعالاپ، ەسەپ پەن كاسسا جۇرگىزىپ، ينتەرنەتتەگى جارنامالار ارقىلى تابىلعان “كليەنتتەردى” قابىلداپ وتىرعان. قىلمىسكەرلەردىڭ تاپقان تابىسى، بۇگىنگى اقپارات بويىنشا، شامامەن 150 ميلليون تەڭگەنى قۇرايدى. جىنىستىق ساۋدانىڭ قۇرباندارى اراسىندا 17 مەن 25 جاس ارالىعىنداعى 14 قىز بار، ونىڭ ىشىندە 6-ى كامەلەتكە تولماعاندار. قىزداردى جالدامالى پاتەرلەردە ۇستاپ، جەزوكشەلىكپەن اينالىسۋعا ماجبۇرلەگەن", - دەلىنگەن حابارلامادا.
بىرقاتار جاعدايلاردا كۇدىكتىلەر قىزداردى وزىمەن بىرگە ەرتىپ، قوناقۇيلەر مەن ساۋنالارعا اپارعان.
"قىزدار تۋعان-تۋىستارىن تىنىشتاندىرۋ ءۇشىن اتا-انالارىنا بالا كۇتۋشى بولىپ جۇمىس ىستەيتىندەرىن ايتقان. كەيبىر جاعدايلاردا ۇيىمداستىرۋشىلار قىزداردىڭ اتا-انالارىمەن كەزدەسۋگە بارىپ، وزدەرىن “بالا كۇتۋشىگە جۇمىس بەرۋشى” سياقتى كورسەتكەن. بارلىعى 11 ادام ۇستالدى، ولار قازىر شىمكەنتتەگى تەرگەۋ يزولياتورىندا قاماۋدا", - دەلىنگەن حابارلامادا.
وسى فاكتى بويىنشا 18 قىلمىستىق ءىس قوزعالدى، ونىڭ ىشىندە: 2 دەرەك – قك-ءنىڭ 262-بابىنىڭ 1, 2-بولىگى (ۇيىمداسقان قىلمىستىق توپ قۇرۋ جانە وعان قاتىسۋ), 5 دەرەك – قك-ءنىڭ 128-بابى (ادام ساۋداسى), 5 دەرەك – قك-ءنىڭ 134-بابى 3-بولىگى (كامەلەتكە تولماعان ادامدى جەزوكشەلىكپەن اينالىسۋعا تارتۋ), 2 دەرەك – قك-ءنىڭ 308-بابى (جەزوكشەلىككە تارتۋ), 3 دەرەك – قك-ءنىڭ 309-بابى (پريتون ۇستاۋ مەن جەڭگەتايلىق), 1 دەرەك – قك-ءنىڭ 297-بابى (ەسىرتكى زاتتارىن الۋ، ساقتاۋ، تاسىمالداۋ) بويىنشا. تەرگەۋ جالعاسۋدا.
"ادىرنا" ۇلتتىق پورتالى
