Shymkentte jas qyzdardy jezókshelikke jekken apaly-sińlili áıelder ustaldy

2322
Adyrna.kz Telegram

Shymkentte polıııa kámeletke tolmaǵandardy jezókshelikpen aınalysýǵa, jeńgetaılyqqa, sondaı-aq uıymdasqan qylmystyq top quramynda jynystyq qanaý maqsatynda adam saýdasyna tartý faktisi boıynsha qylmystyq isti tergep jatyr. Bul týraly Polisia.kz habarlady, dep jazady "Adyrna" ulttyq portaly.

"Tergeý barysynda olardyń qylmystyq áreketteri Shymkent, Túrkistan jáne Taraz qalalarynda júzege asyrylǵany anyqtaldy. Toptaǵy rólder naqty bólingen. Onyń uıymdastyrýshylary úsh apaly-sińlili bolyp shyqty. Olar senimdi adamdarymen birge qylmystyq áreketterdi úılestirgen. Qorqytý men bopsalaý, “aıyppuldar” arqyly qyzdardy sıntetıkalyq esirtki qoldanýǵa jáne aqyly (keıde ártúrli taýar úshin de) jynystyq qyzmet kórsetýge májbúrlegen. Toptyń keıbir músheleri jas áıelder men qyzdardy izdeýmen aınalysqan. Olarmen tanysyp, senimine kire otyryp, osy “iske” tartqan", - delingen habarlamada.

Belgili bolǵandaı, qyzdardy áleýmettik jeli arqyly Qaraǵandy, Semeı, Atyraý, Shymkent, Taraz, Qyzylorda qalalary men Túrkistan oblysynan tapqan.

"Bılet satyp alý men turýǵa ketken shyǵyndy qylmystyq toptyń uıymdastyrýshylary tólegen. Toptyń basqa músheleri “ákimshi” jáne “kassır” rólin atqardy. Olar qyzdardyń tártibin qadaǵalap, esep pen kassa júrgizip, ınternettegi jarnamalar arqyly tabylǵan “klıentterdi” qabyldap otyrǵan. Qylmyskerlerdiń tapqan tabysy, búgingi aqparat boıynsha, shamamen 150 mıllıon teńgeni quraıdy. Jynystyq saýdanyń qurbandary arasynda 17 men 25 jas aralyǵyndaǵy 14 qyz bar, onyń ishinde 6-y kámeletke tolmaǵandar. Qyzdardy jaldamaly páterlerde ustap, jezókshelikpen aınalysýǵa májbúrlegen", - delingen habarlamada.

Birqatar jaǵdaılarda kúdiktiler qyzdardy ózimen birge ertip, qonaqúıler men saýnalarǵa aparǵan.

"Qyzdar týǵan-týystaryn tynyshtandyrý úshin ata-analaryna bala kútýshi bolyp jumys isteıtinderin aıtqan. Keıbir jaǵdaılarda uıymdastyrýshylar qyzdardyń ata-analarymen kezdesýge baryp, ózderin “bala kútýshige jumys berýshi” sııaqty kórsetken. Barlyǵy 11 adam ustaldy, olar qazir Shymkenttegi tergeý ızolıatorynda qamaýda", - delingen habarlamada.

Osy fakti boıynsha 18 qylmystyq is qozǵaldy, onyń ishinde: 2 derek – QK-niń 262-babynyń 1, 2-bóligi (Uıymdasqan qylmystyq top qurý jáne oǵan qatysý), 5 derek – QK-niń 128-baby (Adam saýdasy), 5 derek – QK-niń 134-baby 3-bóligi (Kámeletke tolmaǵan adamdy jezókshelikpen aınalysýǵa tartý), 2 derek – QK-niń 308-baby (Jezókshelikke tartý), 3 derek – QK-niń 309-baby (Prıton ustaý men jeńgetaılyq), 1 derek – QK-niń 297-baby (Esirtki zattaryn alý, saqtaý, tasymaldaý) boıynsha.  Tergeý jalǵasýda.

"Adyrna" ulttyq portaly 

 

Pikirler