2030 جىلعا قاراي الماتى قالاسىنىڭ پوليورتالىقتارىنىڭ قۇرىلىمى تولىق قالىپتاسادى. بۇل تۋرالى الماتى قالاسى اكىمىنىڭ ورىنباسارى مۇحيت ازىرباەۆ ايتتى، دەپ حابارلايدى "ادىرنا" ۇلتتىق پورتالى inform.kz-كە سىلتەمە جاساپ.
سپيكەردىڭ ايتۋىنشا «شىعىس قاقپاسى» پوليورتالىعى حالىقارالىق اۋەجاي مەن «باتىس ەۋروپا - باتىس قىتاي» تراسساسىنا جاقىن بولعان سوڭ، ءىرى مۋلتيمودالدىق كولىك - اۋىسىپ وتىرۋ تورابى بار لوگيستيكالىق حابقا اينالادى.
«ونىڭ قۇرامىنا LRT ستانتسياسى، «ۆوستوچنىي« اۆتوۆوكزالى، قالا ماڭىنداعى قوعامدىق كولىكپەن بىرىكتىرىلگەن BRT جەلىسى كىرەدى. مۇندا كورمە - ويىن-ساۋىق ورتالىعى، تۇرعىن ءۇي جانە الەۋمەتتىك ينفراقۇرىلىمى بار جاڭا رەكرەاتسيالىق ايماقتى ورنالاستىرۋ جوسپارلانۋدا. "باتىس"پوليورتالىعىندا يندۋستريالىق ايماقتىڭ اۋماعىن كەڭەيتۋ بولجانىپ وتىر. بورالداي كەنتىندە «الماتى – 3» ۆوكزالى ورنالاساتىن بولادى، ونىڭ بازاسىندا كولىك-لوگيستيكالىق حابتى دامىتۋعا بولادى. «ساق قورعاندارى» ەتنوگرافيالىق باقتىڭ اينالاسىنداعى ينفراقۇرىلىم داميدى. بۇگىندە اۋدانى 90 گا جەلىلىك رەكرەاتسيالىق باق، سونداي-اق قاجەتتى ينفراقۇرىلىمى بار تۇرعىن ءۇي كۆارتالدارى قۇرىلدى»، - دەدى مۇحيت ازىرباەۆ.
سونداي-اق ول «وڭتۇستىك-باتىس» پوليورتالىعىندا بۇرىننان بار نىسانداردى قايتا فورماتتاۋ، «التىن وردا» ساۋدا بازارىن كوتەرمە-تاراتۋ ورتالىعى ەتىپ قايتا قۇرۋ، «بارلىق» بازارىنىڭ ورنىنا «باتىس» اۆتوۆوكزالىن، LRT ستانتسياسىن جانە مەتروپوليتەندى قامتيتىن ءىرى مۋلتيمودالدىق كولىك-اۋىسىپ وتىرۋ تورابىن قۇرۋ جوسپارلانعانىن ايتتى.
«تاريحي ورتالىقتىڭ» شەكاراسىندا اباتتاندىرۋ جۇمىستارى جالعاسادى جانە تاريحي-مادەني مۇراعا جاتاتىن عيماراتتاردى قالپىنا كەلتىرۋ جونىندەگى باعدارلاما قابىلدانادى، سونداي-اق، ينجەنەرلىك جەلىلەر جاڭارتىلادى. ۆەلوجولداردى توسەۋ جالعاسادى، اقىلى تۇراق ورىندارى ۇلعايتىلادى. «تاريحي ورتالىققا» ىرگەلەس ونەركاسىپتىك كاسىپورىندار مەن ارنايى مەكەمەلەر (ازتم، كيروۆ اتىنداعى زاۋىت، سيزو) كوشىرىلەتىن بولادى، ولار مەن ەسكى تۇرعىن ۇيلەردىڭ ورنىنا زاماناۋي ۇلگىدەگى كۆارتالدى قۇرىلىس پەن جاڭا ىسكەرلىك كلاستەر پايدا بولادى»، - دەدى سپيكەر.
ونىڭ ايتۋىنشا، الماتىدا پوليورتالىقتاردى دامىتۋدان باسقا، قالپىنا كەلتىرۋگە بولاتىن نەمەسە بولمايتىن ەسكىرگەن تۇرعىن ۇيلەردى رەۆيتاليزاتسياعا كوڭىل بولىنەدى. 2022 جىلدىڭ سوڭىنا دەيىن ەسكى ۇيلەردى قالپىنا كەلتىرۋدىڭ قالالىق باعدارلاماسى بەكىتىلەدى.
سونىمەن قاتار ساين، مومىشۇلى، التىنسارين كوشەلەرى مەن باسقا دا شاعىن اۋدانداردىڭ كوشەلەرىندە پرومەنادتار قويىلاتىن بولدى.
"ادىرنا" ۇلتتىق پورتالى
