بۇگىن بەلگىلى ساياساتكەر، قوعام قايراتكەرى التىنبەك سارسەنبايۇلى كوزى ءتىرى بولعاندا 60 جاسقا تولار ەدى.
التىنبەك سارسەنبايۇلى — 1962 جىلى 12 قىركۇيەكتە الماتى وبلىسى، رايىمبەك اۋدانى، قاينار اۋىلىندا دۇنيەگە كەلگەن. قازاقستاننىڭ مەملەكەت جانە قوعام قايراتكەرى، ديپلومات، جۋرناليست.
1992 جىلدان باستاپ پرەزيدەنت اپپاراتىندا، قر مينيسترلەر كابينەتىندە جاۋاپتى قىزمەتتەر اتقاردى.
1993 جىلدان باسپا جانە اقپارات ءمينيسترى، 1995 جىلدان باسپا جانە اقپارات جونىندەگى ۇلتتىق اگەنتتىكتىڭ توراعاسى، 1997 جىلدان قوعامدىق كەلىسىم جانە اقپارات ءمينيسترى، 1999 جىلدان قر قوعامدىق كەلىسىم، اقپارات جانە مادەنيەت ءمينيسترى بولدى.
2001 جىلدىڭ مامىرىنان جەلتوقسانىنا دەيىن قازاقستان رەسپۋبليكاسى قاۋىپسىزدىك كەڭەسىنىڭ حاتشىسى — قازاقستان رەسپۋبليكاسى پرەزيدەنتىنىڭ ۇلتتىق قاۋىپسىزدىك جونىندەگى كومەكشىسى. 2002 جىلدىڭ قاڭتارىنان ديپلوماتيالىق قىزمەتتە، رەسەي فەدەراتسياسىنداعى قازاقستان رەسپۋبليكاسىنىڭ توتەنشە جانە وكىلەتتى ەلشىسى قىزمەتىن اتقاردى. 2003 جىلدان باستاپ ا.سارسەنبايۇلى ءوز ەركىمەن پرەزيدەنتكە وتستاۆكاعا شىعۋعا ارىز بەرىپ، قوعامدىق-ساياسي قىزمەتپەن اينالىستى.
2003 جىلدىڭ قاراشا ايىندا «اق جول» دەموكراتيالىق پارتياسىنىڭ ءىىى سەزىندە ءبىراۋىزدان تەڭ توراعا ەتىپ سايلاندى. 2005 جىلدىڭ ساۋىرىنەن «ناعىز اق جول» قازاقستان دەموكراتيالىق پارتياسىنىڭ تەڭ توراعاسى.
2006 جىلدىڭ 11 اقپانىندا التىنبەك سارسەنبايۇلىن كومەكشىسى باۋىرجان بايبوسىنوۆ جانە جۇرگىزۋشىسى ۆاسيلي جۋراۆلەۆپەن بىرگە الماتى قالاسىنىڭ سىرتىندا قازاقستاننىڭ ۇلتتىق قاۋىپسىزدىك كوميتەتىنىڭ ارنايى توبى وفيتسەرلەرىنىڭ قاتىسۋىمەن جاسالعان قاستاندىقتىڭ ناتيجەسىندە قازا بولدى.
"ادىرنا" ۇلتتىق پورتالى
