بۇدان بىلاي قاجىلىققا بارۋ ءۇشىن قاراجاتتى الدىن الا جيناپ، ارنايى ەسەشوتتا ساقتاۋعا بولادى. بۇگىن الماتىدا اللا الدىنداعى پارىزىن وتەۋشىلەرگە ارنالعان جاڭا جوبا ىسكە قوسىلدى.
سوڭعى جىلدارى قاجىلىق قارجىسىن ءبولىپ تولەۋ مۇمكىندىگىن سۇراۋشىلار كوبەيگەن. سوندىقتان، وسى سالادا تابىستى ەڭبەك ەتىپ جۇرگەن «Qazaq travel» كومپانياسى «zhinaq.kz» جوباسىن ىسكە قوسىپ، تانىستىرىلىمىن جاسادى.
بۇل قوسىمشا ارقىلى قاجىلىققا بارۋعا شاماسى جەتپەيتىن قازاقستاندىقتار ەندى سايت ارقىلى جەكە شوتىن اشىپ، اي سايىن الدىن الا قارجى جيناي الادى. سونىمەن قاتار، وزگەلەرگە سىلتەمە جىبەرىپ، قوسىمشاعا تىركەلۋشىلەردىڭ قاتارىن ارتتىرۋ ارقىلى وزىنە بونۋس جيناۋعا مۇمكىندىك بار.
«بۇدان بولەك، قاجىلىققا شاماسى جەتپەيتىندەرگە كومەكتەسەم دەيتىن كاسىپكەرلەر مەن وزگەلەر دە وسى قوسىمشانى پايدالانا الادى. سونىڭ ناتيجەسىندە، قاسيەتتى مەكەنگە بارۋشىلاردىڭ قاتارى ارتپاق. بۇل الەمدە بار تاجىريبە»، - دەيدى كومپانيا باسشىسى.
بۇگىندە ۇيىم قاجىلىققا قارجىسى جەتپەيتىن ءتۇرلى ساناتتاعى ادامدارعا تەگىن جولداما بەرەدى. جىلىنا كەم دەگەندە 10 ادامدى ۇلكەن قاجىلىققا جىبەرەدى. ال مۇنداي جانداردىڭ ءتىزىمىن قازاقستان مۇسىلماندارى ءدىني باسقارماسى دايىندايدى. بۇل يگىلىكتى ءىس ءارى قاراي جالعاسىپ، بۇگىنگى كەشكە جينالعان اراسىندا 3 جولداما ويناتىلدى.
كومپانيا قازىرگى زامانعا ساي بارلىق مۇمكىندىكتەردى قاراستىرىپ، جولاۋشىلار ءۇشىن ءتيىمدى جاعداي جاساۋعا باعىتتالعان باستامالاردى قولعا الىپ وتىر. الداعى ۋاقىتتا قاجىلىققا باراتىندار ءۇشىن وزگە ءتيىمدى قوسىمشالاردى ىسكە قوسۋ جوسپاردا بار.
