الماتى قالاسىنداعى مەشىتتەردىڭ بىرىندە بولعان قىلمىستىڭ بەتى اشىلدى، دەپ حابارلايدى "ادىرنا" ءتىلشىسى.
مەشىتتەگى ۇرلىقتى قالانىڭ اۋەزوۆ اۋدانىنىڭ پوليتسەيلەرى اشقان.
تۇرعىلىقتى جەرى جوق 42 جاستاعا ازامات، ناماز وقۋ كەزىندە تەلەفون ۇرلاعان.
"ۆ. ەسىمدى ازاماتتىڭ ۇرلىق جاساپ جاتقان جەرى بەينەباقىلاۋ كامەرالارىنا ءتۇسىپ قالعان. زارداپ شەگۋشىنىڭ ايتۋىنشا، قالاداعى مەشىتتەردىڭ بىرىندە، ناماز وقۋ كەزىندە تەلەفونىن ەدەنگە، اياعىنىڭ استىنا قويعان. نامازدان كەيىن زاتىنىڭ جوعالعانىن بايقادى. سول كۇنى-اق كۇدىكتى انىقتالدى جانە ۇستالدى. ۇرلانعان IPhone ۇرىنىڭ وزىمەن بىرگە بولدى. ۇستالعان ازامات ۇرلىققا قاتىسى بارىن جوققا شىعارمايدى، ول ءوز كىناسىن مويىنداپ، ىستەگەن ىسىنە وكىنەتىنىن ايتىپ وتىر. بۇل دەرەك قر قك-ءنىڭ 188-بابى 1-بولىگى (ۇرلىق) بويىنشا سوتقا دەيىنگى تەرگەۋدىڭ بىرىڭعاي تىزىلىمىنە تىركەلدى", – دەدى اۋەزوۆ اۋدانى پب قاراستى پوليتسيا ءبولىمىنىڭ باسشىسى ەلنۇر قۇدرەتباەۆ.
