مەشىتتە بولعان توبەلەس الەۋمەتتىك جەلىدە تاراپ كەتتى. وقيعاعا 14 مامىردا قمدب - ءمۇفتيات تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
جەلىدە ەر ادامنىڭ مەشىت ىشىندە وزگە ءبىر ادامدى جۇدىرىقپەن ۇرعان بەينەسى تاراعان بولاتىن. قازاقستان مۇسىلماندارى ءدىني باسقارماسىنىڭ ءباسپاسوز حاتشىسى اعابەك قوناربايۇلىنىڭ تەك بۇگىن Facebook-تەگى پاراقشاسىندا ءمان-جايعا تۇسىنىكتەمە بەردى.
14 مامىر كۇنى ءدىني باسقارما وقيعانىڭ 2024 جىلعى 12 مامىردا كەشكى اقشام نامازى ۋاقىتىندا شىمكەنت قالاسىنداعى مەشىتتەردىڭ بىرىندە بولعانىن حابارلاپ وتىر. وزگە وڭىردەن مەگاپوليسكە كەلگەن ءبىر توپ ازامات مەشىت يمامىنىڭ ەسكەرتۋىنە قاراماستان، بىرنەشە رەت جاماعات نامازىن بۇزعان.
سونداي-اق، قمدب جاۋابىندا وزگە ءمازھابتا ناماز وقىعان ازاماتتار جينالعان جاماعات پەن يمامنىڭ وتىنىشىنە قۇلاق اسپاي، مەشىت ەرەجەسىن ورەسكەل بۇزعانى ايتىلدى.
"الەۋمەتتىك جەلىدە مەشىتتە بولعان وقيعا تارالۋدا. وسىعان بايلانىستى قمدب تومەندەگىنى مالىمدەيدى:وقيعا 2024 جىلدىڭ 12 مامىرىندا كەشكى اقشام نامازى ۋاقىتىندا شىمكەنت قالاسىنداعى مەشىتتەردىڭ بىرىندە بولعان. وزگە وڭىردەن شىمكەنت قالاسىنا كەلگەن ءبىرتوپ ازامات مەشىت يمامىنىڭ ەسكەرتۋىنە قاراماستان بىرنەشە رەت جاماعات نامازىن بۇزعان. وزگە ءمازھابتا ناماز وقىعان ولار جاماعات پەن يمامنىڭ وتىنىشىنە قۇلاق اسپاي، مەشىت ەرەجەسىن ورەسكەل بۇزعان.ناماز كەزىندە ء“امين” دۇعاسىن قاتتى داۋىسپەن ايتقان جانداردىڭ ارەكەتىنە توزبەگەن مەشىتكە تۇراقتى كەلۋشى ءبىر ازامات ولاردىڭ بىرىنە قول جۇمساعان. ناتيجەسىندە يمام جاماعات نامازىن توقتاتۋعا ءماجبۇر بولعان. وقىس وقيعا دەر كەزىندە توقتاتىلىپ، پوليتسيا قىزمەتكەرلەرى ءتيىستى جۇمىس جۇرگىزۋدە.قازاقستان مۇسىلماندارى ءدىني باسقارماسى مەشىتكە كەلۋشى جاماعاتتى مەشىت ەرەجەسىنە باعىنۋعا، سونىمەن قاتار قۇلشىلىق ۇيىندە سابىر ساقتاپ، كوركەم مىنەز تانىتۋعا شاقىرادى.ەسكە سالا كەتسەك، قمدب بەكىتكەن "مەشىت ەرەجەسى" بويىنشا قازاقستان مۇسىلماندارىنىڭ اۋىزبىرشىلىگى مەن بىرتۇتاستىعىن قامتاماسىز ەتۋ ءۇشىن ناماز بەن ءدىني راسىمدەر ءابۋ حانيفا ءمازھابى بويىنشا ورىندالادى", - دەلىنگەن جاۋاپتا.
