Astana LRT ءىسى بويىنشا سوتتالعاندار اشتىق جاريالادى. ولار اپەللياتسيالىق ساتىداعى ءىستى قاراۋ وتىرىسىنا قوسۋدى تالاپ ەتىپ جاتىر. بارلىعى دا ەلورداداعى ەتس 166/1 جازاسىن وتەۋ مەكەمەسىندە وتىر، – دەپ حابارلايدى "ادىرنا" ۇلتتىق پورتالى كتك ارناسىنا سىلتەمە جاساپ.
اشتىقتى 8 جىلعا باس بوستاندىعىنان ايىرىلعان ۇلىقبەك اچيلوۆ جەكسەنبى كۇنى باستاپ كەتكەن. اچيلوۆ كولونيا باسشىسى مەن باس پروكۋراتۋراعا جانە سوتقا جولداعان حابارلاماسىندا اپەللياتسيا شاعىمىن قاراۋ بارىسىن ونلاين-ترانسلياتسيا ارقىلى كورسەتۋدى تالاپ ەتكەن.
سوتتالۋشى سوتقا تىكەلەي قاتىسىپ، ءوز ويىن ايتۋ مۇمكىندىگىن سۇراپتى. ۇلىقبەك اچيلوۆ كەزىندە Astana LRT-نىڭ قوسالقى مەردىگەرى «نۋرترەيد» سەرىكتەستىگىنىڭ ديرەكتورى بولعان.
سەگىز جىلعا باس بوستاندىعىنان ايىرىلعان مەردىگەردىڭ وكىلى تيمۋر قاساباەۆ، جەتى جىلعا تۇرمەگە توعىتىلعان Astana يننوۆەيشەنستىڭ بۇرىنعى باسقارما توراعاسى تالعات ءاشىم تە اشتىق جاريالاپ جاتىر.
ال ەكس-دەپۋتات ءارى نۇر-سۇلتان قالالىق ءماسليحاتىنىڭ بۇرىنعى حاتشىسى، سەگىز جىلعا سوتتالعان جانات نۇرپەيىسوۆ اشتىقتان دەنساۋلىعىنا بايلانىستى باس تارتىپتى.
بۇعان دەيىن اپەللياتسيالىق شاعىمدى قاراۋ كەزىندە تالعات ءاشىمنىڭ ادۆوكاتى كليەنتىنىڭ جۇرەك تالماسى ۇستاعانىن حابارلاعان. اشتىق جاريالاعانداردىڭ بارلىعى دارىگەرلەردىڭ باقىلاۋىندا.
– مەكەمە اكىمشىلىگىنە، ونىڭ ىشىندە ءىس ماتەريالدارىمەن تانىسۋعا قاتىستى ەش نارازىلىق جوق. «ادامداردى قوعامنان ۋاقىتشا وقشاۋلاۋدى قامتاماسىز ەتەتىن ارناۋلى مەكەمەلەردە، ارناۋلى ءۇي-جايلاردا ۇستاۋدىڭ ءتارتىبى مەن شارتتارى تۋرالى» قر زاڭىنىڭ 41-بابىنىڭ تالاپتارىنا سايكەس، مەكەمە باسشىلىعى سەبەبىن انىقتاۋ، سونداي-اق قىلمىستىق ءىستى جۇرگىزىپ جاتقان ورگاندى، نۇر-سۇلتان قالاسىنىڭ پروكۋراتۋراسىن حاباردار ەتۋ جونىندەگى شارالاردى قابىلدادى، – دەيدى نۇر-سۇلتان قالاسى قىلمىستىق اتقارۋ جۇيەسى دەپارتامەنتىنىڭ ءباسپاسوز قىزمەتىمەن بايلانىس جونىندەگى مامانى اقتوتى بەكەنوۆا.
"ادىرنا" ۇلتتىق پورتالى
