قازاقستاندا كوللەدجدە ءبىلىم الۋشىلار سانى ارتقان. ونىڭ سەبەبى، پرەزيدەنتتىڭ تاپسىرماسى اياسىندا 2025 جىلعا دەيىن مەملەكەتتىك تاپسىرىستىڭ 70%-ى تەحنيكالىق ماماندىقتاردىڭ ۇلەسىنە بەرىلۋى. سوندىقتاندا بۇگىندە تەحنيكالىق جانە كاسىپتىك ءبىلىم بەرۋ ۇردىسىنە باسىمدىق بەرىلۋدە.
ماسەلەن، بيىلعى جىلى ءدال وسى باعىتتا 183 مىڭنان استام ادام وقۋعا تۇسكەن، ولاردىڭ 125 مىڭى گرانت يەگەرى اتانعان جايى بار. رەسمي دەرەكتەر، بۇل رەكوردتىق كورسەتكىش ەكەنىن كورسەتۋدە. ويتكەنى، بۇل ساندار بىلتىرعىمەن سالىستىرعاندا 45 مىڭعا ارتىق.
جاس تۇلەكتەردىڭ جارتىسىنان كوبى ءبىلىم بەرۋ، قۇرىلىس، تۋريزم، ينجەنەريا جانە قوناق ءۇي ءىسى ماماندىعىن مەڭگەرۋگە قۇلىق تانىتقان.
گرانتقا تۇسۋشىلەردىڭ سانىنىڭ كۇرت ارتۋى كۆوتالار ءتىزىمىنىڭ كەڭەيتىلۋىمەن تىكەلەي بايلانىستى. تارقاتار بولساق، ءۇش جىلدان بەرى كوپبالالى وتباسىلار ساناتىنداعى جان ۇيادان شىققان بالالار ءۇشىن 5 % سونداي-اق، تولىق ەمەس وتباسى مەن ەرەكشە ءبىلىم بەرۋ قاجەتتىلىگى بار بالالاردى تاربيەلەپ وتىرعان وتباسى بالالارى ءۇشىن 1% كۆوتا قوسىلدى.
«تالاپتىعا نۇر جاۋار»، دەمەكشى ىنتالى بىلىمگەردىڭ وقۋىنا كەدەرگى جوق. ونىڭ ايقىن دالەلى، بيىلعى جىلعى قۇجات تاپسىرۋداعى ەرەكشەلىك. بۇل جولى وقۋعا تاپسىرۋشى جان قۇجاتتارىن بىردەن 4 بىردەي كوللەدجدى تاڭداۋعا مۇمكىندىك الدى.
تەگىن وقۋدىڭ سانىنىڭ ارتۋىنىڭ تاعى ءبىر سەبەبى، مەملەكەتتىك تاپسىرىستىڭ تالاپكەردىڭ تاڭداۋىنا قاراي بەرىلۋى. ءبىلىم سالاسىنداعى جاڭاشا مەحانيزم «اقشا ستۋدەنتتىڭ سوڭىنان ەرەدى» قاعيداتى بويىنشا 2021 جىلى ءبىلىم بەرۋدىڭ اشىقتىعى مەن قولجەتىمدىلىگىن قامتاماسىز ەتۋ ماقساتىندا مينيسترلىكتىڭ تاپسىرماسىنىڭ ارقاسىندا جۇزەگە استى.
وسىلايشا، تالاپكەردىڭ تاڭداۋى مەن تالابى ەسكەرىلدى. سايكەسىنشە، قازىناداعى قارجى قاجەتتى جەرىنە جۇمسالىپ، تۇلەكتى تۇلەتۋگە باعىتتالىپ وتىر.
