بەلگىلى كاسىپكەر مارعۇلان سەيسەمباي توقاەۆ جولداۋىنا قاتىستى ءوز پىكىرىن ءبىلدىرىپ، ودان اينالاسىنداعى شەنەۋنىكتەردەن تەزىرەك قۇتىلۋىن سۇرادى. بۇل تۋرالى "ادىرنا" ۇلتتىق پورتالى.
"توقاەۆتىڭ جولداۋىنان بەرى بىرنەشە كۇن ءوتتى. قوعامدا اسىرەسە پرەزيدەنت سايلاۋى مەن جەتى جىلدىق مەرزىمگە قاتىستى قىزۋ تالقىلاۋ ءجۇرىپ جاتىر. كەزەكتەن تىس پرەزيدەنت سايلاۋىن وتكىزۋ قاجەتتىلىگىنە نەگىزگى ارگۋمەنت رەتىندە رەفورمالار الدىندا پرەزيدەنت مانداتىن جاڭادان باستاۋ نەمەسە قايتادان راستاۋ قاجەتتىلىگى ايتىلادى. بىرىنشىدەن، توقاەۆقا ءوزىنىڭ كەڭەسشى سىماقتارىن تىڭداماۋ كەرەك ەدى. توقاەۆتىڭ اينالاسىنداعى بارلىق شەنەۋنىكتەر كەڭەستىك ينجەنەرلەر سياقتى. ولار نە جاساسا دا، تۇبىندە ءبارىبىر كالاشنيكوۆ اۆتوماتى شىعادى. قازىر دە سولاي، ولار كەزەكتەن تىس پرەزيدەنت سايلاۋى جانە كونستيتۋتسيانى بىرجاقتى وزگەرتە سالۋ ارقىلى وكىلەتتىگىن ۇزارتۋدان باسقا ارتىق ەشتەڭە ويلاپ تاپپادى. نە ەكسەڭ، سونى وراسىڭ دەگەن وسى. ەكىنشىدەن، دۇرىس رەفورمالار جاساۋ ءۇشىن جاڭا ماندات قاجەت ەمەس. دۇرىس رەفورما جاساساڭ، ساعان دەگەن حالىقتىڭ سەنىمى ارتىپ، مانداتىڭ اۆتوماتتى تۇردە نىعايا تۇسەدى. سوندىقتان بۇل جاي عانا ءوز وكىلەتتىگىن ۇزارتۋدىڭ سىلتاۋى. ال بۇل توقاەۆقا دەگەن سەنىمدى تومەندەتەدى. قۇرمەتتى كەڭەسشىلەر، سىزدەر ارتىق قىلام دەپ تىرتىق قىلدىڭىزدار. پرەزيدەنت مىرزا، مۇنداي ساياسي كەڭەسشى سىماقتارىڭىزدى جەلكەلەپ قۋىپ شىعىڭىز", - دەيدى كاسىپكەر.
كاسىپكەر توقاەۆتان كۇتەتىن ناقتى ارەكەتتەرگە توقتالدى.
"قالاي ىستەگەن دۇرىس بولار ەدى؟ 1. توقاەۆ «قولشوقپار» پارلامەنت ارقىلى بارلىق قاجەتتى زاڭداردى قابىلدايدى. «پارتيالار تۋرالى»، «سايلاۋ تۋرالى»، «ورتالىق سايلاۋ كوميسسياسى تۋرالى»، «تاۋەلسىز باق تۋرالى»، «ميتينگتەر مەن شەرۋلەر تۋرالى» جانە تاعى باسقا. 2. سودان سوڭ، توقاەۆ پارلامەنت سايلاۋى وتەتىنى جونىندە حابارلاپ، سايلاۋدى كەلەسى جىلدىڭ كۇزىنە قويادى. 3. كونستيتۋتسياعا سايكەس 2024 جىلى ءوزى پرەزيدەنت سايلاۋىنا قاتىسادى. ەگەر ول ءدال وسىلاي ىستەگەندە، مەن ونىڭ جەڭىسكە جەتەتىنىنە 100% سەنىمدىمىن. بىراق بىرنارسە دۇرىس بولمادى. قازىرگى جاعداي ماعان مۇلدە ۇناپ تۇرعان جوق", - دەدى مارعۇلان سەيسەمباي.
"ادىرنا" ۇلتتىق پورتالى
