Aron Atabek tarıhta «Shańyraq oqıǵasy» dep aty qalǵan, polıııa qyzmetkeriniń ólimine ákep soqqan kóterilisti uıymdastyrdy degen aıyppen18 jylǵa qamaýǵa alynǵan edi. Qyzy Alma Nýtýsheva temirtorda ǵumyrynyń 15 jylyn ótkizgen ákesin aqtap alýdy suraıdy. Ol osy maqsatta áleýmettik jelide Prezıdent Qasym-Jomart Toqaevqa arnap jazba qaldyrdy.
«Qasym-Jomart Kemeluly! Joldaýdy tyńdaǵannan keıin Men sizdiń eldegi barlyq jaǵdaıdy jaqsartýdy kózdegenińizdi kórdim. Men sizdiń bul baǵdarlamańyzǵa Qazaqstannyń jazyqsyz sottalǵan adamdaryn aqtap alýdy qosýyńyzdy suraımyn»,-dep jazdy Alma Nýtýsheva.
Qyzynyń aıtýynsha, ákesine taǵylǵan aıyptar negizsiz. Ákesiniń túrmeden dármensiz kúıde úıine oralǵanyn alǵa tartqan Aron Atabektiń qyzy, onyń qapastaǵy 15 jyly azapqa toly bolǵanyn alǵa tartty.
«Nelikten manıaktar men kisi óltirýshiler 20 jyldan keıin deni saý bolyp shyǵady? Al ákemdi sonsha azaptaǵandary qalaı, endi ony maǵan kim qaıtarady?»,-dep ashyndy Alma Nýtýsheva.
Aron Atabek kózi tirisinde shartty túrde bosap shyǵýdan bas tartyp, tolyq aqtaýdy talap etken edi. Sonymen qatar ol túrmede otyrǵan jyldary shaǵymdaný quqyǵynan da aıyrylǵan bolatyn. Qyzynyń sózine sensek, onyń hattary men shaǵymdary túrme qabyrǵasynan ári aspaǵan.
Búkil álem ony aıaýsyz azaptaǵanyn biledi degen qyzy, Prezıdentten «Shańyraq isin» qaıta qaraýǵa jiberýdi jáne ákesin qaıtys bolǵannan keıin tolyq aqtaýdy surady.
