قوستاناي وبلىسىنىڭ اۋليەكول اۋدانىندا ورمان ءورتىن ءسوندىرۋ جۇمىستارى جالعاسۋدا، دەپ جازادى "ادىرنا" ۇلتتىق پورتالى.
قر توتەنشە جاعدايلار مينيسترلىگىنىڭ جەدەل شتابىنىڭ حابارلاۋىنشا، ءورتتى سوندىرۋگە 91 بىرلىك تەحنيكا، 3 اۋە كەمەسى، 5 ءورت پويىزى، جەكە قۇرامنىڭ 600 ادامى جۇمىلدىرىلدى: تجم - 40 بىرلىك تەحنيكا، جەكە قۇرامنىڭ 261 ادامى، سۋاعار قۇرىلعىلارى بار 2 تىكۇشاق (قوستاناي، اقمولا، سولتۇستىك قازاقستان وبلىستارىنىڭ تجد، 52859 ءا/ب (قاراعاندى ق.) ءىىم جەكە قۇرامنىڭ 33 ادامى; ءىىم ۇۇ ء(ا/ب 6697) - 150 ادام، 14 بىرلىك تەحنيكا; قورعانىس مينيسترلىگى جەكە قۇرامىنىڭ 20 ادامى; ورمان شارۋاشىلىعى-32 بىرلىك تەحنيكا، 83 ادام ورمان كۇزەتى; "قازاۆياورمانقورعان" رمقك - 12 ادام، 2 بىرلىك تەحنيكا، 1 اۋە كەمەسى; جاو - 3 تەحنيكا بىرلىگى، جەكە قۇرامنان 20 ادام; "قتج" اق - 5 ءورت ءسوندىرۋ پويىزى (21 ادام).
سۋ اعىزۋ قۇرىلعىلارى ءۇشىن سۋدى 25 كم قاشىقتىقتا ورنالاسقان تابيعي سۋ قويماسىنان الۋدا. ءورتتى سوندىرۋگە 21 رەت سۋدى شاشۋ جۇرگىزىلدى.
امانقاراعاي اۋىلىنداعى (اكىمشىلىك عيمارات) جانە لەسنوە اۋىلىنداعى مۇناي بازاسىنىڭ اۋماعىنداعى ورتتەر ءسوندىرىلدى. وت بەنزين تيەلگەن رەزەرۆۋارلار مەن ديزەل وتىندارىنا كوشكەن جوق. امانقاراعاي جانە وزەرنوە اۋىلدارىنداعى ورتتەر وقشاۋلاندى، قازىرگى ۋاقىتتا جەكە وشاقتاردى ءسوندىرۋ جۇمىستارى جۇرگىزىلۋدە. تۇرعىندار مەن ءورت سوندىرۋگە قاتىسۋشىلار اراسىندا قازا بولۋ جاعدايلارى تىركەلگەن جوق. 10 ادام (5 تۇرعىن، ونىڭ ىشىندە ءبىر كامەلەتكە تولماعان ادام، 1 ورمان شارۋاشىلىعىنىڭ قىزمەتكەرى، 1 اكىمدىكتىڭ قىزمەتكەرى، 3 تجم قىزمەتكەرى) جەڭىل جانە ورتاشا اۋىرلىقتاعى جاراقات، كۇيىك الىپ، ۋلاندى. ولاردىڭ 4-ەۋى ورتالىق اۋداندىق اۋرۋحانادا، 6-ى تەكسەرۋدەن كەيىن جانە كومەك كورسەتىلگەننەن كەيىن ۇيلەرىنە جىبەرىلدى.
جاعدايدىڭ جاقسارۋىنا بايلانىستى ر-36 رەسپۋبليكالىق ماڭىزى بار اۆتوجولىنداعى قوزعالىس جانە تەمىر جول (پوەزدار) بويىنشا پوەزدار قوزعالىسى تولىق كولەمدە قايتا جانداندى (№82, 43, 51, 37, 622 پوەزدار، بارلىعى-908 جولاۋشى). «قازگيدرومەت» رمك دەرەكتەرى بويىنشا 4 قىركۇيەكتە قوستاناي وبلىسىنىڭ اۋليەكول اۋدانىندا جوعارى تەمپەراتۋرا 28 گرادۋسقا دەيىن، جەلدىڭ جىلدامدىعى سەكۋندىنا 9 مەترگە دەيىن ساقتالادى.
ايتا كەتەيىك، 3 قىركۇيەك كۇنى مەتەورولوگيالىق جاعدايدىڭ كۇردەلەنۋىنە بايلانىستى، ونىڭ ىشىندە اۋا تەمپەراتۋراسىنىڭ 36 گرادۋسقا، جەلدىڭ جىلدامدىعى 23 مەترگە دەيىن كوتەرىلىپ، ءورت اۋماعى 9 400 گەكتاردان استى. اۋليەكول اۋدانىنداعى ورمان القابىنىڭ جالپى اۋدانى 40 000 گا.
امانقاراعاي، نوۆونەجينكا، كالينينو، لەسنوە، وزەرنوە ەلدى مەكەندەرىنە قاۋىپ ءتوندى. حالىقتىڭ قاۋىپسىزدىگىن قامتاماسىز ەتۋ ماقساتىندا وزەرنوە اۋىلىنان (250 ادام) جانە امانقاراعاي اۋىلىنىڭ سولتۇستىك بولىگىنەن (1000 ادام), كالينينو اۋىلىنان (228 ادام), لەسنوە اۋىلىنان (363 ادام) جالپى بارلىعى 1841 ادام ەۆاكۋاتسيالاندى. جەرگىلىكتى اتقارۋشى ورگاندار ەۆاكۋاتسيالانعان ادامداردى اۋليەكول ورتا مەكتەبى مەن اۋليەكول مەكتەپ-ينتەرناتىنا ورنالاستىرۋدى ۇيىمداستىردى.
تج مينيسترلىگى مەن تج دەپارتامەنتىندە جەدەل جەلى اشىلدى، پسيحولوگتارىنىڭ جۇمىسى ۇيىمداستىرىلدى. قوستاناي وبلىسىنىڭ اكىمدىگى جەرگىلىكتى اۋقىمداعى توتەنشە جاعدايدى جاريالاۋ ماسەلەسىن پىسىقتاۋدا.
3 قىركۇيەك ساعات 16.00-دەن باستاپ وزەرنوە س. (8 تۇرعىن ءۇي، 1 اكىمشىلىك عيمارات), لەسنوە س. (1 تۇرعىن ءۇي), امانقاراعاي س. (98 تۇرعىن ءۇي جانە شارۋاشىلىق قۇرىلىستار), امانقاراعاي مۇناي بازاسىنىڭ اۋماعىنا ءورتتىڭ كوشۋى تىركەلدى. قازىرگى ۋاقىتتا ءورت 108 قۇرىلىستى جويىپ، زاقىمدادى. بۇگىن قوستاناي وبلىسىنا نۇر-سۇلتان قالاسىنىڭ تجد جەكە قۇرامىنان 15 اۆتوتسيستەرنا، 2 ۆاحتوۆكا، 1 قىزمەتتىك اۆتوموبيل، 98 جەكە قۇرام، سونداي-اق الماتى ق. سۋاعىزۋ قۇرىلعىلارى بار تجم-ءنىڭ 2 تىكۇشاعى رەتىندە قوسىمشا كۇشتەر مەن قۇرالدار كەلەدى.
قازىرگى ۋاقىتتا جاعدايدى باعالاۋ ءۇشىن اۋەدەن بارلاۋ جۇرگىزىلۋدە. اۋە بارلاۋىنىڭ قورىتىندىسى بويىنشا كۇشتەر مەن قۇرالدار ورمان القابىنداعى ءورت وشاقتارىن سوندىرۋگە جانە ەلدى مەكەندەردى قورعاۋعا باعىتتالاتىن بولادى.
"ادىرنا" ۇلتتىق پورتالى
