پرەزيدەنتتىڭ حالىققا جاساعان جولداۋىن ءوز اۋزىنان تىڭدادىم، كەيىننەن ءار سويلەمىنە ءمان بەرىپ وقىپ شىقتىم.
قازىر بارلىق بۇقارالىق اقپارات قۇرالدارىندا تالداپ ايتىلىپ، ەلگە ءتۇسىندىرىلىپ جاتىر. مەن جولداۋدى وزىمشە ءتۇسىندىم. جالپى، ادام نە نارسەدەن دە ءوزىنىڭ قالاۋىن ىزدەيدى. جاقسىلىق ىزدەگەن – جاقسىلىق تابادى، «قويشى وسىدا نە بار دەيسىڭ» دەپ تىڭداپ، سىناپ وقىعان ادام ءوز دەڭگەيىندە تەك جاماندىق كورەدى. نەگە بىزگە «مەملەكەت مۇددەسىن ءوز مۇددەسىنەن جوعارى قويامىن» دەپ اعىنان جارىلىپ الدىمىزدا جولداۋ جاساپ وتىرعان پرەزيدەنتىمىزدى قولداماسقا! جەكە باستارىنىڭ مۇددەسىنەن، وتباسىنىڭ، اعايىن-تۋىسى مەن رۋلاستارىنىڭ تالابىنان شىعا الماي وتىز جىل ەلىمىزدى بيلەگەندەرگە دە توزدىك قوي. قازىر ورتامىزدا ويران سالىپ ءجۇر، وعان نە ىستەي الىپ جاتىرمىز؟!
«بيىل ءبىز جاڭا كەزەڭگە قادام باستىق. حالقىمىز جالپىۇلتتىق رەفەرەندۋمدا ساياسي جاڭعىرۋ باعدارىن قولدادى. كونستيتۋتسيالىق رەفورما جاڭا، ادىلەتتى قازاقستاندى قۇرۋ جولىنداعى اسا ماڭىزدى قادام بولدى. ەلىمىزدەگى ساياسي جاڭعىرۋ ەندى ەكونوميكالىق وزگەرىستەرگە ۇلاسۋعا ءتيىس»،- دەپ باستالىپ وتىرعان جوق پا. نەگە وسى نيەتىنە سەنىپ پرەزيدەنتىمىزگە ەرمەسكە! بۇل جولداۋدىڭ ءجونى بولەك، جولى بولەك بولىپ تۇر. سول جولدا ءبىر جەڭنەن قول، ءبىر جاعادان باس شىعارىپ ءبىز دە مەملەكەت مۇددەسىن ءوز مۇددەمىزدەن جوعارى قويىپ، تاۋەلسىزدىكتىڭ تىلەۋىن تىلەپ، بىرىگەيىك!
سىزدەرگە جولداۋدى تالداپ بەرمەي-اق، ۇزاق جىلدار بويى حالىق ارمانداعان ماسەلەلەرگە قاتىستى دەگەن جەرلەرىن پرەزيدەنت قاسىم-جومارت توقاەۆتىڭ ءوز اۋزىنان ەستىگەن قالىپتى تەرىپ جازىپ بەرەيىن. تاعى ءبىر وقىپ شىعىپ، سەنىم بىلدىرىڭىزدەرشى اعايىن!
«ەلىمىزدىڭ باستى قۇندىلىعى – ادام. بۇل – ايقىن نارسە. سوندىقتان، ۇلتتىق بايلىقتى تەڭ ءبولۋ جانە بارشاعا بىردەي مۇمكىندىك بەرۋ – رەفورمانىڭ باستى ماقساتى. ۇلت ساۋلىعى جاقسى بولسا عانا، قوعام ورنىقتى داميدى.
قۋاتتى ۇلتتىڭ دىڭگەگى – حالىق. ەڭ باستىسى، ازاماتتارىمىزدىڭ دەنساۋلىعى مىقتى، ءبىلىمى تەرەڭ بولۋى كەرەك».
«ورتا ءبىلىمنىڭ ساپاسى – تابىستى ۇلت بولۋدىڭ تاعى ءبىر ماڭىزدى شارتى. ءاربىر وقۋشىنىڭ ءبىلىم الىپ، جان-جاقتى دامۋى ءۇشىن قولايلى جاعداي جاسالۋعا ءتيىس. سول ءۇشىن «جايلى مەكتەپ» ۇلتتىق جوباسى قولعا الىندى.
ءبىلىم الۋعا جىلدىق ءوسىمى 2-3 پايىز بولاتىن جەڭىلدەتىلگەن نەسيە دە بەرىلەدى. بۇل شارالار جوعارى ءبىلىمنىڭ قولجەتىمدىلىگىن ارتتىرىپ قانا قويماي، قوعامداعى ارىپتەستىك جانە ءوزارا جاۋاپكەرشىلىك قاعيداتىن نىعايتا تۇسەدى».
«كەلەسى ماڭىزدى ماسەلە – ستۋدەنتتەردى جاتاقحانامەن قامتاماسىز ەتۋ».
«الەۋمەتتىك قامسىزداندىرۋ جۇيەسىنە دە وزگەرىس ەنگىزۋ كەرەك.
ءبىز 2023 جىلعى 1 قاڭتاردان باستاپ بالا كۇتىمى ءۇشىن تولەماقى تولەۋ مەرزىمىن ءسابي ءبىر جارىم جاسقا تولعانعا دەيىن ۇزارتامىز. بالالاردىڭ ەڭ ماڭىزدى شاعىندا – ءسابي كەزىندە اتا-انالارى جانىندا كوبىرەك بولادى».
«جاستارعا جان-جاقتى قولداۋ كورسەتۋ – مەملەكەتىمىزدىڭ باستى مىندەتىنىڭ ءبىرى. ەڭبەكپەن قامتيتىن ءتۇرلى شارالار ارقىلى كەلەسى جىلى 100 مىڭ جاستى جۇمىسقا ورنالاستىرۋىمىز كەرەك. جاستاردىڭ كاسىپكەرلىك باستامالارىنا قولداۋ كورسەتۋ جالعاسادى. ولارعا جەڭىلدەتىلگەن تارتىپپەن جىلدىق ءوسىمى 2,5 پايىز بولاتىن شاعىن نەسيە بەرىلەدى. بۇل شارالار قوعامنىڭ بارىنشا ۇيلەسىمدى ءارى ادىلەتتى بولۋىنا ىقپال ەتەدى».
مەن ەڭ تومەنگى جالاقى دەڭگەيىن 60 مىڭ تەڭگەدەن 70 مىڭ تەڭگەگە دەيىن كوتەرۋ تۋرالى شەشىم قابىلدادىم. بۇل شەشىم 1,8 ميلليون ازاماتتىڭ تابىسىنا تىكەلەي اسەر ەتەدى.
ءبىز زەينەتاقى جۇيەسىن دە قايتا جاڭعىرتامىز. زەينەتاقىنىڭ ەڭ تومەنگى بازالىق مولشەرلەمەسىن بىرتىندەپ ەڭ تومەنگى كۇنكورىس دەڭگەيىنىڭ 70 پايىزىنا، ال جوعارعى شەگىن 120 پايىزىنا جەتكىزۋ قاجەت. بۇعان دەيىن قابىلدانعان شەشىمدەرمەن بىرگە بۇل قادام 2025 جىلعا قاراي جيىنتىق زەينەتاقى مولشەرىن ورتاشا العاندا 27 پايىزعا كوبەيتەدى. سونداي-اق، الەۋمەتتىڭ تالاپ-تىلەگىن ەسكەرە وتىرىپ، ايەلدەردىڭ زەينەت جاسىن 2028 جىلعا دەيىن 61 جاس دەڭگەيىندە قالدىرامىز.
جالپىحالىقتىق رەفەرەندۋمدا قابىلدانعان كونستيتۋتسيالىق وزگەرىستەر ادىلەتتى قازاقستاننىڭ سيمۆولىنا اينالدى.
ءبىز اتا زاڭىمىزدا جەر مەن تابيعي رەسۋرستار حالىقتىڭ مەنشىگى دەگەن باستى قاعيداتتى بەكىتتىك. بۇل – قۇر ءسوز ەمەس. بۇل – بارلىق رەفورمانىڭ ارقاۋى.
«ءاربىر وتباسى ەلىمىز پايدالانىپ جاتقان ۇلتتىق بايلىقتىڭ يگىلىگىن كورۋى كەرەك. سوندىقتان، مەن جاريالاعان بالالار جىلىنىڭ اياسىندا «ۇلتتىق قور – بالالارعا» اتتى مۇلدە جاڭا باعدارلامانى جۇزەگە اسىرۋ وتە ماڭىزدى دەپ سانايمىن.
ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن بالالاردىڭ ارناۋلى جيناقتاۋشى ەسەپشوتىنا اۋدارۋدى ۇسىنامىن. قارجى ءار بالا 18 جاسقا تولعانعا دەيىن اۋدارىلىپ تۇرادى، ونى مەرزىمىنەن بۇرىن ەسەپشوتتان شىعارىپ الۋعا بولمايدى. جيناقتالعان قارجى بالالار كامەلەت جاسىنا تولعاننان كەيىن ولاردىڭ باسپانا نەمەسە ءبىلىم الۋىنا جۇمسالاتىن بولادى».
«حالىق ۇنىنە قۇلاق اساتىن مەملەكەت» قاعيداسىن ۇستانۋ اسا ماڭىزدى. ءبىز قوعامعا ىرىتكى سالۋدى ەمەس، ەلدى ىزگى ماقساتقا جۇمىلدىرۋدى ويلاۋىمىز كەرەك. ادىلەتتى قازاقستان يدەياسىنىڭ تۇپكى ءمانى – وسى.
ءبىزدىڭ الدىمىزدا ايرىقشا مىندەت تۇر. بۇل – ەلىمىزدىڭ ەگەمەندىگىن جانە جەرىمىزدىڭ تۇتاستىعىن ساقتاپ قالۋ.
ادىلەتتى قازاقستاندى قۇرۋ ءىسى ەندى عانا باستالدى. الداعى جولدىڭ قيىندىعى كوپ. بۇل باعدارىمىز ەشقاشان وزگەرمەيدى، ىشكى جانە سىرتقى احۋال قانداي بولسا دا جالعاسا بەرەدى. قول قۋسىرىپ وتىراتىندار مەن قاساقانا كەدەرگى جاسايتىندارعا ورىن جوق.
ءبىز تاڭداعان جولىمىزدان اينىمايمىز!
ەندەشە، ادىلەتتى قازاقستاندى بىرگە قۇرايىق!
قاسيەتتى وتانىمىزدى بىرگە وركەندەتەيىك، اعايىن!»
مىنە، ءبارىمىزدىڭ ويىمىزداعى، جىلدار بويى كۇتكەن ماسەلەلەرىمىزدىڭ جولى.
ساۋلە دوسجان،
جازۋشى، قر ەبەك سىڭىرگەن قايراتكەرى
