Túrkistan oblysynyń Shardara aýdanyndaǵy 5 jyl buryn salynǵan mektep qaýipti jaǵdaıda tur. Ondaı jerde oqý qaýipti bolǵandyqtan birneshe synyp jabyldy. Óıtkeni, qabyrǵalary qulap ketýi múmkin, dep habarlaıdy “Adyrna” ulttyq portaly.
Otyrar.kz saıtynyń habarlaýynsha, merdiger kompanııa kepildik merziminiń aıaqtalýyn syltaýratyp, kemshilikterdi joıýdan bas tartyp otyr.
250 oryndyq mektep Shardara qalasynyń irgesindegi Óteǵululy aýylynda ornalasqan. Ol 5 jyl buryn ǵana salynyp, paıdalanýǵa berilgen, biraq qazir munda oqý kún saıyn qaýipti bolyp barady. Mektep ashanasynyń qabyrǵalary qısaıyp, qulaýdyń aldynda tur. Mekteptiń bul jaq bóligin oqý ornynyń basshylyǵy jabýǵa májbúr bolyp otyr.
Kezinde nysan keshiktirilip paıdalanýǵa berilgen: qurylys barysynda kóptegen kemshilikter anyqtalyp, olardy joıý qajet boldy. Bir jyldan keıin mektep paıdalanýǵa berildi, biraq az ǵana ýaqyttan keıin qabyrǵalarynda tereń jaryqtar paıda bola bastady.
«Myna qabyrǵa qısaıyp otyryp qaldy. Ol qulap qala ma dep qoryqtyq. Bul óte qaýipti. Sondyqtan ózimiz qulaıyn dep turǵan qabyrǵany taqtaıshalarmen tiregen boldyq. Endi ony súrmekshimiz. Al merdiger tipti kelgen de joq», – dep túsindirdi mektep dırektorynyń orynbasary Nurjamal Ádilova.
Keıingi kezde mektepke oqýshylardyń ata-analary jıi keletin boldy. Olar mundaı jaǵdaıda balalar bilimniń ornyna jaraqat alýy ábden múmkin dep qorqady.
«Balalarym osy mektepte oqıdy. Besinshi balam da oqıyn dep otyr. Ary qaraı qalaı bolaryna ýaıymdap otyrmyn. Eger olar joǵarǵy qabatqa kóterilgen kezde qabyrǵasy kenetten opyrylyp qulaıtyn bolsa ne bolady? Elestetýdiń ózi qorqynyshty», – dedi qala turǵyny Zoıa Esbosynova.
Jaryqtar basqa qabyrǵalarda da paıda bola bastady. Mektep dırektory nysandy qabyldaǵan qurylys bólimine de, oblys basshylyǵyna da aryzdanǵanymen, nátıje joq. Aǵymdaǵy jóndeý jumystaryna bıýdjetten bólingen qarjyǵa muǵalimder osy qabyrǵalardy jamap-jasqaýǵa májbúr.
«2017 jyly salynǵan mektep tek bul ǵana emes, Ordabasy aýdanynda da mektepter salyndy. Ókinishke qaraı, mundaı mektep Saıram aýdanynda, Maqtaaral, Jetisaı aýdandarynda da bar. Bul mektepterdi jóndeýge bizden aqsha suraıdy, biraq olar Jetisaıdyń ózinde úsheý bolsa, Saryaǵash pen Qazyǵurtta taǵy bir-bireýden osyndaı mektepter bar», – dedi. Oblystyq adamı áleýetti damytý basqarmasynyń basshysy Dinıslam Bolathanuly.
Buǵan qosa basqarma josyqsyz qurylysshylardyń tizimin jasap, ony quqyq qorǵaý organdaryna berýdi josparlap otyrǵandaryn aıtty. Oblystyq bilim basqarmasy nysandardy qabyldaǵandar da jazalanýǵa tıis dep esepteıdi. Degenmen bul qurylysshylardyń qatelikterin óz betimen joıýǵa májbúr bolǵan muǵalimderge esh kómektespeıdi.
“Adyrna” ulttyq portaly
