قازاقستاندا ديزەل وتىنى ماسەلەسىن شەشۋگە قاتىستى شارا قابىلداماعانى ءۇشىن ەنەرگەتيكا ۆيتسە-ءمينيسترى اسەت ماعاۋوۆ پەن «قازمۇنايگاز» ۇك» اق باسقارما توراعاسى ماعزۇم مىرزاعاليەۆكە قاتاڭ سوگىس جاريالاندى. بۇل تۋرالى پرەمەر-ءمينيستردىڭ ءباسپاسوز قىزمەتى مالىمدەدى، دەپ حابارلايدى "ادىرنا" ۇلتتىق پورتالى.
"ۋاقىتىندا ءتيىستى شارالار قابىلداماعانى ءۇشىن ەنەرگەتيكا ۆيتسە-ءمينيسترى اسەت ماعاۋوۆ پەن «قازمۇنايگاز» ۇك اق باسقارما توراعاسى ماعزۇم مىرزاعاليەۆكە قاتاڭ سوگىس جاريالاندى. سونىمەن قاتار تارتىپتىك جازالاۋ شارالارى قابىلدانىپ، ەنەرگەتيكا مينيسترلىگى مەن قمگ كومپانياسىنىڭ بىرقاتار جاۋاپتى قىزمەتكەرىمەن ەڭبەك قاتىناسى بۇزىلدى", - دەپ جازىلعان حابارلامادا.
ديزەل وتىنى ماسەلەسى ۇكىمەتتىڭ ەرەكشە باقىلاۋىندا، قىركۇيەكتىڭ باسىندا جاعداي تۇراقتالادى دەپ جوسپارلانىپ وتىر.
ءباسپاسوز قىزمەتى مالىمەتىنشە، پرەمەر-ءمينيستردىڭ تاپسىرماسى بويىنشا ارنايى قۇرىلعان پرەمەر-ءمينيستردىڭ ءبىرىنشى ورىنباسارى رومان سكليار باسقاراتىن كوميسسيا ەلىمىزدىڭ بارلىق ءوڭىرىن ديزەل وتىنىمەن ۇزدىكسىز قامتاماسىز ەتۋ ماسەلەسىمەن اينالىسىپ جاتىر. ونىڭ قۇرامىنا جاۋاپتى مەملەكەتتىك ورگاندار مەن ۇلتتىق كومپانيالار وكىلى كىرەدى.
بىرىنشىدەن، شەتەلدىك ترانزيتتىك كولىك وتىندى كوپ تۇتىنادى. ەكىنشىدەن، باعانىڭ ايتارلىقتاي ايىرماشىلىعىنا بايلانىستى قازاقستاننان كورشىلەس ەلدەرگە ديزەل وتىنىنىڭ جىبەرىلۋى. مىسالى، قازاقستاندا ديزەلدىڭ ءبىر ءليترى – 230-260 تەڭگە، ال وزبەكستان، قىرعىزستان جانە رەسەيدەگى جانارماي بەكەتتەرىندەگى باعا 440 تەڭگەگە دەيىن جەتەدى.
"وتاندىق مۇناي بازالارى ديزەل وتىنىن بولشەك ساۋدا قۇنىنان جوعارى باعامەن ساتقان، بۇل وڭىرلەردە وتىن ساتۋ كولەمىنىڭ قىسقارۋىنا اكەلدى. ويتكەنى ونى ساتىپ الۋ جانارماي بەكەتتەرى ءۇشىن ءتيىمسىز بولدى", - دەپ جازىلعان حابارلامادا.
سونداي-اق «قازمۇنايگاز»، Petrosun كومپانيالارى، سونداي-اق مۇناي وڭدەۋ زاۋىتتارى تاراپىنان ءوندىرۋ، ماركەتينگ جانە لوگيستيكادا جۇيەلى كەمشىلىكتەر مەن ولقىلىقتار انىقتالدى.
جاعدايدى قالىپقا كەلتىرۋ جانە جانار-جاعارماي ماتەريالدارىنىڭ ىشكى نارىعىن تولىق قامتاماسىز ەتۋ ءۇشىن بىرقاتار جەدەل جانە ۇزاق مەرزىمدى شارالار قابىلداندى:
- ديزەل وتىنى ءوندىرىسىنىڭ كولەمى بيىل 5,2 ملن تونناعا دەيىن ۇلعايدى، بۇل 2021 جىلعا قاراعاندا 340 مىڭ تونناعا جوعارى;
- مۇناي وڭدەۋ زاۋىتتارىنان ديزەل وتىنىن جونەلتۋ كولەمى ۇلعايتىلدى;
- «سامۇرىق-قازىنا» قورى جانە «قازمۇنايگاز» ۇك اق-مەن ديزەل وتىنىنىڭ قوسىمشا كولەمىن جەتكىزۋ تۋرالى كەلىسىمگە قول جەتكىزىلدى;
- شىمكەنت ءموز-ءدىڭ وندىرىستىك قۋاتىن كەڭەيتۋ جوسپارلانعان;
- 2023 جىلدان باستاپ ءموز جۇمىسىنىڭ جاڭا سحەماسىنا كەزەڭ-كەزەڭمەن كوشۋ جوسپارلانىپ جاتىر، ونىڭ اياسىندا مۇنايدى زاۋىتتارعا تىكەلەي جەر قويناۋىن پايدالانۋشىلاردىڭ ءوزى جەتكىزەدى نەمەسە مۇناي ءموز-ءدى تىكەلەي ساتىپ الۋ جولىمەن جەتكىزىلەتىن بولادى.
ەنەرگەتيكا مينيسترلىگى مەن جانارماي بەكەتتەرىنىڭ ءىرى جەلىلەرىندە call-ورتالىقتار اشىلدى، وندا قازاقستاندىقتار باعانى نەگىزسىز كوتەرۋ جانە جانار-جاعارماي ماتەريالدارىن ساتۋدان باس تارتۋ فاكتىلەرى تۋرالى حابارلاي الادى.
"ادىرنا" ۇلتتىق پورتالى
