10 ماۋسىمدا «قازمۇنايگاز» ۇك اق باسقارما توراعاسى ماعزۇم مىرزاعاليەۆ باستاعان دەلەگاتسيا توبولسك قالاسىندا ورنالاسقان رەسەيدىڭ جانە الەمنىڭ ءىرى مۇناي-حيميا كەشەندەرىنىڭ ءبىرى – «زاپسيبنەفتەحيم» جشق («سيبۋر حولدينگ» توبىنىڭ مۇناي-حيميا كومبيناتىنا) بارىپ، جۇمىسىمەن تانىستى دەپ حابارلايدى “ادىرنا” ۇلتتىق پورتالى.
ساپار بارىسىندا جيىنتىق قۋاتى جىلىنا 2,5 ملن توننا بولاتىن بازالىق پوليمەر (1,5 ملن توننا پوليەتيلەن جانە 1 ملن توننا پوليپروپيلەن) شىعارۋعا مۇمكىندىك بەرەتىن «زاپسيبنەفتەحيم» جشق جاڭا وندىرىستەرى تانىستى. قمگ دەلەگاتسياسى پيروليز، پوليەتيلەن، پوليپروپيلەن قوندىرعىلارىن، سونداي-اق ورتالىق وپەراتور زالىن ارالاپ، كەشەندە قولدانىلاتىن تسيفرلى تەحنولوگيالاردى دا كوردى. .
ودان بولەك، مونومەر ءوندىرىسىن، سونىڭ ىشىندە مالەين انگيدريدىن وندىرەتىن قوندىرعىنى، پروپاندى دەگيدرلەۋ ءوندىرىسىن، جەڭىل كومىرسۋتەكتەردىڭ كەڭ فراكتسياسىن قايتا وڭدەۋ ءوندىرىسىن جانە مونومەر زاۋىتى وندىرىستەرىنىڭ بىرىڭعاي وپەراتور زالىن كورىپ شىقتى.
قمگ دەلەگاتسياسى «سيبۋرينتەح» ينجەنەرلىك-تەحنيكالىق ساراپتامانى دامىتۋ ورتالىعىنىڭ جۇمىسىمەن دە تانىستى.
ساپار سوڭىندا قمگ، سيبۋر جانە Sinopecباسشىلارى جۇمىس بابىنداعى كەزدەسۋ (بەينە بايلانىسى ارقىلى) وتكىزدى. جيىن بارىسىندا كومپانيالار اراسىنداعى الداعى ىنتىماقتاستىق ماسەلەلەرى جانە مۇناي-گاز حيميا جوبالارىن بىرلەسىپ جۇزەگە اسىرۋدىڭ پەرسپەكتيۆالارى تالقىلاندى.
ايتا كەتەيىك، سيبۋر - رەسەيدىڭ پوليپروپيلەن، تومەن قىسىمدى پوليەتيلەن، بوپپ ۇلدىرلەر، پەتف، مونوەتيلەنگليكول، كوبىكتەنگىش پوليستيرول، تەرموەلاستوپلاست ءوندىرىپ شىعاراتىن ەڭ ءىرى كومپانيا. پوليولەفين (پلاستيك) وندىرەتىن الىپ بەس مەكەمەنىڭ ءبىرى.
ەسكە سالايىق, 2021 جىلدىڭ 7 قازانىندا «سامۇرىق-قازىنا» اق، قمگ جانە سيبۋر اراسىندا پوليەتيلەن وندىرەتىن زاۋىت پەن پوليپروپيلەن وندىرەتىن زاۋىتتى سالۋ جوبالارى جونىندەگى ىنتىماقتاستىقتىڭ نەگىزگى شارتتارى بويىنشا كەلىسىمگە قول قويعان.
”ادىرنا” ۇلتتىق پورتالى
