قازاقستان رەسپۋبليكاسىنىڭ ۇلتتىق ەكونوميكا مينيسترلىگى وتاندىق ەكونوميكانى دامىتۋدىڭ 2023-2027 جىلدارعا ارنالعان ءۇش ستسەناريىن ازىرلەدى - بازالىق، وپتيميستىك جانە پەسسيميستىك.
ولاردى ۇكىمەت وتىرىسىندا ۇلتتىق ەكونوميكا ءمينيسترى الىبەك قۋانتيروۆ تانىستىردى.
بازالىق ستسەناري بويىنشا مۇنايدىڭ ورتاشا باعاسى باررەلىنە $85 جانە دوللاردىڭ بولجامدى باعامى 470 تەڭگەنى پايدالانۋ ۇسىنىلادى. وسى ستسەناري بويىنشا ءجىو-ءنىڭ ورتاشا جىلدىق ناقتى ءوسىمى 3,9%-دى، ونىڭ ىشىندە 2023 جىلى 4%-دى قۇرايدى.
«وپتيميستىك ستسەناري بويىنشا مۇنايدىڭ بولجامدى باعاسى باررەلىنە $110, دوللار باعامى 440 تەڭگە بولىپ بەلگىلەندى. ەكونوميكانىڭ ورتاشا جىلدىق ءوسىمى 4,2% دەڭگەيىندە بولجانۋدا»، - دەدى قۋانتيروۆ.
پەسسيميستىك ستسەناري مۇناي باعاسىنىڭ باررەلىنە 60 دوللار دەڭگەيىندە جانە ايىرباس باعامىن ءبىر اقش دوللارىنا 500 تەڭگەگە دەيىن السىرەتۋدى كوزدەيدى. ءجىو-ءنىڭ بولجامدى ناقتى ءوسىمى ورتا ەسەپپەن 3,5%-دى قۇرايدى.
«بيۋدجەتتىك جوسپارلاۋدىڭ نەگىزى رەتىندە بازالىق ستسەناريدى پايدالانۋ ۇسىنىلادى. وسى ستسەناري بويىنشا ناقتى ءجىو ءوسىمى 2023 جىلعى 4,0%-دان 2027 جىلى 4,2%-عا دەيىن جەدەلدەتىلەدى. اتاۋلى ءجىو 120,7 ترلن تەڭگەدەن 176,6 ترلن تەڭگەگە دەيىن وسەدى»، - دەپ تولىقتىردى مينيستر.
بارلىق ستسەناريلەر بويىنشا ينفلياتسيا 2023 جىلى 7,5-9,5% دەڭگەيىندە، 2024 جىلى - 4-5% دەڭگەيىندە، كەيىننەن 2025-2027 جىلدارى 3-4%-عا دەيىن تومەندەۋىمەن انىقتالادى.
