بۇگىن سىر ەلىندە 1000-عا جۋىق پەداگوگتىڭ قاتىسۋىمەن وبلىستىق تامىز كەڭەسى وتكىزىلىپ، ءبىلىم سالاسىنىڭ وزەكتى ماسەلەلەرى قارالىپ، ۇزدىك ۇستازدار ماراپات مىنبەرىنەن كورىندى.
القالى جيىنعا وبلىس اكىمى نۇرلىبەك نالىباەۆ، وقۋ-اعارتۋ ۆيتسە-ءمينيسترى عاني بەيسەمباەۆ، قر پارلامەنت سەناتىنىڭ دەپۋتاتتارى مۇرات باقتيارۇلى، اقمارال ءالنازاروۆا، ءماسليحات دەپۋتاتتارى جانە سالا ارداگەرلەرى، مەكتەپ ديرەكتورلارى مەن ۇستازدار قاتىستى.
«ءبىلىمدى ۇلت: تەرەڭ ءبىلىم، ەڭبەكقورلىق جانە وتانشىلدىق قاسيەت» تاقىرىبىندا وتكەن پەداگوگتەر كەڭەسىندە نۇرلىبەك نالىباەۆ ء"بىلىم - باستى قۇندىلىق، مەملەكەت ءاردايىم ۇستازدارعا لايىقتى دەڭگەيدە قولداۋ شارالارىن جۇرگىزەتىنىن" جەتكىزدى.
- پرەزيدەنت باستاماسىمەن سوڭعى جىلدارى ءبىلىم سالاسىندا اۋقىمدى رەفورمالار جۇزەگە اسىرىلىپ، پەداگوگ مارتەبەسىن كوتەرۋدە تىڭ باستامالار قولعا الىندى. بۇل ءوز كەزەگىندە ۇستازدارعا دەگەن ايرىقشا قۇرمەت، ءبىلىم سالاسىنا جاساعان ەرەكشە قامقورلىق.
ايماقتاعى دەموگرافيالىق ءوسىمدى ەسكەرە كەلە، الداعى 3 جىلدا ايماقتا 20 مەملەكەتتىك مەكتەپتىڭ ىرگەتاسىن قالايمىز. بۇگىنگى كۇنى دەمەۋشىلەردىڭ ءوز قاراجاتىنا سالىنعان جەكە مەكتەپتەردىڭ جەلىسى 20-عا جەتتى. الداعى جىلدارى ينۆەستور ەسەبىنەن تاعى 12 مەكتەپ سالىناتىن بولادى. ال، بيىلدىڭ وزىندە وبلىستا 6 جاڭا مەكتەپ بوي كوتەرەدى، ونىڭ 2-ەۋىن كەلەر ايدا، قالعان 4-ەۋىن جىل سوڭىنا دەيىن پايدالانۋعا بەرەمىز. ال، ايماقتاعى 6 مەكتەپتىڭ ءۇش اۋىسىمعا ءوتۋ قاۋپى بار، ال 4 اپاتتى دەپ تانىلعان 3 مەكتەپتىڭ ماسەلەسى بيىل شەشىمىن تاپتىق. ونىڭ ەكەۋىن قىركۇيەكتە تابىستايمىز.
ورىن تاپشىلىعى جاعدايىنىڭ الدىن الۋ ءۇشىن جىل اياعىنا دەيىن 1,6 ملرد.تەڭگە كولەمىندە قالاداعى اباي مەكتەبىنە 550, №101 مەكتەپكە 375 ورىنعا لايىقتالعان قوسىمشا قۇرىلىس سالىناتىن بولادى. وسى ارقىلى كوپ جىلداردان بەرى شەشىمىن تاپپاعان بۇل مەكتەپتەگى ۇشاۋىسىمعا اۋىسۋ قاۋپىندەگى ماسەلە تۇبەگەيلى شەشىلەدى،-دەدى ن.نالىباەۆ.
كونفەرەنتسيادا ءسوز العان سپيكەرلەر ءبىلىم سالاسىنداعى سوڭعى وزگەرىستەرگە توقتالىپ، دارىندى بالالاردى قولداۋ، ءبىلىم بەرۋدىڭ ورتاق ماسەلەلەرىن تالقىعا سالىپ، يدەيالارىمەن ءبولىستى.
ۆيتسە-مينيستر عاني بەيسەمباەۆ وزگەرىستەر زامانىندا ءبىلىم بەرۋ سالاسىنىڭ دامۋ قارقىنىنا ىلەسۋ ءۇشىن ۇستازداردىڭ ادىستەمەسى دە جاڭارىپ وتىرۋ قاجەت ەكەنىن العا تارتىپ، وقۋ جىلىنا ەنەتىن وزگەرىستەرگە توقتالدى. ال، سەنات دەپۋتاتى مۇرات باقتيارۇلى وقۋلىقتار ماسەلەسىن شىعارۋ، كوللەدجدەردە مامان دايارلاۋ ماسەلەسىن قوزعادى.
پەداگوگتەر جيىندا العاش رەت حالىقتىڭ قۇرمەتىنە بولەنگەن قوس ارداگەر ۇستاز تولەپبەرگەن قاسىموۆ پەن مارك پودولسكيگە قىزىلوردا وبلىسىنىڭ «قۇرمەتتى ازاماتى» اتاعى بەرىلدى.
توقساننىڭ تورىنە شىققان قوس ۇستازعا ايماق باسشىسى ءىلتيپات ءبىلدىرىپ، ەڭ جوعارى ماراپاتتى تابىس ەتتى.
مەرەيلى كۇندەگى ەڭ ماڭىزدى ءساتتىڭ بىرىندە وبلىس اكىمى نۇرلىبەك نالىباەۆ 2,5 جاستاعى ءسابيدى كارىز قۇدىعىنان قۇتقارعان 15 جاستاعى ارمان امانجولوۆقا ەرەكشە العىس ءبىلدىرىپ، دەمەۋشىلەرمەن بىرگە ەكى بولمەلى پاتەر كىلتىن تابىستادى.
سونداي-اق، جىل سايىن وتكىزىلەتىن كونكۋرس ناتيجەسىندە ۇزدىك ءبىلىم بەرۋ گرانتى اۋىل مەكتەبىنە بۇيىرىپ، ۇزاقباي قارامانوۆ اتىنداعى №262 مەكتەبى 34 ملن.تەڭگەنىڭ سەرتيفيكاتىن جەڭىپ الدى.
جيىندا وبلىس اكىمىنىڭ گرانتىن يەلەنگەن 100 وقۋشىنىڭ بىرقاتارىنا گرانتىن تابىستادى. ءوڭىر باسشىسى ۇلكەن ومىرگە قادام باسقان جاستارعا سەنىم ءبىلدىرىپ، تەرەڭ ءبىلىم الۋعا شاقىردى.
ۇستازداردىڭ ءتول جيىنىندا ەڭبەگىمەن كوزگە ءتۇسىپ، ۇزدىك شاكىرتتەرىمەن تانىلعان 3 مۇعالىم «ى.التىنسارين» توسبەلگىسىمەن، 2 ازاماتقا ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسى تاعىلدى. مۇنان بولەك، «ەڭبەك ارداگەرى»، «مەيىرىم» توسبەلگىسىنىڭ يەگەرى انىقتالىپ، 5 مۇعالىمگە وبلىس اكىمىنىڭ العىس حاتى بەرىلدى.
