وقۋ-اعارتۋ مينيسترلىگى 25 جىلدان استام ەڭبەك ءوتىلى بار ۇستازدارعا «ۇستازدىق قىزمەتىنە ادالدىعى ءۇشىن» قۇرمەت بەلگىسىن تاعايىنداۋدى جوسپارلاپ وتىر، دەپ حابارلايدى «ادىرنا» ءتىلشىسى.
«مەملەكەت باسشىسى پەداگوگتەردى قولداۋعا ەرەكشە كوڭىل ءبولىپ وتىر. پرەزيدەنتتىڭ تاپسىرماسى بويىنشا جالاقىنى كوبەيتۋ، مۇعالىمدەردى ەسەپ بەرۋدەن جانە مىندەتىنە جاتپايتىن ارتىق فۋنكتسيالاردان بوساتۋ بويىنشا جۇمىستاردى جۇرگىزىپ جاتىرمىز. قازىر ءبىز سالالىق ىنتالاندىرۋ جۇيەسىن بەكىتۋ تۋرالى بۇيرىققا وزگەرىستەر ەنگىزۋگە باستاما جاسادىق. «ۇستازدىق قىزمەتىنە ادالدىعى ءۇشىن» قۇرمەت بەلگىسى مەكتەپكە دەيىنگى، ورتا، تەحنيكالىق جانە كاسىپتىك، ورتا بىلىمنەن كەيىنگى جانە قوسىمشا ءبىلىم بەرۋ ۇيىمدارىنىڭ پەداگوگتەرىنە بەرىلەدى. توسبەلگى 25 جىلدان استام ۋاقىت بويى ۇستازدىق ەتكەن مۇعالىمدەرگە بەرىلەدى. وسىلايشا، ءوز ىسىنە ادال، وسكەلەڭ ۇرپاقتى تاربيەلەۋ مەن وقىتۋعا زور ۇلەس قوسىپ جۇرگەن ۇستازداردى ىنتالاندىرعىمىز كەلەدى»، – دەدى وقۋ-اعارتۋ ۆيتسە-ءمينيسترى شولپان كارينوۆا.
