بەلگىلى ادۆوكات ابزال قۇسپان كاسىپكەر بولات ءابىلوۆتى سوتقا بەردى، دەپ حابارلايدى "ادىرنا" ءتىلشىسى ازاتتىق راديوسىنا سىلتەمە جاساپ.
"مەن كۇنى بويى سوت پروتسەسىندە ءجۇرمىن. سوت ونلاين رەجيمدە "اكىمشىلىك قۇقىق بۇزۋشىلىق تۋرالى" كودەكستىڭ 73-3 بابىنىڭ 2-بولىگى بويىنشا بولات مۇقىشۇلى ابىلوۆكە قاتىستى اكىمشىلىك ماتەريالدى" قارايدى. ارىز بەرۋشى ابزال قۇسپان، مەن 14 شىلدەدە "مايدان" YouTube كانالىنا بەرگەن سۇحباتىمدا ونى "قىزىل ادۆوكات" جانە "بيلىك ادامى" دەپ ايتقان ەدىم. بۇل 2022 جىلعى «قاڭتار تراگەدياسىن» تەرگەۋ اياسىندا ايتىلعان ەدى", - دەپ جازدى بولات ءابىلوۆ ءوزىنىڭ فەيسبۋك پاراقشاسىندا.
ارىز بەرۋشى ابزال قۇسپان دا بۇل اقپاراتتى راستادى.
ء"يا، مەنىڭ ارىزىم بويىنشا سوت پروتسەسى ءجۇرىپ جاتقانىن راستايمىن. كەيبىر ادامدار ءتىلى مەن جاعىنا سۇيەنگەندى ۇناتادى، بىراق ءوز سوزدەرى ءۇشىن جاۋاپ بەرگىسى كەلمەيدى. ايتتىم عوي، جاقىن ارادا ويبايشىل ءبىر ساياساتكەر ويبايلاپ باستايدى دەپ، ويبايلاماق تۇگىلى مامالاسا دا، ەندى زاڭ قۇرىعىنان قۇتىلا قويماس. ايتپاقشى، ول مەن تۋرالى تەك "بيلىكتىڭ ادامى" مەن "قىزىل ادۆوكات" دەپ قانا ايتقان جوق، سوت تالقىلاۋىنان كەيىن ءبارىن حابارلايمىن. ءبىز سوتتاسىپ جاتىرمىز، ازىرشە ونىڭ نازارباەۆ جۇيەسىمەن كۇرەسكەن جالعىز "قاھارمان" رەتىندە كورسەتەتىن ۆيدەوسىن كورىڭىزدەر", - دەپ جازدى ابزال قۇسپان.
"ادىرنا" ۇلتتىق پورتالى
