اقتوبەدە ەندى قاڭعىباس يتتەر ۋاقىتشا ۇستاۋ يزولياتورىنا قامالاتىن بولادى. "جانۋارلارعا جاۋاپكەرشىلىكپەن قاراۋ" تۋرالى جاڭا زاڭعا سايكەس بۇدان بىلاي مۇنداي يت-مىسىقتار 15 كۇن ۇستالاتىن بولىپتى، دەپ حابارلايدى «ادىرنا» ءتىلشىسى ينفورمبيۋروعا سىلتەمە جاساپ.
شەنەۋنىكتەر ۋاقىتشا قاماۋدان بوساتىلعان توبەتتەردىڭ ادامداردى تالامايتىنىنا كەپىلدىك بەرمەسە دە ولاردى الدىمەن زورلىقشىلارعا قولدانىلاتىن ءتاسىل، ياعني يت-مىسىقتاردى كاستراتسيالاعاننان كەيىن عانا كوشەگە جىبەرمەك. بۇدان بولەك وبلىستىق ۆەتەريناريا باسقارماسى يەسىز يت-مىسىقتاردى اۋلاپ، ءپىشتىرۋ ءۇشىن جەرگىلىكتى بيۋدجەتتەن 119 ميلليون تەڭگە ءبولۋدى سۇراعان. الايدا تۇرعىندار اۋلانعان قاڭعىباس يتتەردى كوشەگە قايتا جىبەرۋگە قارسىلىق ءبىلدىرىپ وتىر.
4 ناۋرىزدان باستاپ كۇشىنە ەنگەن "جانۋارلارعا جاۋاپكەرشىلىكپەن قاراۋ" تۋرالى جاڭا زاڭ بويىنشا، كوشەدەگى يەسىز يتتەر ۋاقىتشا 15 كۇنگە قامالىپ، سول جەردەن ءپىشتىرىلىپ، ەكپە الىپ قايتا ەرىكتەرىنە جىبەرىلەدى. الايدا اقتوبەلىكتەر ادامدارعا، ونىڭ ىشىندە بالالارعا ءجيى اتىلاتىن بۇرالقى يتتەردى اۋلانعاننان كەيىن بوستاندىققا قايتا جىبەرۋگە بولمايدى دەيدى.
وسى رەتتە ماماندار قاڭعىباس يتتەر ەندى سەبەپسىز اتىلمايتىنىن ايتادى. تەك ۋاقىتشا ۇستاۋ يزولياتورىنا اكەلىنگەن يتتەردىڭ اراسىندا اگرەسسيا كورسەتكەنى بولسا، نە اۋرۋ تابىلسا عانا جانسىزداندىرىلادى دەيدى. ازىرگە اقتوبەدە يتتەرگە ارنالعان ۋاقىتشا ۇستاۋ ورنى جوق.
