تۇركىستان وبلىسىندا جيىن-تەرىم ناۋقانى ءجۇرىپ جاتىر. اۋىل شارۋاشىلىعى سالاسىنداعى جۇمىستار بارىسى مەن وزەكتى ماسەلەلەر تۇركىستان وبلىسىنىڭ اكىمى ومىرزاق شوكەەۆتىڭ توراعالىعىمەن وتكەن اپتالىق ماجىلىستە تالقىلاندى. ءوڭىر باسشىسى جيىن-تەرىم كەزەڭىندە جۇمىستاردى ساپالى اتقارىپ، شارۋالارعا قولداۋ كورسەتۋدى تاپسىردى.
– بيىل اۋىل شارۋاشىلىعى سالاسىندا كورسەتكىش جوعارى. جەتىستىكتەر جىلى بولىپ تۇر. كوپ جۇمىس اتقارىلدى. بۇل – وسى سالاداعى ازاماتتاردىڭ، حالىقتىڭ ەڭبەگىنىڭ جەمىسى. ەندى وسى جەتىستىككە جەتۋ جولىن ۇيرەتۋ ءۇشىن شارۋالاردى جيناپ، سەمينار وتكىزۋ كەرەك. كوكونىس، بيدايعا قاتىستى سەمينار وتكىزىپ، تاجىريبەمەن بولىسكەن ءجون. ەگىستىك باسىنا اپارىپ، تەحنيكالار مەن تەحنولوگيالاردى كورسەتۋ ارقىلى جۇرتشىلىقتى اۋىل شارۋاشىلىعىنا قىزىقتىرا الامىز، – دەدى ومىرزاق شوكەەۆ.
تۇركىستان وبلىستىق اۋىل شارۋاشىلىعى باسقارماسىنىڭ باسشىسى ت.وسپانوۆتىڭ ايتۋىنشا، بيىل وبلىستا ماقتا داقىلى 126,3 مىڭ گەكتارعا ەگىلگەن. جالپى 345 مىڭ توننا ءشيتتى ماقتا جينالىپ، وتكەن جىلعى كورسەتكىشتەن ارتادى دەپ جوسپارلانىپ وتىر.
ماقتا باعاسى بيىل 400 تەڭگە كولەمىندە بولادى دەپ كۇتىلۋدە. 2021 جىلى ءبىر كەلىسىنىڭ باعاسى 320-380 تەڭگە ارالىعىندا بولعان.
بيىل اۋىل شارۋاشىلىعى داقىلدارى 859,9 مىڭ گەكتارعا ورنالاستىرىلىپ، وتكەن جىلمەن سالىستىرعاندا 14,4 مىڭ گەكتارعا ارتىپ وتىر. ونىڭ ىشىندە ءداندى داقىلدار 313 مىڭ گەكتارعا ەگىلسە، كوكونىس، باقشا، كارتوپ 119,4 مىڭ گەكتارعا ەگىلگەن.
بۇگىنگى كۇنگە 254 مىڭ گەكتارعا ەگىلگەن استىقتى ورۋ ناۋقانى اياقتالدى. گەكتار تۇسىمدىلىگى 19 تسەنتنەردى قۇراپ، وتكەن جىلدان 8,7 تسەنتنەرگە ارتىپ، 471,3 مىڭ توننا ءونىم جينالدى. كوكونىس پەن باقشا بويىنشا 2,8 ملن. توننا ءونىم جينالسا، 112,6 مىڭ توننا جەمىس-جيدەك جينالعان.
وبلىس اكىمىنىڭ تاپسىرماسىمەن جۇزەگە اسىرىلىپ جاتقان «ءبىر القاپتان جىلىنا 2-3 ءونىم الۋ» جوباسى بويىنشا بيىل 8,4 مىڭ گەكتاردا 3000 جوبا ىسكە اسىرىلدى، ءبىرىنشى، ەكىنشى ونىمنەن 230 مىڭ توننا كوكونىس ءونىمى جينالىپ، جۇمىستار جالعاسۋدا. 85,5 گەكتارعا جاڭا جىلىجايلار سالىنىپ، جالپى كولەمى 1552 گەكتاردى قۇرادى. بۇگىنگى كۇنگە جىلىجايلار ەسەبىنەن 118 مىڭ توننا ءونىم وندىرىلگەن.
جالپى بيىل مەملەكەت تاراپىنان كۇزگى جيىن - تەرىم جۇمىستارىنا 48 مىڭ توننا جانار-جاعار ماي ءبولىنىپ، اگروقۇرىلىمدارعا ءليترى 200-202 تەڭگەدەن بەرىلىپ جاتىر. بۇل — نارىقتىق باعادان 15-20% تومەن. 522 ءتۇرلى مينەرالدى تىڭايتقىشتاردىڭ قۇنىن 50%-ىن سۋبسيديالاۋعا بيۋدجەتتەن قارجى ءبولىندى.
